అగ్నివీరుల వెబ్సైట్పై సైబర్ దాడి
అగ్నివీరుల వివరాలకు సంబంధించిన వెబ్సైట్పై సైబర్ దాడి జరిగింది. ఆర్మీ, నేవీ, ఎయిర్ఫోర్స్లలో నాలుగేళ్ల సర్వీస్ కోసం కేంద్ర ప్రభుత్వం అగ్నివీర్ పథకాన్ని ప్రవేశపెట్టింది.
ఈ పథకంలో సేవలందించిన మాజీ అగ్నివీరులు ఇతర ప్రభుత్వ శాఖల్లో ఉద్యోగ ఖాళీల కోసం దరఖాస్తు చేసుకునే అవకాశం ఉంది.
ఈ ప్రక్రియకు సంబంధించిన ఒక టెస్ట్ వెబ్సైట్ను హర్యానాకు చెందిన 14 ఏళ్ల బాలుడు హ్యాక్ చేశాడు.
వెబ్సైట్లోకి చొరబడి సుమారు 4,000 మంది అగ్నివీరుల వ్యక్తిగత వివరాలను సేకరించాడు.
డార్క్ వెబ్లో డేటా విక్రయానికి ప్రయత్నం
వెబ్సైట్ నుంచి సేకరించిన సమాచారాన్ని డార్క్ వెబ్లో విక్రయించేందుకు బాలుడు ప్రయత్నించాడు.
ఈ డేటాను 500 డాలర్లకు అమ్ముతానంటూ ఒక ప్రకటన కూడా పోస్ట్ చేశాడు. భారత కరెన్సీలో ఈ మొత్తం దాదాపు రూ.40 వేలకు పైగా ఉంటుంది.
వ్యక్తిగత వివరాలను ఇలా విక్రయించేందుకు ప్రయత్నించడం ఈ ఘటనలో ప్రధాన అంశంగా మారింది.
అగ్నివీరుల సమాచారానికి సంబంధించిన డేటా బయటకు వెళ్లిందనే విషయం వెలుగులోకి రావడంతో అధికారులు అప్రమత్తమయ్యారు.
ఢిల్లీ పోలీసుల వేగవంతమైన చర్యలు
ఈ వ్యవహారం గురించి సమాచారం అందుకున్న ఢిల్లీ పోలీసుల ఇంటెలిజెన్స్ ఫ్యూజన్ అండ్ స్ట్రాటజిక్ ఆపరేషన్స్ (ఐఎఫ్ఎస్ఓ) విభాగం వెంటనే స్పందించింది. హర్యానాలోని బల్లాభ్గఢ్కు చెందిన 14 ఏళ్ల బాలుడిని పోలీసులు అదుపులోకి తీసుకున్నారు.
ప్రాథమిక దర్యాప్తులో బాలుడు ఆర్టిఫిషియల్ ఇంటెలిజెన్స్ (ఏఐ) టూల్స్ను ఉపయోగించి టెస్ట్ వెబ్సైట్లోకి చొరబడినట్లు అధికారులు గుర్తించారు. సాంకేతిక పరిజ్ఞానాన్ని ఉపయోగించి వెబ్సైట్లోని సమాచారాన్ని సేకరించినట్లు దర్యాప్తు అధికారులు తెలిపారు.
డిజిటల్ పరికరాల నుంచి డేటా స్వాధీనం
బాలుడి వద్ద ఉన్న డిజిటల్ పరికరాలను పోలీసులు పరిశీలించారు. వాటి నుంచి చోరీకి గురైన మొత్తం డేటాను స్వాధీనం చేసుకున్నారు. ఈ సమాచారాన్ని ఇతరులకు పంపించారా? ఇంకా ఎక్కడైనా భద్రపరిచారా? అనే అంశాలను పోలీసులు పరిశీలిస్తున్నారు.
చోరీకి గురైన సమాచారం అసలైనదేనా? కాదా? అనే విషయాన్ని నిర్ధారించుకునేందుకు కేంద్ర హోం వ్యవహారాల మంత్రిత్వ శాఖ (ఎంహెచ్ఏ) అధికారిక రికార్డులను పోలీసులు కోరారు.
మైనర్ బాలుడిని కుటుంబ సభ్యులకు అప్పగింత
చట్టప్రకారం బాలుడిని ప్రాథమికంగా ప్రశ్నించిన తర్వాత పోలీసులు అతడిని కుటుంబ సభ్యులకు అప్పగించారు. ఈ ఘటనలో డేటా ఉల్లంఘన తీవ్రత ఎంత ఉందనే అంశంపై దర్యాప్తు కొనసాగుతోంది.
సుమారు 4,000 మంది అగ్నివీరుల వివరాలు చోరీకి గురైనట్లు ప్రాథమికంగా గుర్తించినప్పటికీ, ఇతర సమాచారం ఏదైనా లీక్ అయ్యిందా? అనే కోణంలో అధికారులు విచారణ చేస్తున్నారు. వెబ్సైట్లోని భద్రతా లోపాలు, డేటా ఎలా బయటకు వెళ్లింది? అనే అంశాలపై కూడా పోలీసులు లోతుగా దర్యాప్తు చేస్తున్నారు.



