శంషాబాద్ సమీపంలోని పెద్దగోల్కొండ వద్ద జరిగిన ప్రమాదం
మృతుడు అక్కడికక్కడే మృతి.. మహిళతో పాటు బాలుడికి గాయాలు, కేసు నమోదు చేసిన పోలీసులు
హైదరాబాద్: ఔటర్ రింగ్ రోడ్ (ORR)పై సోమవారం ఉదయం ఘోర రోడ్డు ప్రమాదం జరిగింది. శంషాబాద్ సమీపంలోని పెద్దగోల్కొండ వద్ద ఎగ్జిట్ నంబర్-15 దగ్గర కారు లారీని వెనుక నుంచి ఢీకొనడంతో ఒక వ్యక్తి మృతి చెందగా, మహిళతో పాటు మరో ఇద్దరు గాయపడ్డారు.
సమాచారం ప్రకారం, కారు తుక్కుగూడ నుంచి శంషాబాద్ వైపు వెళ్తుండగా, ముందుగా వెళ్తున్న లారీని ORR పై వెనుక నుంచి బలంగా ఢీకొట్టింది. ఢీకొన్న ప్రభావానికి కారు ముందు భాగం పూర్తిగా ధ్వంసమైంది.
ప్రమాదంలో కారులో ఉన్న ఓ పురుషుడు అక్కడికక్కడే మృతి చెందాడు. ఓ మహిళ తీవ్రంగా గాయపడగా, కారు డ్రైవర్తో పాటు ఓ బాలుడికి కూడా గాయాలయ్యాయి.
సమాచారం అందుకున్న స్థానిక పోలీసులు, 108 అంబులెన్స్ సిబ్బంది వెంటనే ఘటనాస్థలికి చేరుకున్నారు. క్షతగాత్రులను సమీపంలోని ప్రైవేట్ ఆస్పత్రికి తరలించి చికిత్స అందిస్తున్నారు. వారి ఆరోగ్య పరిస్థితిపై అధికారులు ఇంకా అధికారిక సమాచారం వెల్లడించలేదు.
ప్రమాదానికి గురైన వాహనాలను పోలీసులు తొలగించి ORRపై ట్రాఫిక్ను సాధారణ స్థితికి తీసుకొచ్చారు.
ఈ ఘటనపై పోలీసులు కేసు నమోదు చేసి ప్రమాదానికి గల కారణాలపై దర్యాప్తు చేస్తున్నారు. మృతుడు, గాయపడిన వారి వివరాలు ఇంకా తెలియాల్సి ఉంది.