మతం అడిగి విచక్షణారహితంగా కత్తిపోట్లు పొడిచిన నిందితుడు
తీవ్ర గాయాలతో ఆసుపత్రిలో చికిత్స పొందుతున్న భారత సంతతి వ్యక్తి
ఉటా: అమెరికాలోని ఉటా రాష్ట్రంలోని Valley Fair Mallలో భారత సంతతికి చెందిన ముస్లిం ఉద్యోగిపై జరిగిన కత్తి దాడి కలకలం రేపింది. ఈ ఘటనలో తీవ్రంగా గాయపడిన సయ్యద్ సోహైల్ ఉద్దీన్ ఆసుపత్రిలో చికిత్స పొందుతున్నారు.
మతం గురించి ప్రశ్నించిన తర్వాత దాడి
కోర్టు పత్రాల ప్రకారం, 48 ఏళ్ల పీటర్ మైఖేల్ లార్సెన్ సోమవారం సాయంత్రం మాల్లోని కియోస్క్ వద్ద పనిచేస్తున్న సోహైల్ ఉద్దీన్ వద్దకు వెళ్లాడు.
ముందుగా ఆయన ఎక్కడి వ్యక్తి, పేరు ఏమిటి, ముస్లింనా అని ప్రశ్నించినట్లు బాధితుడి సహోద్యోగి లూనా నునెజ్ తెలిపారు.
ఆ వెంటనే కత్తి తీసి పలుమార్లు విచక్షణారహితంగా దాడి చేశాడు.
స్థానికుల ధైర్యంతో అదుపులోకి
దాడి జరుగుతున్న సమయంలో అక్కడే ఉన్న పలువురు వెంటనే స్పందించి నిందితుడిని నేలకూల్చి ఆయుధాన్ని లాక్కొన్నారు.
వారి ధైర్యసాహసంతో మరింత పెద్ద ప్రమాదం తప్పిందని అధికారులు తెలిపారు.
ప్రాణాపాయ స్థితిలో బాధితుడు
భారత సంతతికి చెందిన సోహైల్ ఉద్దీన్ శరీరంలోని పలు భాగాల్లో తీవ్ర గాయాలు అయ్యాయని ఆయన యజమాని, కుటుంబ స్నేహితుడు అద్నాన్ మహమ్మద్ తెలిపారు.
గుండె పరిస్థితిని వైద్య బృందం నిరంతరం పర్యవేక్షిస్తోందని, ఆయన ప్రాణాలతో బయటపడటం అద్భుతమేనని పేర్కొన్నారు.
ముస్లింలను చంపాలనే ఉద్దేశం
పోలీసుల విచారణలో పీటర్ మైఖేల్ లార్సెన్ సంచలన విషయాలు వెల్లడించినట్లు కోర్టు పత్రాల్లో పేర్కొన్నారు.
తాను ముస్లింలను హత్య చేయాలనే ఉద్దేశంతోనే ఈ దాడి చేసినట్లు ఒప్పుకున్నాడని అధికారులు తెలిపారు.
అతని తీవ్రవాద భావజాలం, హింసాత్మక చర్యలను దృష్టిలో ఉంచుకుని బెయిల్ ఇవ్వకూడదని పోలీసులు కోర్టును కోరారు.
సమాజంలో ఆందోళన
ఈ ఘటన స్థానిక ముస్లిం సమాజంలో తీవ్ర ఆందోళనకు దారితీసింది.
సోహైల్ ఉద్దీన్ పనిచేసే ప్రాంతంలో భద్రతపై భయం నెలకొందని ఆయన యజమాని తెలిపారు.
తన పిల్లల భద్రత గురించి కూడా ఆందోళనగా ఉందని చెప్పారు.
ముస్లింలపై వేధింపులు పెరిగినట్లు ఆందోళన
సోహైల్ ఉద్దీన్ ప్రార్థనలు చేసే Utah Islamic Centre ఇమామ్ షుఐబ్ దిన్ మాట్లాడుతూ, గత కొన్నేళ్లుగా ముస్లింలపై బెదిరింపులు, వేధింపులు, హింసాత్మక ఘటనలు పెరిగాయని తెలిపారు.
అయితే తమ రాష్ట్ర చరిత్రలో ముస్లిం సమాజ సభ్యుడిపై జరిగిన అత్యంత దారుణమైన దాడి ఇదేనని ఆయన పేర్కొన్నారు.
కుటుంబాన్ని ఎంతో ప్రేమించే వ్యక్తి
సహోద్యోగుల మాటల్లో సోహైల్ ఉద్దీన్ ఎప్పుడూ చిరునవ్వుతో ఉండే వ్యక్తి. ఉద్యోగులకు ఏదైనా ఇబ్బంది ఎదురైతే ముందుగా అండగా నిలిచేవారని తెలిపారు.
తన భార్య, ఇద్దరు చిన్నారుల గురించి ఎప్పుడూ ప్రేమగా మాట్లాడేవారని సహోద్యోగులు గుర్తుచేసుకున్నారు.