ప్రమాదకరంగా మారిన DTO భవనం
నాగాలాండ్లో భారీ వర్షాలు, కొండచరియల కారణంగా తుయెన్సాంగ్లోని జిల్లా రవాణా కార్యాలయం (DTO) భవనం కుప్పకూలింది.
పోస్ట్ ఆఫీస్ వార్డులో ఉన్న ఈ 3 అంతస్తుల భవనం శనివారం ఉదయం నేలమట్టమైంది.
భవనం కూలిన సమయంలో ఎవరూ లోపల లేకపోవడంతో ప్రాణనష్టం తప్పింది.
DTO భవనం నిర్మాణపరంగా ప్రమాదకరంగా ఉన్నట్లు అధికారులు గతంలోనే గుర్తించారు.
వరుసగా కురుస్తున్న వర్షాలతో భవనం కూలిపోయే ప్రమాదం ఉందని నిర్మాణ, సాంకేతిక నిపుణుల పరిశీలనలో తేలింది.
ఈ నేపథ్యంలో తుయెన్సాంగ్ డిప్యూటీ కమిషనర్, జిల్లా విపత్తు నిర్వహణ అథారిటీ (DDMA) చైర్మన్ లిథ్రోంగ్లా టోంగ్పి రుట్సా ఈ ఏడాది జూలై 23న అత్యవసర కూల్చివేతకు ఆదేశాలు ఇచ్చారు.
జూలై 24 నుంచే కార్యాలయం మూసివేత
అధికారుల ఆదేశాలతో జూలై 24 నుంచి DTO కార్యాలయాన్ని తదుపరి ఉత్తర్వులు వచ్చే వరకు మూసివేశారు.
డ్రైవింగ్ లైసెన్సుల జారీ, వాహనాల రిజిస్ట్రేషన్, పన్నుల వసూలు, పర్మిట్లు తదితర మోటారు వాహన సేవలను తాత్కాలికంగా నిలిపివేశారు.
భవనాన్ని కూల్చే ప్రక్రియ కొనసాగుతుండగానే కొండచరియల కారణంగా అది ఒక్కసారిగా కుప్పకూలింది.
రోజుకు 6 నుంచి 8 అంగుళాలు కుంగుతున్న భూమి
తుయెన్సాంగ్ జిల్లాలో ఈ ఏడాది రుతుపవనాల ప్రభావం తీవ్రంగా ఉంది. కొండచరియలు విరిగిపడటం, భూమి కుంగిపోవడంతో జూలై 19 నుంచి ఇప్పటివరకు 49 కుటుంబాలను సురక్షిత ప్రాంతాలకు తరలించినట్లు నాగాలాండ్ స్టేట్ డిజాస్టర్ మేనేజ్మెంట్ అథారిటీ (NSDMA) తెలిపింది.
వీరిలో DTO భవనం దిగువ ప్రాంతంలో నివసించే 44 కుటుంబాలు ఉన్నాయి. పోస్ట్ ఆఫీస్ వార్డు, బజార్-ఏ వార్డుకు చెందిన మరో ఐదు కుటుంబాలను కూడా సురక్షిత ప్రాంతాలకు తరలించారు.
DTO కార్యాలయం పరిసర ప్రాంతాల్లో భూమి కుంగిపోవడం ఇంకా కొనసాగుతోంది. ప్రస్తుతం రోజుకు సుమారు 6 నుంచి 8 అంగుళాల మేర భూమి కుంగుతున్నట్లు అధికారులు అంచనా వేశారు.
దీంతో ఆ ప్రాంతాన్ని అత్యంత ప్రమాదకరంగా గుర్తించారు.
సహాయక శిబిరాల ఏర్పాటు
భద్రతాపరంగా ప్రమాదకరంగా ఉన్న రెండు భవనాలను ఇప్పటికే కూల్చివేశారు. DTO భవనాన్ని కూడా కూల్చే ప్రక్రియ కొనసాగుతుండగా అది కూలిపోయింది.
అత్యవసర కూల్చివేత చర్యల కోసం PWD (Housing) ఆధ్వర్యంలోని డిజాస్టర్ రెస్పాన్స్ ఫోర్స్కు అధికారులు అనుమతి ఇచ్చారు. కూల్చివేత, సహాయక చర్యలు జరుగుతున్న సమయంలో ప్రజలు, అనధికార వ్యక్తులు ప్రమాద ప్రాంతంలోకి వెళ్లకుండా ఆంక్షలు విధించారు.
ఇళ్లను ఖాళీ చేసిన కుటుంబాల కోసం తుయెన్సాంగ్ టౌన్ హాల్లో సహాయక శిబిరాలను ఏర్పాటు చేశారు.
ప్రభావిత కుటుంబాలకు అత్యవసర సహాయ సామగ్రి, ఇతర అవసరమైన సాయాన్ని అధికారులు అందిస్తున్నారు.
వరుసగా వర్షాలు కురుస్తున్న నేపథ్యంలో ప్రజలు అప్రమత్తంగా ఉండాలని, ప్రమాదకర ప్రాంతాలకు దూరంగా ఉండాలని అధికారులు సూచించారు.