మదర్సా విస్తరణ కోసమే కూల్చివేశారా?
- పాకిస్థాన్లోని పంజాబ్లో 125 ఏళ్ల నాటి హిందూ ఆలయం కూల్చివేతపై వివాదం
- మదర్సా విస్తరణ కోసం మత ఛాందసవాదులు కూల్చివేశారని మైనారిటీ సంఘాల ఆరోపణ
- భారీ వర్షాల వల్లే ఆలయం కూలిందని ప్రభుత్వ అధికారులు చెబుతున్న వాదన
పునర్నిర్మించాలని డిమాండ్
పాకిస్థాన్లోని పంజాబ్ ప్రావిన్స్లో 125 ఏళ్ల చరిత్ర ఉన్న పురాతన హిందూ ఆలయం కూల్చివేత తీవ్ర వివాదానికి దారితీసింది.
లాహోర్కు సుమారు 130 కిలోమీటర్ల దూరంలోని నరోవల్ జిల్లాలోని సిరాజ్ గ్రామంలో ఆగస్టు 21న ఈ ఘటన జరిగింది.
మదర్సా విస్తరణ కోసం మత ఛాందసవాదులు ఆలయాన్ని ఉద్దేశపూర్వకంగా కూల్చివేశారని హక్కుల సంఘాలు, మైనారిటీ సంస్థలు ఆరోపిస్తున్నాయి.
సుమారు 1,000 చదరపు మీటర్ల విస్తీర్ణంలో ఉన్న ఆలయ భూమిని పక్కనే ఉన్న మదర్సాలో కలిపేందుకే ఈ చర్యకు పాల్పడ్డారని ఆరోపణలు వస్తున్నాయి.
నిషేధిత తెహ్రీక్-ఇ-లబ్బైక్ పాకిస్థాన్ (టీఎల్పీ) పార్టీకి చెందిన కొందరు వ్యక్తులు ఆలయాన్ని కూల్చివేశారని మైనారిటీ సంఘాలు ఆరోపించాయి.
ఇటుకలు, లోహ సామాగ్రి అమ్మేశారని ఆరోపణ
ఈ ఘటనపై పాకిస్థాన్ మసిహా మిల్లత్ పార్టీ (పీఎంఎంపీ) తీవ్రంగా స్పందించింది.
ఆలయాన్ని తిరిగి నిర్మించాలని, బాధ్యులపై కఠిన చర్యలు తీసుకోవాలని పంజాబ్ ముఖ్యమంత్రి మర్యం నవాజ్ షరీఫ్ ప్రభుత్వాన్ని డిమాండ్ చేసింది.
పీఎంఎంపీ ఛైర్మన్ అస్లాం పర్వేజ్ సహోత్రా మాట్లాడుతూ.. కూల్చివేసిన ఆలయానికి చెందిన ఇటుకలు, శిఖరానికి ఉన్న లోహపు సామాగ్రిని కూడా దుండగులు అమ్ముకున్నారని ఆరోపించారు.
గతంలో ఆలయానికి ఆనుకుని ఉన్న భూమిని ఎవాక్యూ ట్రస్ట్ ప్రాపర్టీ బోర్డ్ (ఈటీపీబీ) ఒక మదర్సాకు లీజుకు ఇచ్చిందని చెప్పారు.
అయితే అద్దె చెల్లించకపోవడంతో ఆ లీజును రద్దు చేసినట్లు తెలిపారు.
ఆక్రమణదారులను ఖాళీ చేయించాలని ఈటీపీబీ ఈ ఏడాది జనవరిలో ఆదేశాలు ఇచ్చినా అధికారులు వాటిని అమలు చేయలేదని సహోత్రా విమర్శించారు.
ఈ ఘటనపై సమగ్ర దర్యాప్తు జరిపి బాధ్యులపై చర్యలు తీసుకోవాలని కోరారు.
కూల్చిన ప్రదేశానికి వెళ్లేందుకే భయం
స్థానిక హిందూ సంఘం నాయకుడు రతన్ లాల్ కూడా ఆలయం కూల్చివేతను ఖండించారు.
ఆలయ ప్రాంగణంలో ఇప్పటికీ మదర్సా కొనసాగుతుండటంతో కూల్చివేసిన ప్రదేశానికి వెళ్లేందుకు స్థానిక హిందువులు భయపడుతున్నారని ఆవేదన వ్యక్తం చేశారు.
అధికారుల నిర్లక్ష్యం వల్లే ఈ పరిస్థితి వచ్చిందని రతన్ లాల్ ఆరోపించారు.
ప్రభుత్వం వెంటనే స్పందించి ఆలయాన్ని పునరుద్ధరించాలని కోరారు.
భారీ వర్షాల వల్లే కూలిందన్న అధికారులు
మరోవైపు మైనారిటీ సంఘాల ఆరోపణలను స్థానిక అధికారులు ఖండిస్తున్నారు.
ఆలయం చాలా పురాతనమైనదని, భారీ వర్షాల కారణంగానే పాత నిర్మాణం కూలిపోయిందని ఈటీపీబీ అధికారి రాణా ఇఫ్తిఖార్ తెలిపారు.
ఎవరూ ఆలయాన్ని కూల్చలేదని స్పష్టం చేశారు. ఆలయ పునర్నిర్మాణంపై ఉన్నతాధికారులు నిర్ణయం తీసుకుంటారని చెప్పారు.
అయితే ఆలయానికి భద్రతాపరమైన ముప్పు ఉందని స్థానిక పోలీసులు ఏప్రిల్లోనే నివేదిక ఇచ్చినట్లు తెలుస్తోంది.
దీంతో ఆలయం కూల్చివేతపై ఆరోపణలు, అధికారుల వాదనల మధ్య వివాదం మరింత ముదిరింది.