22 మంది విద్యార్థినులపై లైంగిక వేధింపులు
మహారాష్ట్రలోని ఠాణె జిల్లాలో తీవ్ర దిగ్భ్రాంతికి గురిచేసే ఘటన వెలుగులోకి వచ్చింది.
తెంబా ప్రాంతంలోని ఆదివాసి ప్రభుత్వ ఆశ్రమ పాఠశాలలో 22 మంది విద్యార్థినులపై లైంగిక వేధింపులకు పాల్పడిన ఆరోపణలతో వంటవాడు గణపత్ గవిల్ను పోలీసులు అరెస్ట్ చేశారు.
భోజనం తీసుకునే సమయంలో గణపత్ గవిల్ తమతో అసభ్యంగా ప్రవర్తిస్తూ, లైంగిక వేధింపులకు పాల్పడుతున్నాడని విద్యార్థినులు ఆగస్టు 24న పోలీసులకు ఫిర్యాదు చేశారు.
ఫిర్యాదు అందిన వెంటనే పోలీసులు స్పందించి పాఠశాల యాజమాన్యంతో మాట్లాడారు.
ప్రాథమిక ఆధారాలు సేకరించిన తర్వాత పోక్సో చట్టం కింద కేసు నమోదు చేసి గణపత్ గవిల్ను అరెస్ట్ చేశారు.
గతంలోనూ పోక్సో కేసు.. మళ్లీ ఉద్యోగం ఎలా?
కేసు దర్యాప్తులో భాగంగా గణపత్ గవిల్ గత చరిత్రను పోలీసులు పరిశీలించారు.
ఈ క్రమంలో గతంలోనూ మరో ఆశ్రమ పాఠశాలలో పనిచేస్తున్న సమయంలో పలువురు బాలికలను లైంగికంగా వేధించిన ఆరోపణలు అతడిపై ఉన్నట్లు గుర్తించారు.
ఆ ఘటనపై అప్పట్లో పోక్సో చట్టం కింద కేసు నమోదైంది. అధికారులు అతడిని విధుల నుంచి సస్పెండ్ చేశారు. ఆ కేసులో గణపత్ గవిల్ జైలుకు వెళ్లి బయటకు వచ్చినట్లు పోలీసులు గుర్తించారు.
అయితే పోక్సో కేసులో నిందితుడిగా ఉండి, జైలుకు వెళ్లి వచ్చిన వ్యక్తికి మళ్లీ బాలికలు చదువుతున్న ఆశ్రమ పాఠశాలలో ఉద్యోగం ఎలా ఇచ్చారనే ప్రశ్నలు ఇప్పుడు తీవ్రంగా వినిపిస్తున్నాయి.
నియామకంపై అధికారుల ఆరా
గణపత్ గవిల్ను ఎవరు ఉద్యోగంలోకి తీసుకున్నారు? అతడి గత నేరచరిత్రను పరిశీలించారా? బ్యాక్గ్రౌండ్ వెరిఫికేషన్ చేయకుండానే నియామకం జరిగిందా? అనే అంశాలపై అధికారులు దర్యాప్తు చేస్తున్నారు.
నిందితుడి గత చరిత్ర తెలిసినప్పటికీ ఉద్యోగం ఇచ్చి ఉంటే బాధ్యులైన అధికారులపై చర్యలు తీసుకోవాలని విద్యార్థుల తల్లిదండ్రులు డిమాండ్ చేస్తున్నారు.
పోక్సో కేసులో గతంలో జైలుకు వెళ్లిన వ్యక్తికి మళ్లీ బాలికల పాఠశాలలో ఉద్యోగం ఇవ్వడం సరైనదేనా? ఈ ఘటనపై మీ అభిప్రాయాన్ని కామెంట్లలో పంచుకోండి.