56.10 అడుగులకు చేరిన నీటిమట్టం
రాకపోకలకు అంతరాయం.. లోతట్టు ప్రాంతాల్లోకి వరద నీరు
కొత్తగూడెం: భద్రాచలం వద్ద Godavari నది నీటిమట్టం 53 అడుగులు దాటడంతో శనివారం మూడో ప్రమాద హెచ్చరిక జారీ చేశారు. ఉదయం 11 గంటలకు గోదావరి నీటిమట్టం 56.10 అడుగులకు చేరింది. 15.96 లక్షల క్యూసెక్కుల వరద ప్రవాహం నమోదైంది.
వరద ఉద్ధృతి పెరగడంతో గోదావరి తీరంలోని పలు మండలాల్లో రాకపోకలకు అంతరాయం ఏర్పడింది. లోతట్టు గ్రామాల్లోకి వరద నీరు చేరుతోంది.
ప్రధాన రహదారులపై నిలిచిపోయిన రాకపోకలు
తురుబాక వద్ద వరద నీరు ప్రధాన రహదారిపైకి చేరడంతో భద్రాచలం నుంచి దుమ్ముగూడెం, చర్ల మండలాలకు వెళ్లే రహదారిలో రాకపోకలు పూర్తిగా నిలిచిపోయాయి.
భద్రాచలం నుంచి ఆంధ్రప్రదేశ్లోని చింతూరు, కూనవరం, వీఆర్ పురం మండలాలను కలిపే ప్రధాన రహదారిపై మురుమూరు వద్ద వరద నీరు చేరింది. దీంతో ఆయా మండలాలకు రాకపోకలు నిలిచిపోయాయి.
వరద పరిస్థితిని పరిశీలించిన కలెక్టర్
భద్రాచలంలో శనివారం ఉదయం జిల్లా కలెక్టర్ అంకిత్ గోదావరి స్నానఘాట్లు, వరద కట్ట ప్రాంతం, భద్రాచలం–కూనవరం ప్రధాన రహదారిపై వరద పరిస్థితిని పరిశీలించారు.
గోదావరి వరద కట్ట సమీపంలో కూనవరం రహదారిపై తాత్కాలిక అడ్డుకట్ట ఏర్పాటు చేశారు. వరద నీరు పట్టణంలోకి రాకుండా ఈ చర్యలు తీసుకున్నారు.
పంట పొలాల్లోకి చేరిన వరద నీరు
మరోవైపు కూనవరం రోడ్డుపై కొత్తగా నిర్మించిన వరద కట్టలోని స్లూయిస్ల నుంచి నీరు లీక్ కావడంతో వ్యవసాయ పొలాల్లోకి గోదావరి వరద నీరు చేరిందని రైతులు తెలిపారు.
శాంతినగర్ కాలనీకి చెందిన రైతులు ఈ సమస్యను పరిష్కరించాలని నీటిపారుదల శాఖను సంప్రదించారు.
వరదల సమయంలో ఉపయోగించేందుకు అంటూ నీటిపారుదల శాఖ అధికారులు మూడు రోజుల పాటు ఇసుకను తరలించారని స్థానికులు తెలిపారు. ఇసుక బస్తాలు అందిస్తామని తొలుత అధికారులు హామీ ఇచ్చినా తర్వాత చర్యలు తీసుకోలేదని చెప్పారు. దీంతో వరద నీరు పంట పొలాల్లోకి చేరిందని రైతులు ఆవేదన వ్యక్తం చేశారు.
నీటిపారుదల శాఖ అధికారులు వెంటనే స్పందించకపోతే కూనవరం రోడ్డు ప్రాంతం నుంచి ఇసుక తరలిస్తున్న వాహనాలను అడ్డుకుంటామని రైతులు హెచ్చరించారు.
అప్రమత్తంగా ఉండాలని అధికారులకు ఆదేశాలు
భద్రాచలంలోని Godavari స్నానఘాట్లు, వరద కట్ట ప్రాంతం, భద్రాచలం–కూనవరం ప్రధాన రహదారిపై పరిస్థితిని కలెక్టర్ అంకిత్ పరిశీలించారు. అధికారులు అప్రమత్తంగా ఉండాలని, సమన్వయంతో పనిచేయాలని ఆదేశించారు.
వరద ముప్పు ఉన్న గ్రామాల ప్రజలు ఆలస్యం చేయకుండా పునరావాస కేంద్రాలకు తరలివెళ్లాలని కలెక్టర్ సూచించారు. ప్రాణాలకు ప్రమాదం కలగకుండా అధికారుల సూచనలను తప్పనిసరిగా పాటించాలని చెప్పారు.
పునరావాస కేంద్రాలకు వెళ్లే సమయంలో మందులు, తాగునీరు, ముఖ్యమైన పత్రాలు, ఇతర అవసరమైన వస్తువులను వెంట తీసుకెళ్లాలని ఆయన సూచించారు.