వెర్సోవా–మధ్ ఐలాండ్ మధ్య కనెక్టివిటీ
ముంబైలో ట్రాఫిక్ సమస్యలకు చెక్ పెట్టేందుకు బృహన్ ముంబై మున్సిపల్ కార్పొరేషన్ (బీఎంసీ) మరో భారీ మౌలిక సదుపాయాల ప్రాజెక్టుకు సిద్ధమైంది.
వెర్సోవా, మధ్ ఐలాండ్ ప్రాంతాలను కలుపుతూ మలాడ్ క్రీక్‌పై రూ.2,395 కోట్ల అంచనా వ్యయంతో కేబుల్-స్టేయ్డ్ బ్రిడ్జ్ నిర్మించనుంది.
ఈ వంతెన అందుబాటులోకి వస్తే ప్రస్తుతం 60 నుంచి 90 నిమిషాలు పడుతున్న ప్రయాణ సమయం కేవలం 10 నిమిషాలకు తగ్గనుంది.
ప్రస్తుతం 18-20 కిలోమీటర్లు చుట్టూ ప్రయాణం
వెర్సోవా, మధ్ ఐలాండ్ మధ్య ప్రస్తుతం నేరుగా రోడ్డు కనెక్టివిటీ లేదు. మలాడ్ క్రీక్ కారణంగా ఈ రెండు ప్రాంతాలు వేరుగా ఉన్నాయి.
దీంతో రోడ్డు మార్గంలో వెళ్లాలంటే సుమారు 18 నుంచి 20 కిలోమీటర్లు చుట్టూ తిరిగి ప్రయాణించాలి.
ట్రాఫిక్ పరిస్థితిని బట్టి గంట నుంచి గంటన్నర వరకు సమయం పడుతోంది.
ఈ ప్రాంతాల మధ్య జెట్టీ సర్వీసు ఉన్నప్పటికీ, అది ఏడాది పొడవునా అందుబాటులో ఉండదు.
‘ది ఇండియన్ ఎక్స్‌ప్రెస్’ కథనం ప్రకారం.. ఈ సర్వీసు ఏడాదిలో కేవలం ఎనిమిది నెలలు మాత్రమే నడుస్తుంది.
వర్షాకాలంలో భద్రతా కారణాలతో సర్వీసును నిలిపివేస్తారు. పరిమిత సమయాల్లో మాత్రమే నడిచే జెట్టీ రోజువారీ ప్రయాణికుల అవసరాలను పూర్తిగా తీర్చలేకపోతోంది.
నాలుగు లేన్లతో భారీ వంతెన
బీఎంసీ ప్రణాళిక ప్రకారం ఈ వంతెన 2.06 కిలోమీటర్ల పొడవుతో నిర్మించనున్నారు.
భవిష్యత్తులో పెరిగే ట్రాఫిక్‌ను దృష్టిలో పెట్టుకుని నాలుగు లేన్లుగా నిర్మించనున్నారు.
వాహనాల కోసం రహదారితో పాటు పాదచారులు, సైక్లిస్టుల కోసం ప్రత్యేక మార్గాలు ఏర్పాటు చేయనున్నారు.
వంతెనపై ప్రత్యేక లైటింగ్, అత్యవసర సౌకర్యాలు కూడా అందుబాటులో ఉంటాయి.
వంతెన పూర్తయితే ప్రయాణ సమయం భారీగా తగ్గుతుంది. మధ్ ఐలాండ్ ప్రజలకు విద్య, వైద్యం వంటి ముఖ్యమైన సేవలు కూడా మరింత సులభంగా అందుబాటులోకి వస్తాయి.
హైకోర్టు అనుమతుల కోసం ఎదురుచూపులు
ఈ ప్రాజెక్టుకు సంబంధించి బీఎంసీ ఇప్పటికే ప్రాథమిక పనులు ప్రారంభించింది.
సాయిల్ టెస్టింగ్, స్టేషన్ సర్వేలు వంటి పనులను పూర్తి చేసింది. అయితే ప్రధాన సివిల్ నిర్మాణ పనులు ప్రారంభించాలంటే బాంబే హైకోర్టు నుంచి తుది అనుమతులు రావాల్సి ఉంది.
పర్యావరణ అనుమతులకు సంబంధించిన కేసుపై సెప్టెంబర్ నాటికి తుది విచారణ జరిగే అవకాశం ఉందని భావిస్తున్నారు.
కోర్టు అనుమతులు వచ్చిన వెంటనే వర్షాకాలం ముగిసిన తర్వాత నిర్మాణ పనులు ప్రారంభించాలని బీఎంసీ లక్ష్యంగా పెట్టుకుంది.
అన్నీ ప్రణాళిక ప్రకారం జరిగితే 2029 నాటికి వంతెనను ప్రజలకు అందుబాటులోకి తీసుకురావాలని అధికారులు భావిస్తున్నారు.