సాధారణంగా ఆక్సిజన్ను వైద్య చికిత్సలో భాగంగా చూస్తాం.
అయితే ఆక్సిజన్కు ఫ్లేవర్లు జోడించి.. మానసిక ఉల్లాసం కోసం అందిస్తే ఎలా ఉంటుంది? మహారాష్ట్రలోనిNagpur లోని ఓ ఆసుపత్రి ఇదే ఆలోచనతో కొత్త ప్రయోగానికి శ్రీకారం చుట్టింది.
‘ఆక్సిబార్’ పేరుతో ఫ్లేవర్డ్ ఆక్సిజన్ సెషన్లను అందుబాటులోకి తీసుకొచ్చింది.
దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.
నాగ్పూర్లో ‘ఆక్సిబార్’
నాగ్పూర్లోని అనంత సూపర్ స్పెషాలిటీ ఆసుపత్రిలో ఈ వినూత్న ‘ఆక్సిబార్’ను ఏర్పాటు చేశారు.
నగరంలో ఇలాంటి కాన్సెప్ట్ ఇదే మొదటిదని ఆసుపత్రి ప్రతినిధులు చెబుతున్నారు.
డాక్టర్ విక్రాంత్ దేశ్ముఖ్ ఆలోచనతో దీన్ని ప్రారంభించినట్లు ఓ వీడియోలో మహిళా ప్రతినిధి వివరించారు.
ఇక్కడ నాలుగు రకాల ఫ్లేవర్లలో ఆక్సిజన్ సెషన్లు అందిస్తున్నట్లు తెలిపారు.
ఈ ప్రక్రియలో అరోమాథెరపీతో పాటు డీప్ బ్రీతింగ్ కూడా ఉంటుందని చెప్పారు.
అయితే ఇది వైద్య చికిత్స కాదని.. కేవలం రిఫ్రెషింగ్ అనుభవం కోసం ఏర్పాటు చేసిన సెషన్ అని స్పష్టం చేశారు.
కాఫీ బ్రేక్లా ‘ఆక్సిజన్ బ్రేక్’
కాఫీ బ్రేక్ తీసుకున్నప్పుడు మనసు కాస్త తేలికపడినట్లు.. ఈ ఆక్సిజన్ సెషన్ కూడా మానసిక చురుకుదనం, మూడ్ను మెరుగుపరచడంలో సహాయపడుతుందని నిర్వాహకులు చెబుతున్నారు.
సెషన్లో భాగంగా గ్రీన్ టీ కూడా అందిస్తున్నారు.
పరిశుభ్రతకు ప్రాధాన్యత ఇస్తున్నామని ఆసుపత్రి ప్రతినిధులు తెలిపారు.
ప్రతి వ్యక్తికి ఒకసారి మాత్రమే ఉపయోగించే నాసల్ ప్రాంగ్స్ను అందిస్తున్నట్లు చెప్పారు.
‘నాన్ఖటాయ్ ఫ్లేవర్ ఉందా?’.. నెటిజన్ల కామెంట్లు
‘ఆక్సిబార్’కు సంబంధించిన ఇన్స్టాగ్రామ్ వీడియో ప్రస్తుతం ఆన్లైన్లో చర్చనీయాంశంగా మారింది.
కొందరు దీన్ని ప్రయత్నించామని, అనుభవం చాలా ఆహ్లాదకరంగా ఉందని కామెంట్లు చేశారు. మరికొందరు మాత్రం సరదాగా స్పందించారు.
అందుబాటులో ఉన్న ఫ్లేవర్ల గురించి ఓ నెటిజన్ “నాన్ఖటాయ్ ఫ్లేవర్ ఉందా?” అని అడిగారు. ఈ కామెంట్ బాగా వైరల్ అయింది.
మరికొందరు నికోటిన్, రజనీగంధ, క్లోవ్మిక్స్ వంటి ఫ్లేవర్లను ప్రస్తావిస్తూ ఫన్నీ కామెంట్లు చేశారు.
మొత్తంగా నాగ్పూర్లోని ఈ ఫ్లేవర్డ్ ఆక్సిజన్ కాన్సెప్ట్ సోషల్ మీడియాలో నెటిజన్ల దృష్టిని ఆకర్షిస్తోంది.
నిర్వాహకులు మాత్రం దీన్ని వైద్య చికిత్సగా కాకుండా వెల్నెస్, రిఫ్రెషింగ్ అనుభవంగా చెబుతున్నారు.