పాఠశాలలో అవమానించారని సూసైడ్ నోట్లో ఆరోపణ
ఉపాధ్యాయుల ప్రవర్తనపై కుటుంబ సభ్యుల ఆవేదన.. కేసు నమోదు చేసి దర్యాప్తు ప్రారంభించిన పోలీసులు
బెంగళూరులో విషాద ఘటన
బెంగళూరు: కర్ణాటకలోని బెంగళూరు అర్బన్ జిల్లా అనేకల్ తాలూకా మరసూరు గ్రామంలో హృదయ విదారక ఘటన చోటుచేసుకుంది. ప్రభుత్వ హయ్యర్ ప్రైమరీ పాఠశాలలో 8వ తరగతి చదువుతున్న ఓ విద్యార్థిని బలవన్మరణానికి పాల్పడింది. గురువారం రాత్రి తన ఇంట్లో ఉరి వేసుకుంది. శుక్రవారం ఉదయం కుటుంబ సభ్యులు గుర్తించడంతో ఈ ఘటన వెలుగులోకి వచ్చింది. సమాచారం అందుకున్న పోలీసులు వెంటనే అక్కడికి చేరుకుని దర్యాప్తు ప్రారంభించారు.
సూసైడ్ నోట్లో ఏముంది?
పోలీసుల వివరాల ప్రకారం.. ఆత్మహత్యకు ముందు బాలిక తన చేతిరాతతో సూసైడ్ నోట్ రాసి పెట్టింది. అందులో పాఠశాలలో రూ.20, రూ.10 దొంగతనం చేసినట్లు తనపై తప్పుడు ఆరోపణలు చేశారని పేర్కొంది.
తాను చేయని తప్పుకు నింద వేయడంతో తీవ్ర మనస్తాపానికి గురయ్యానని వివరించింది. ఉపాధ్యాయులు అందరి ముందూ మందలించారని, అవమానించారని రాసింది. ఆ అవమానాన్ని తట్టుకోలేక ఈ నిర్ణయం తీసుకున్నానని తెలిపింది.
తల్లికి, తోబుట్టువులకు క్షమాపణలు
సూసైడ్ నోట్లో తన తల్లి, తోబుట్టువులకు బాలిక పలుమార్లు క్షమాపణలు చెప్పింది. తాను ఇక జీవించడానికి అర్హురాలిని కాదని ఆవేదన వ్యక్తం చేసింది.
తన మరణానికి తల్లికి ఎలాంటి సంబంధం లేదని స్పష్టం చేసింది. ఈ నిర్ణయం పూర్తిగా తనదేనని లేఖలో రాసింది.
కుటుంబ సభ్యుల ఆరోపణలు
బాలిక కుటుంబ సభ్యులు పాఠశాల ఉపాధ్యాయులపై తీవ్ర ఆరోపణలు చేస్తున్నారు. క్లాస్రూమ్లో అందరి ముందూ మందలించడం, అవమానించడం వల్లే తమ కుమార్తె తీవ్ర నిర్ణయం తీసుకుందని చెబుతున్నారు.
బాలిక చర్మ సంబంధిత వ్యాధితో ఆసుపత్రిలో చికిత్స పొందుతున్న తల్లి మీడియాతో మాట్లాడారు. ఇంట్లో ఎలాంటి సమస్యలు లేవని చెప్పారు. ఏదైనా ఇబ్బంది ఉంటే తనతో చెప్పేదని తెలిపారు.
అయితే పాఠశాలలో కొందరు ఉపాధ్యాయులు తన కుమార్తెను ఇబ్బంది పెట్టారని మాత్రమే తెలిసిందన్నారు. వారు ఎవరో మాత్రం తనకు తెలియదని కన్నీటి పర్యంతమయ్యారు.
పోలీసుల దర్యాప్తు కొనసాగుతోంది
ఈ ఘటనపై సూర్యనగర్ పోలీస్ స్టేషన్లో కేసు నమోదు చేశారు. బాలిక రాసిన సూసైడ్ నోట్ను పోలీసులు స్వాధీనం చేసుకున్నారు. అందులోని వివరాలను పరిశీలిస్తున్నారు.
పాఠశాలలో బాలికను అవమానించినట్లు ఆరోపణలు ఎదుర్కొంటున్న ఉపాధ్యాయులు ఎవరనే అంశంపై దర్యాప్తు సాగుతోంది.
బాలిక మరణానికి దారితీసిన పరిస్థితులను అన్ని కోణాల్లో పరిశీలిస్తున్నట్లు పోలీసులు తెలిపారు. దర్యాప్తు పూర్తైన తర్వాత తదుపరి చర్యలు తీసుకోనున్నారు.