తెలంగాణ హైకోర్టు కీలక ఆదేశాలు.. వరంగల్‌ వ్యక్తి మృతిపై తాజా ఫోరెన్సిక్‌ అభిప్రాయం

సహజ మరణం అంటూ కేసు మూసివేతపై కోర్టు సందేహాలు

గాయాలపై సమగ్ర విచారణకు ఆదేశం

హైదరాబాద్‌: Warangal జిల్లా గీసుకొండ పోలీస్‌ స్టేషన్‌ పరిధిలో ల్యాడెల్ల రాజు మృతి కేసులో తెలంగాణ హైకోర్టు కీలక ఆదేశాలు జారీ చేసింది. రాజు మృతికి కారణంపై ఉస్మానియా జనరల్‌ హాస్పిటల్‌లోని ఫోరెన్సిక్‌ మెడిసిన్‌ విభాగం నుంచి తాజా అభిప్రాయం తీసుకోవాలని గీసుకొండ పోలీసులను ఆదేశించింది. జస్టిస్‌ టి. మాధవి దేవి ఈ ఆదేశాలు ఇచ్చారు.

మృతిపై పోలీసుల దర్యాప్తును ప్రశ్నించిన భార్య

రాజు భార్య ల్యాడెల్ల ప్రియాంక ఈ కేసులో న్యాయస్థానాన్ని ఆశ్రయించారు. గీసుకొండ పోలీస్‌ స్టేషన్‌లో నమోదైన కేసులో పోలీసులు నిష్పక్షపాతంగా, సమర్థంగా దర్యాప్తు చేయలేదని ఆమె ఆరోపించారు.

ప్రియాంక తరఫు న్యాయవాది బి. బాలరాజు వాదనలు వినిపించారు. తన భర్త మృతదేహంపై గాయాలు కనిపించినప్పటికీ, పోలీసులు కేసును సహజ మరణంగా ముగించారని కోర్టు దృష్టికి తీసుకెళ్లారు.

కాకతీయ మెడికల్‌ కాలేజీకి చెందిన ఫోరెన్సిక్‌ మెడిసిన్‌ అండ్‌ టాక్సికాలజీ అసిస్టెంట్‌ ప్రొఫెసర్‌ ఇచ్చిన అభిప్రాయం ఆధారంగా రాజు ఆకస్మిక గుండెపోటుతో మృతి చెందారని, అది సహజ మరణమని పోలీసులు కేసును మూసివేశారని తెలిపారు.

మృతదేహంపై గాయాలపై కోర్టు సందేహాలు

రాజు మృతదేహానికి సంబంధించిన ఫొటోలను న్యాయవాది కోర్టుకు చూపించారు. వాటిలో కనిపిస్తున్న గాయాలను ప్రస్తావిస్తూ, ఈ మరణాన్ని కేవలం సహజ మరణంగా పరిగణించలేమని వాదించారు.

ఫొటోలు, పోస్టుమార్టం నివేదికను పరిశీలించిన జస్టిస్‌ మాధవి దేవి.. సహజ మరణం అన్న నిర్ధారణపై తీవ్ర సందేహాలు వ్యక్తం చేశారు.

మృతదేహంపై కనిపించిన గాయాలపై ఫోరెన్సిక్‌ నిపుణుడి నుంచి పోలీసులు గతంలో పాయింట్‌-వైజ్‌ వివరణ కోరినట్లు కోర్టు గుర్తించింది. అయితే వచ్చిన తదుపరి వివరణలోనూ నిర్దిష్ట అంశాలకు సమాధానం ఇవ్వకుండా ఆకస్మిక గుండెపోటు కారణంగానే మరణం జరిగిందని మాత్రమే పేర్కొన్నట్లు తెలిపింది.

ఈ సందర్భంగా జడ్జి మౌఖికంగా.. “From the record, it does not appear to be a case of natural death. Please don’t tell me that.” అని వ్యాఖ్యానించారు.

ఉన్నతస్థాయి ఫోరెన్సిక్‌ అభిప్రాయం తీసుకోవాలి

ఇప్పటికే వచ్చిన వైద్య అభిప్రాయంపైనే ఆధారపడకుండా పోలీసులు తమవైపు నుంచి మరింత దర్యాప్తు చేయాలని కోర్టు సూచించింది.

గతంలో అభిప్రాయం ఇచ్చిన అధికారికంటే ఉన్నత హోదాలో ఉన్న వైద్య అధికారి నుంచి తాజా అభిప్రాయం అవసరమని కోర్టు పేర్కొంది.

దీంతో సంబంధిత అసిస్టెంట్‌ కమిషనర్‌ ఆఫ్‌ పోలీస్‌.. పోస్టుమార్టం నివేదిక, మృతదేహం ఫొటోలు, గతంలో ఇచ్చిన వైద్య అభిప్రాయాలు సహా అన్ని సంబంధిత రికార్డులను హైదరాబాద్‌లోని ఉస్మానియా జనరల్‌ హాస్పిటల్‌ ఫోరెన్సిక్‌ మెడిసిన్‌ విభాగాధిపతికి పంపాలని జస్టిస్‌ మాధవి దేవి ఆదేశించారు.

మరణానికి గల సాధ్యమైన కారణంపై సమగ్ర అభిప్రాయం తీసుకోవాలని సూచించారు. తాజా ఫోరెన్సిక్‌ అభిప్రాయం వచ్చిన తర్వాత పోలీసులు చట్టప్రకారం తదుపరి చర్యలు తీసుకోవాలి.

ఈ ప్రక్రియ మొత్తాన్ని మూడు నెలల్లో పూర్తి చేయాలని కోర్టు ఆదేశించింది. తాజా వైద్య అభిప్రాయం ప్రతిని పిటిషనర్‌ ల్యాడెల్ల ప్రియాంకకు అందించాలని కూడా స్పష్టం చేసింది.