రాజకీయాల్లో ఎదిగింది కులం ఆధారంగా కాదు.. ప్రజా ఉద్యమాలతో
ఆంధ్రప్రదేశ్ రాజకీయాలలో తనకంటూ ఒక ప్రత్యేకమైన అధ్యాయాన్ని రాసుకున్న నాయకుడు Mudragada Padmanabham. ఆయన మరణం తర్వాత మీడియా, సోషల్ మీడియాలలో చాలామంది ఆయనను కేవలం ఒక కాపు వర్గ నేతగానే ఎక్కువగా చిత్రీకరించారు. కానీ అది పూర్తిగా వాస్తవం కాదు. ముద్రగడ పద్మనాభం రాజకీయాల్లోకి వచ్చింది, రాష్ట్ర స్థాయి నాయకుడిగా ఎదిగింది ఏనాడూ కులం కార్డుతో కాదు. రాజకీయాల్లో శిఖరాలను అధిరోహించిన తర్వాతే ఆయన కాపు ఉద్యమ బాధ్యతలను భుజాన వేసుకున్నారు, చివరి దశలో దాని నుంచి స్వచ్ఛందంగా తప్పుకున్నారు కూడా.
Mudragada Padmanabham రాజకీయ వారసత్వం ఆయన తండ్రి వీర రాఘవరావు నుంచి అందింది. 60వ దశకంలోనే వీర రాఘవరావు రెండుసార్లు ఎమ్మెల్యేగా పనిచేసి, ఉభయ గోదావరి జిల్లాలలో ఒక తిరుగులేని రెబల్ నేతగా పేరు తెచ్చుకున్నారు. అప్పటి కాంగ్రెస్ దిగ్గజాలను సైతం ఎదురొడ్డి నిలిచిన వీర రాఘవరావు వారసుడిగా రాజకీయాల్లోకి వచ్చిన పద్మనాభం, తండ్రికి తగ్గ తనయుడిగా నిలిచారు. పాలకుల తప్పులను నిలదీసే విషయంలో ఆయన ఎన్నడూ, ఎవరికీ తలవంచలేదు. నిక్కచ్చిగా మాట్లాడటం, ప్రజల పక్షాన నిలబడటమే ఆయన నైజం.
మంత్రి గా విప్లవాత్మక నిర్ణయాలు
Mudragada Padmanabham తన రాజకీయ జీవితంలో రెండుసార్లు మంత్రిగా పనిచేసి పాలనలో చెరగని ముద్ర వేశారు. ముఖ్యంగా రవాణా శాఖ మంత్రిగా ఉన్నప్పుడు ఆయన చేపట్టిన సంస్కరణలు ఇప్పటికీ ఉదాహరణగా చెప్పుకుంటారు. అంతకుముందు ఆర్టీసీలో కండక్టర్, డ్రైవర్ ఉద్యోగాలను కొందరు రాజకీయ నాయకులు పంచుకుని అమ్ముకునే సంస్కృతి ఉండేది. కానీ ముద్రగడ మంత్రి కాగానే ఆ పద్ధతికి పూర్తిగా స్వస్తి పలికారు. ఎలాంటి సిఫార్సులు లేకుండా, కేవలం మెరిట్ ప్రాతిపదికన మాత్రమే నియామకాలు జరిపి ఎంతోమంది పేద యువతకు ఉద్యోగాలు కల్పించారు.
ముద్రగడ పద్మనాభంకు అపారమైన ప్రజాదరణ ఉండేది. ఉమ్మడి ఆంధ్రప్రదేశ్లో మాజీ ముఖ్యమంత్రి ఎన్టీఆర్ ప్రభంజనం బలంగా సాగుతున్న సమయంలోనే, ఆయనతో విభేదించి ప్రభుత్వం నుంచి ధైర్యంగా బయటకు వచ్చేశారు. ఆ తర్వాత భారీ బహిరంగ సభలను నిర్వహించి నాటి అధికార పార్టీకి సైతం గట్టి సవాల్ విసిరారు. పదవుల కంటే ప్రజాభిప్రాయానికే ఆయన ఎల్లప్పుడూ ప్రథమ ప్రాధాన్యతను ఇచ్చారు.
