భద్రత, అనుసంధానత, అవకాశాలే భారత్ విజన్
కిర్గిజిస్థాన్ రాజధాని బిష్కేక్లో జరుగుతున్న 26వ షాంఘై సహకార సంస్థ (SCO) శిఖరాగ్ర సదస్సులో ప్రధాని నరేంద్ర మోదీ ఉగ్రవాదంపై కీలక వ్యాఖ్యలు చేశారు.
ఉగ్రవాదంపై పోరాటంలో ద్వంద్వ ప్రమాణాలకు తావు ఉండకూడదని స్పష్టం చేశారు.
పాకిస్థాన్ ప్రధాని షెహబాజ్ షరీఫ్ సమక్షంలోనే మోదీ ఈ వ్యాఖ్యలు చేయడం ప్రాధాన్యం సంతరించుకుంది.
ఉగ్రవాదంపై ద్వంద్వ ప్రమాణాలు వద్దు
ఉగ్రవాదం మానవాళి మొత్తానికి తీవ్రమైన సవాల్గా మారిందని ప్రధాని మోదీ అన్నారు.
దీనిపై పోరాటం కేవలం ‘చర్య-ప్రతిచర్య’ ఆలోచనకు పరిమితం కాకూడదని చెప్పారు.
ఉగ్రవాదానికి సంబంధించిన ఫైనాన్సింగ్, రిక్రూట్మెంట్, రాడికలైజేషన్, సురక్షిత స్థావరాలతో సహా మొత్తం నెట్వర్క్ను నిర్మూలించాల్సిన అవసరం ఉందని మోదీ అన్నారు.
ఈ తీవ్రమైన అంశంపై ప్రపంచ దేశాలు ఒకే గొంతుతో మాట్లాడాలని సూచించారు.
ఉగ్రవాదాన్ని తమ విధానంగా మార్చుకుని, దానికి ఆశ్రయం, మద్దతు ఇస్తున్న దేశాలకు గట్టి సందేశం ఇవ్వాలని ప్రధాని చెప్పారు.
ఉగ్రవాదం ఎప్పటికీ ఎవరికీ ‘హామీ ఇచ్చే వ్యూహాత్మక ఆస్తి’ కాజాలదని స్పష్టం చేశారు.
భారత్ విజన్లో మూడు ప్రధాన స్తంభాలు
షాంఘై సహకార సంస్థ కోసం భారత్ విజన్ను కూడా ప్రధాని మోదీ వెల్లడించారు.
భద్రత, అనుసంధానత, అవకాశాలు అనే మూడు అంశాలు ఇందులో ప్రధాన స్తంభాలని వివరించారు.
శాంతి, భద్రత మొదటి స్తంభంగా నిలుస్తాయని చెప్పారు. ప్రశాంతమైన, సురక్షితమైన యురేషియా కోసం ఉమ్మడి కార్యాచరణ అఫ్గనిస్థాన్లో శాంతి, స్థిరత్వంతో ముడిపడి ఉందని మోదీ అన్నారు.
అఫ్గన్ ప్రజలకు భారత్ అభివృద్ధి, మానవతా సహాయాన్ని కొనసాగిస్తుందని పునరుద్ఘాటించారు.
పశ్చిమాసియా సంక్షోభంపై ఆందోళన
పశ్చిమాసియా సంక్షోభంపై కూడా మోదీ మాట్లాడారు.
ఒక ప్రాంతంలో జరిగే ఘర్షణలు ప్రపంచవ్యాప్తంగా ప్రభావం చూపుతాయని అన్నారు.
ముఖ్యంగా ఇంధన భద్రత, సముద్ర వాణిజ్యం, సరఫరా గొలుసులపై తీవ్ర ప్రభావం పడుతుందని వివరించారు.
దీని వల్ల అభివృద్ధి చెందుతున్న దేశాలే ఎక్కువగా నష్టపోతున్నాయని చెప్పారు.
అందుకే ఉద్రిక్తతలు, యుద్ధాలకు పరిష్కారం యుద్ధభూమిలో సాధ్యం కాదని భారత్ పదే పదే చెబుతోందన్నారు. సమస్యలకు ‘చర్చలు, దౌత్యం’ ద్వారానే పరిష్కారం లభిస్తుందని స్పష్టం చేశారు.
డ్రగ్స్ అక్రమ రవాణాపై సహకారం పెంచాలి
డ్రగ్స్ అక్రమ రవాణా యువతతో పాటు ప్రాంతీయ భద్రతకు కూడా తీవ్ర ముప్పుగా మారిందని ప్రధాని మోదీ ఆందోళన వ్యక్తం చేశారు.
భద్రతా బెదిరింపులు, వ్యవస్థీకృత నేరాలు, సమాచార భద్రత, నార్కోటిక్స్ వ్యవహారాలను పర్యవేక్షించే ఎస్సిఓ యంత్రాంగాల ద్వారా మరింత బలమైన సహకారం అందించాలని కోరారు.
సకాలంలో చర్యలు తీసుకోవడానికి, ఆచరణాత్మక సమన్వయానికి ఇవి సమర్థవంతమైన మాధ్యమాలుగా మారాలని సూచించారు.
ప్రజలకు ఉపయోగపడేలా ఎస్సిఓ సహకారం
ఎస్సిఓ సహకారం ప్రజలకు స్పష్టమైన ప్రయోజనాలను అందించాలని మోదీ అన్నారు.
భవిష్యత్ కార్యాచరణలో ‘ప్రజల మధ్య సంబంధాలను’ కేంద్ర బిందువుగా ఉంచాలని చెప్పారు.
యువతకు ఎన్ని కొత్త అవకాశాలు వచ్చాయి, పారిశ్రామికవేత్తలకు ఎన్ని కొత్త మార్కెట్లు అందుబాటులోకి వచ్చాయి, సాంకేతికత ద్వారా రైతులకు ఎంత ప్రయోజనం కలిగింది, ప్రజల జీవితాలు ఎంతగా మెరుగుపడ్డాయి అనేదే ఎస్సిఓ విజయాన్ని కొలిచే నిజమైన ప్రమాణాలని ప్రధాని వివరించారు.
పలువురు దేశాధినేతల హాజరు
కిర్గిజిస్థాన్ అధ్యక్షుడు సదిర్ జపరోవ్ ఈ శిఖరాగ్ర సదస్సుకు అధ్యక్షత వహించి, ఆతిథ్యం ఇచ్చారు.
ప్రధాని మోదీతో పాటు చైనా అధ్యక్షుడు షీ జిన్పింగ్, రష్యా అధ్యక్షుడు వ్లాదిమిర్ పుతిన్, పాకిస్థాన్ ప్రధాని షెహబాజ్ షరీఫ్, ఇరాన్ అధ్యక్షుడు మసూర్ పెజెష్కియాన్, ఇతర ఎస్సిఓ సభ్యదేశాల నేతలు సమావేశంలో పాల్గొన్నారు.