మైసూరులో స్వామి వివేకానంద కల్చరల్ యూత్ సెంటర్.. ప్రారంభించనున్న ప్రధాని మోదీ

విద్యార్థులు, యువతలో నాయకత్వ లక్షణాల అభివృద్ధే లక్ష్యం

81,000 చదరపు అడుగుల విస్తీర్ణంలో కేంద్రం.. 10 వేల మందికి ప్రయోజనం

బెంగళూరు: ప్రధానమంత్రి నరేంద్ర మోదీ శనివారం మైసూరులో పర్యటించనున్నారు. శ్రీ రామకృష్ణ ఆశ్రమంలో నిర్మించిన స్వామి వివేకానంద కల్చరల్ యూత్ సెంటర్ – Viveka Smaraka ను ఆయన ప్రారంభించనున్నారు.

మధ్యాహ్నం 3.30 గంటలకు ప్రారంభ కార్యక్రమం జరగనుంది. అనంతరం అక్కడ జరిగే సభలో ప్రధాని మోదీ ప్రసంగిస్తారని అధికారులు తెలిపారు.

స్వామి వివేకానంద మైసూరు పర్యటనకు గుర్తుగా

అధికారిక ప్రకటన ప్రకారం.. స్వామి వివేకానంద 1892 నవంబర్‌లో మైసూరుకు వచ్చిన సందర్భాన్ని గుర్తు చేసుకుంటూ ఈ వివేక స్మారకాన్ని ఏర్పాటు చేశారు. అప్పట్లో ఆయన దేశవ్యాప్తంగా పర్యటిస్తున్న సమయంలో మైసూరుకు వచ్చారు.

మైసూరులో ఉన్న సమయంలో వివేకానంద ఉపన్యాసాలు ఇచ్చారు.

పండితులు, భక్తులతో సమావేశమయ్యారు. అప్పటి మహారాజా శ్రీ చామరాజేంద్ర వడియార్ X ఆయనకు అండగా నిలిచారు.

ఆ సహకారం వల్లే 1893లో చికాగోలో జరిగిన పార్లమెంట్ ఆఫ్ రిలిజన్స్కు వివేకానంద వెళ్లేందుకు మార్గం సుగమమైంది.

81,000 చదరపు అడుగుల విస్తీర్ణంలో కేంద్రం

చారిత్రక నిరంజన మఠం వద్ద వివేక స్మారకాన్ని నిర్మించారు. ఈ కేంద్రం మొత్తం 81,000 చదరపు అడుగులకు పైగా నిర్మిత ప్రాంతంలో ఉంది. ఇందులో ప్రధాన భవనంతో పాటు మరో అనుబంధ భవనం ఉంది.

కేంద్రంలో 4-D ఎక్స్‌పీరియన్స్ సెంటర్, ఎగ్జిబిషన్ హాల్, సుమారు 700 మంది కూర్చునే సామర్థ్యంతో యాంఫిథియేటర్, తరగతి గదులు, కాన్ఫరెన్స్ రూమ్స్ ఉన్నాయి. లైబ్రరీ, రీడింగ్ రూమ్, మెడిటేషన్, యోగా హాల్, బుక్ స్టాల్ కూడా ఏర్పాటు చేశారు.

పోటీ పరీక్షలకు సిద్ధమయ్యే విద్యార్థులకు ప్రత్యేక సదుపాయాలు

పోటీ పరీక్షలకు సిద్ధమవుతున్న విద్యార్థుల కోసం ప్రత్యేక సదుపాయాలను కూడా కేంద్రంలో ఏర్పాటు చేశారు.

స్వామి వివేకానంద జీవితం, ఆయన సందేశం, ఆదర్శాలను యువతకు పరిచయం చేయడంతో పాటు విలువలతో కూడిన విద్య, నాయకత్వ అభివృద్ధి, వ్యక్తిత్వ వికాసానికి ఈ కేంద్రం ఉపయోగపడుతుందని అధికారులు తెలిపారు.

10 వేల మందికి పైగా యువతకు ప్రయోజనం

సమీపంలోని విద్యాసంస్థల్లో చదువుతున్న విద్యార్థులతో పాటు పట్టణ, గ్రామీణ ప్రాంతాల యువతకు ఈ కేంద్రం ఉపయోగపడనుంది.

10,000 మందికి పైగా విద్యార్థులు, యువత ప్రయోజనం పొందే అవకాశం ఉందని అధికారిక ప్రకటన తెలిపింది.

స్వామి వివేకానంద ఆలోచనల్లోని దేశ నిర్మాణం, వ్యక్తిత్వ వికాస స్ఫూర్తితో ఉపన్యాసాలు, వర్క్‌షాప్‌లు, స్వల్పకాలిక కోర్సులు, నైపుణ్యాభివృద్ధి కార్యక్రమాలు నిర్వహించనున్నారు.