పర్యాటక ప్రాంతమైన రుషికొండ బీచ్ సమీపంలో శనివారం ఒక ప్రైవేట్ ట్రావెల్స్ బస్సులో భారీ అగ్నిప్రమాదం సంభవించింది. ప్రయాణికులతో వెళ్తుండగా ఒక్కసారిగా బస్సు టైర్ పేలిపోవడంతో మంటలు చెలరేగి బస్సు పూర్తిగా దగ్ధమైంది.
అతివేగంగా వెళ్తున్న క్రమంలో బస్సు టైర్ ఒక్కసారిగా పేలిపోయింది. ఆ ఘర్షణకు వెలువడిన నిప్పురవ్వలు డీజిల్ ట్యాంక్ లేదా ఇంజిన్ వైపు వ్యాపించడంతో మంటలు క్షణాల్లో బస్సును చుట్టేసాయి. మంటలు గమనించిన డ్రైవర్ అప్రమత్తమై బస్సును నిలిపివేయడంతో ప్రయాణికులందరూ కిందకు దిగిపోయారు. తృటిలో ప్రాణాపాయం తప్పడంతో అందరూ ఊపిరి పీల్చుకున్నారు. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని మంటలను అదుపు చేశారు. అప్పటికే బస్సు పూర్తిగా కాలిపోయి అస్థిపంజరంలా మారింది.ఈ ప్రమాదంతో రుషికొండ బీచ్ రోడ్డులో కాసేపు ట్రాఫిక్కు అంతరాయం ఏర్పడింది. పోలీసులు కేసు నమోదు చేసి దర్యాప్తు చేస్తున్నారు.