పంచిపెట్టే నాయకుడు
వాస్తవానికి ముద్రగడ కుటుంబానికి దళిత, బీసీ వర్గాల మద్దతు చాలా బలంగా ఉండేది. ఆయన నాలుగు సార్లు ఎమ్మెల్యేగా ఘన విజయం సాధించారంటే దానికి కారణం ఈ బహుజన ఓటు బ్యాంకే. సమాజంలోని అన్ని వర్గాల ప్రజలు ఆయనను తమ సొంత నాయకుడిగా భావించేవారు. అయితే తర్వాతి కాలంలో తన సొంత సామాజిక వర్గానికి మేలు చేయాలనే ఆరాటంతో ఆయన కాపు ఉద్యమాల్లో చురుగ్గా పాల్గొనడం వల్ల, ఈ పాత ఓటు బ్యాంకు కొంతవరకు దూరమైందనే చెప్పాలి. మెట్ట సీమ రాజకీయాల్లో ఆయన ఎందరో యువకులను ప్రోత్సహించి నాయకులుగా తీర్చిదిద్దారు.
నేటి రోజుల్లో రాజకీయాల్లోకి వచ్చి కోట్లాది రూపాయల ఆస్తులను సంపాదించే నాయకులను మనం చూస్తుంటాం. కానీ రాజకీయాల కోసం, ప్రజా పోరాటాల కోసం తన సొంత ఆస్తులను పోగొట్టుకున్న అరుదైన నాయకులలో ముద్రగడ పద్మనాభం ఒకరు. అనేక రాజకీయ పోరాటాలు, సుదీర్ఘ ఉద్యమాల నిర్వహణ కోసం తన ఇంట్లో ఉన్న ఆస్తులను, సొమ్మును నిస్వార్థంగా ఖర్చు చేసేశారు. ఆస్తిపాస్తులు కరిగిపోయినా ఆయన ఏనాడూ బాధపడలేదు.
వివాదాస్పద నిర్ణయాలు
తరచూ పార్టీ మారడం ముద్రగడను వివాదాల్లోకి నెట్టింది. జనతా పార్టీ తెలుగుదేశం కాంగ్రెస్ బిజెపి మళ్లీ తెలుగుదేశం ఇలా రకరకాల పార్టీలు మారారు. తర్వాత కాలంలో కాపు ఉద్యమం చేపట్టి ఇతర సామాజిక వర్గాలను దూరం చేసుకున్నారు. వైసీపీలో ఉండగా జనసేన మీద విమర్శలు చేసి కాపుల్లో కూడా శత్రువుల్ని తయారు చేసుకున్నారు. రాజకీయ జీవితం చివర్లో పేరు మార్చుకుంటానని చాలెంజ్ చేసి ముద్రగడ పద్మనాభ రెడ్డి గా గెజిట్ వేయించుకున్నారు.
స్వగ్రామం లోనే పూర్తి జీవితం
రాజకీయాల్లో పదవులు అనుభవించిన చాలామంది నేతలు నగరాలకు వలస వెళ్లి స్థిరపడిపోతే, ముద్రగడ మాత్రం చివరివరకు తన స్వగ్రామమైన కిర్లంపూడి లోనే నివసించారు. నిత్యం ప్రజలకు అందుబాటులో ఉంటూ, ఒక అసలైన ప్రజా నాయకుడిగా సామాన్య జీవితాన్ని గడిపారు. ఆయన నిస్వార్థ సేవ, నైతిక విలువలతో కూడిన రాజకీయం ఆంధ్రప్రదేశ్ చరిత్రలో ఎప్పటికీ ఒక వెలుగుచుక్కలా నిలిచి ఉంటుంది.