కరీంనగర్ గడ్డపై కాషాయ జెండా ఎగరాలి: బండి సంజయ్

కరీంనగర్ గడ్డపై కాషాయ జెండా ఎగరాలి: బండి సంజయ్

కాంగ్రెస్, బీఆర్ఎస్ పార్టీలు తోడు దొంగలు: ఒకరిపై ఒకరు డ్రామాలు

కేంద్ర నిధులతోనే నగరాల అభివృద్ధి – కరీంనగర్‌ను మోడల్ సిటీగా మారుస్తాం

మునిసిపల్ ఎన్నికల ప్రచారంలో కేంద్ర మంత్రి బండి సంజయ్ ఘర్జన

కరీంనగర్, ఫిబ్రవరి 09 (బీఎన్ఎస్): తెలంగాణ రాష్ట్రంలోని మునిసిపాలిటీలు మరియు కార్పొరేషన్ల అభివృద్ధి కేవలం భారతీయ జనతా పార్టీతోనే సాధ్యమని కేంద్ర హోంశాఖ సహాయ మంత్రి బండి సంజయ్ కుమార్ స్పష్టం చేశారు. కరీంనగర్ మునిసిపల్ కార్పొరేషన్ ఎన్నికల ప్రచారంలో భాగంగా భారీ బహిరంగ సభలో ఆయన ప్రసంగించారు. కాంగ్రెస్, బీఆర్ఎస్ పార్టీలు రెండూ ప్రజలను వంచించడంలో పోటీ పడుతున్నాయని, ఈ ఎన్నికల్లో ఆ రెండు పార్టీలకు బుద్ధి చెప్పాలని ఆయన పిలుపునిచ్చారు.

అభివృద్ధి అంతా కేంద్రానిదే.. నగరాల్లో జరుగుతున్న స్మార్ట్ సిటీ పనులు, సిమెంట్ రోడ్లు, డ్రైనేజీ వ్యవస్థలు అన్నీ ప్రధాని నరేంద్ర మోదీ ప్రభుత్వం పంపిన నిధులతోనే జరుగుతున్నాయని బండి సంజయ్ పేర్కొన్నారు. “కేంద్రం వేల కోట్లు ఇస్తుంటే, ఇక్కడి పాలకులు మాత్రం ఆ పనులకు తమ రంగులు వేసుకుని సొమ్ము చేసుకుంటున్నారు. రాష్ట్ర ప్రభుత్వం కనీసం మ్యాచింగ్ గ్రాంట్లు కూడా విడుదల చేయలేని దౌర్భాగ్య స్థితిలో ఉంది” అని ఆయన విమర్శించారు. బీజేపీని గెలిపిస్తే కరీంనగర్ అభివృద్ధికి మరో రూ. 500 కోట్లు కేంద్రం నుంచి తీసుకువచ్చే బాధ్యత తనదని ఆయన హామీ ఇచ్చారు.

కాంగ్రెస్-ఎంఐఎం కుమ్మక్కు రాజకీయం రాబోయే ఎన్నికల్లో బీజేపీని అడ్డుకోవడానికి కాంగ్రెస్ పార్టీ, ఎంఐఎంతో లోపాయికారీ ఒప్పందం చేసుకుందని బండి సంజయ్ సంచలన ఆరోపణలు చేశారు. “ఓట్ల కోసం కాంగ్రెస్ ఎంతకైనా దిగజారుతుంది. ప్రజలారా గమనించండి.. అభివృద్ధి చేసే పార్టీ కావాలో? లేక విభజన రాజకీయాలు చేసే పార్టీ కావాలో తేల్చుకోండి” అని ఆయన అన్నారు. బీఆర్ఎస్ నాయకులు గత పదేళ్లలో నగర సంపదను దోచుకున్నారని, ఇప్పుడు కాంగ్రెస్ అదే బాటలో సాగుతోందని ధ్వజమెత్తారు.

నగరవాసులకు పిలుపు ఫిబ్రవరి 11న జరగబోయే ఎన్నికల్లో ప్రతి ఒక్కరూ కమలం పువ్వు గుర్తుకే ఓటు వేయాలని ఆయన కోరారు. అవినీతి లేని పాలన, నిరంతర అభివృద్ధి కావాలంటే మునిసిపల్ పీఠంపై బీజేపీ కూర్చోవాలని ఆకాంక్షించారు. ఈ సభలో బీజేపీ శ్రేణులు, భారీ సంఖ్యలో ప్రజలు పాల్గొని బండి సంజయ్‌కు ఘనస్వాగతం పలికారు.