డెలాయిట్‌పై నియామకాల్లో వివక్ష ఆరోపణలు
అమెరికాకు చెందిన ప్రముఖ కన్సల్టింగ్‌ సంస్థ డెలాయిట్‌ భారీ మొత్తంతో కేసును సెటిల్‌ చేసుకునేందుకు అంగీకరించింది.
ఉద్యోగ నియామకాల్లో జాతి, లింగాన్ని పరిగణనలోకి తీసుకున్నారన్న ఆరోపణలపై అమెరికా ప్రభుత్వం చేపట్టిన దర్యాప్తును ముగించేందుకు 21.5 మిలియన్‌ డాలర్లు (దాదాపు రూ.180 కోట్లు) చెల్లించనుంది.
అయితే తాము ఎలాంటి తప్పు చేయలేదని డెలాయిట్‌ స్పష్టం చేసింది.
నియామకాలు, పదోన్నతుల్లో వివక్ష ఆరోపణలు
అమెరికా న్యాయశాఖ (DOJ) ఆరోపణల ప్రకారం.. డెలాయిట్‌లో ఉద్యోగుల జాతి, లింగ నిష్పత్తికి సంబంధించి అంతర్గత లక్ష్యాలు ఉండేవి.
నియామకాలు, పదోన్నతులు, ఉద్యోగుల కేటాయింపుల్లో ఈ అంశాలను పరిగణనలోకి తీసుకున్నట్లు ప్రభుత్వం తెలిపింది.
కొన్ని విభాగాల పురోగతిని ఈ లక్ష్యాలతో పోల్చి ఉన్నతాధికారులకు సమాచారం ఇచ్చేవారని పేర్కొంది.
150 మంది సీనియర్‌ అధికారులపై ప్రభావం?
దాదాపు రెండేళ్లపాటు 150 మంది సీనియర్‌ పార్ట్‌నర్లు, ప్రిన్సిపల్స్‌, మేనేజింగ్‌ డైరెక్టర్ల పనితీరు ఆధారిత చెల్లింపులపై కూడా ఈ లక్ష్యాల ప్రభావం ఉండొచ్చని DOJ ఆరోపించింది.
స్ప్రింగ్‌బోర్డ్‌, కంపాస్‌ వంటి కార్యక్రమాల్లోనూ జాతి, లింగం ఆధారంగా అర్హతలను పరిమితం చేసినట్లు తెలిపింది.
ఆరోపణలను అంగీకరించని డెలాయిట్‌
అయితే డెలాయిట్‌ ఈ ఆరోపణలను అంగీకరించలేదు.
సుదీర్ఘ న్యాయపోరాటంతో వచ్చే ఖర్చు, అనిశ్చితి, సంస్థకు కలిగే అంతరాయాన్ని నివారించేందుకే సెటిల్‌మెంట్‌కు అంగీకరించినట్లు తెలిపింది.
ఈ ఒప్పందం తమ తప్పును అంగీకరించినట్లు కాదని స్పష్టం చేసింది.
పరిహారంగా 10 మిలియన్‌ డాలర్లు
మొత్తం 21.5 మిలియన్‌ డాలర్లలో దాదాపు 10 మిలియన్‌ డాలర్లు పరిహారంగా చెల్లించనున్నారు.
మిగిలిన మొత్తాన్ని సివిల్‌ పెనాల్టీలు, వడ్డీ కోసం ఉపయోగించనున్నారు. సంబంధిత విజిల్‌బ్లోయర్‌ కేసు దాఖలు చేసిన అమెరికన్‌ అలయన్స్‌ ఫర్‌ ఈక్వల్‌ రైట్స్‌కు 4.3 మిలియన్‌ డాలర్లు అందనున్నాయి.
డీఈఐ కార్యక్రమాలపై ట్రంప్‌ ప్రభుత్వం దృష్టి
అమెరికా అధ్యక్షుడు డొనాల్డ్‌ ట్రంప్‌ పాలనలో కంపెనీల డీఈఐ కార్యక్రమాలపై ప్రభుత్వం దృష్టి పెంచింది.
2025 మేలో ఫెడరల్‌ కాంట్రాక్టులకు సంబంధించిన వివక్ష ఆరోపణలపై దర్యాప్తు చేసేందుకు సివిల్‌ రైట్స్‌ ఫ్రాడ్‌ ఇనీషియేటివ్‌ను ప్రారంభించింది.
లాయిట్‌ సెటిల్‌మెంట్‌కు కొన్ని నెలల ముందు ఐబీఎం కూడా ఇలాంటి ఆరోపణలపై 17 మిలియన్‌ డాలర్లు చెల్లించేందుకు అంగీకరించింది.