గుండెల్ని పిండేసే ఘటన.. 4 ఏళ్లకే నూరేళ్లు నిండిపోయినయా బిడ్డా.. ఏం జరిగిందంటే..?

కారులోకి సరదాగా వెళ్లిన చిన్నారి

భద్రాద్రి కొత్తగూడెం జిల్లాలో తీవ్ర విషాదం చోటుచేసుకుంది.
నాలుగేళ్ల చిన్నారి ప్రమాదవశాత్తూ కారులో చిక్కుకుని ప్రాణాలు కోల్పోయింది.

కళ్ల ముందే ఆడుతూ పాడుతూ తిరిగిన పాప కొద్దిసేపటికే విగతజీవిగా మారింది. ఈ ఘటనతో కుటుంబ సభ్యులు కన్నీరుమున్నీరుగా విలపిస్తున్నారు.

భద్రాద్రి కొత్తగూడెం జిల్లా జూలూరుపాడు మండలం వినోబానగర్ గ్రామంలో ఈ విషాద ఘటన జరిగింది.

వినోబానగర్ గ్రామ సర్పంచ్ గంగావతి నవీన్, ఐశ్వర్య దంపతులకు తన్విత శ్రీ (4), సురక్ష అనే ఇద్దరు కుమార్తెలు ఉన్నారు.

తన్విత శ్రీ ఏనుకూరులోని ఓ ప్రైవేటు పాఠశాలలో ఎల్‌కేజీ చదువుతోంది. ఆదివారం కావడంతో పాఠశాలకు సెలవు ఉండటంతో చిన్నారి ఇంట్లోనే ఉంది.

ఇంటి ముందు ఉన్న కారులోకి..

ఆదివారం ఉదయం 11 గంటల సమయంలో ఐశ్వర్య ఇంట్లో పని చేసుకుంటున్నారు. ఆ సమయంలో తన్విత శ్రీ ఆడుకుంటూ ఇంటి బయటకు వచ్చింది.

ఇంటి ముందు తమ కారు నిలిపి ఉంది. సరదాగా చిన్నారి ఆ కారులోకి ఎక్కింది.

అయితే అదే సమయంలో కారు డోరు లాక్ అయిపోయింది. దీంతో చిన్నారి లోపలే చిక్కుకుపోయింది.

కారు నుంచి బయటకు రావడానికి చిన్నారి ప్రయత్నించినట్లు తెలుస్తోంది. కానీ డోరు తెరుచుకోకపోవడంతో లోపలే ఉండిపోయింది.

బయట తీవ్రమైన వేడి ఉండటంతో కారు లోపల కూడా వేడి పెరిగింది. మరోవైపు ఊపిరాడక చిన్నారి ఇబ్బందిపడింది.

కొద్దిసేపటికే స్పృహ కోల్పోయింది. అనంతరం ముందు సీటు కింద భాగంలో అచేతనంగా పడిపోయింది.

కనిపించకపోవడంతో కుటుంబంలో ఆందోళన

కొద్దిసేపటి తర్వాత తన్విత శ్రీ కనిపించకపోవడంతో తల్లి ఆందోళన చెందారు.

చిన్నారి ఎక్కడికి వెళ్లిందో తెలియక బంధువులకు, ఇరుగుపొరుగు వారికి సమాచారం ఇచ్చారు.

వెంటనే గ్రామంలో చిన్నారి కోసం వెతకడం మొదలుపెట్టారు. గ్రామంలోని సందుల్లోనూ గాలించారు.

చుట్టుపక్కల ప్రాంతాల్లో కూడా ఆచూకీ కోసం ప్రయత్నించారు. అయినా చిన్నారి కనిపించలేదు.

దీంతో కుటుంబ సభ్యుల్లో ఆందోళన మరింత పెరిగింది.

చివరకు కారులోనే కనిపించిన పాప

చిన్నారి ఇంటి నుంచి బయటకు వెళ్లిన విషయం గుర్తుకు వచ్చింది. దీంతో ఇంటి ముందు నిలిపి ఉంచిన కారుపై కుటుంబ సభ్యులకు అనుమానం వచ్చింది.

వెంటనే కారు లోపల పరిశీలించారు.

అక్కడ ముందు సీటు కింద తన్విత శ్రీ అచేతనంగా పడి ఉండటం కనిపించింది.

దీంతో కుటుంబ సభ్యులు ఒక్కసారిగా షాక్‌కు గురయ్యారు. వెంటనే కారు డోర్లు తెరిచి చిన్నారిని బయటకు తీసుకొచ్చారు.

ఆసుపత్రికి తరలించినా..

అపస్మారక స్థితిలో ఉన్న చిన్నారిని వెంటనే జూలూరుపాడులోని ఓ ప్రైవేటు ఆసుపత్రికి తరలించారు.

అక్కడ వైద్యులు చిన్నారికి చికిత్స అందించారు. అయితే పరిస్థితి విషమంగా ఉండటంతో మెరుగైన వైద్యం కోసం కొత్తగూడెంకు తరలించాలని సూచించారు.

దీంతో కుటుంబ సభ్యులు చిన్నారిని కొత్తగూడెంకు తీసుకెళ్లారు.

అయితే అప్పటికే చిన్నారి మృతి చెందినట్లు వైద్యులు నిర్ధారించారు.

విషాదంలో వినోబానగర్

కంటికి రెప్పలా కాపాడుకున్న కుమార్తె కళ్ల ముందే విగతజీవిగా మారడంతో తల్లిదండ్రులు గుండెలవిసేలా రోదిస్తున్నారు.

నాలుగేళ్ల చిన్నారి మృతితో కుటుంబంలో తీవ్ర విషాదం నెలకొంది.

సర్పంచ్ గంగావతి నవీన్ కుటుంబంలో జరిగిన ఈ విషాద ఘటనతో వినోబానగర్ గ్రామంలోనూ విషాద ఛాయలు అలుముకున్నాయి.

చిన్నారి మృతిని తెలుసుకున్న గ్రామస్థులు కుటుంబ సభ్యులను పరామర్శిస్తున్నారు.

ఆడుకుంటూ ఇంటి ముందు ఉన్న కారులోకి వెళ్లిన చిన్నారి.. అదే కారులో చిక్కుకుని ప్రాణాలు కోల్పోవడం స్థానికులను కలచివేసింది.