IPS అక్షయ్‌ ఇంటర్వ్యూ సాధారణ ప్రశ్నలు-జవాబులా కాకుండా స్నేహపూర్వక సంభాషణలా సాగింది. తొలి ప్రశ్నగా ‘ఇప్పటివరకు ఎంతమంది అమ్మాయిలు ప్రపోజ్ చేశారు?’ అని అడిగినట్లు ఆయన గుర్తుచేసుకున్నారు.
ముఖ్యాంశాలు
- IPS అక్షయ్‌ UPSC ఇంటర్వ్యూ మార్చి 23న జరిగింది. అదే రోజు 1931లో భగత్ సింగ్, సుఖదేవ్, రాజ్ గురు అమరులయ్యారు.
- ఇంటర్వ్యూలో నక్సలిజం, జాతి వివక్ష, వలస పాలన, అంతర్జాతీయ సంబంధాలు, వైల్డ్‌లైఫ్‌ వంటి పలు అంశాలపై ప్రశ్నలు ఎదురయ్యాయి.
- అక్షయ్‌కు ఇంటర్వ్యూలో 179 మార్కులు వచ్చాయి. ఈ మార్కులు తుది జాబితాలో చోటు దక్కడంలో ఎంతో ఉపయోగపడ్డాయని ఆయన చెప్పారు.
తొలి ప్రశ్నే ఊహించనిది
IPS అక్షయ్‌ ఇంటర్వ్యూ బోర్డుకు రిటైర్డ్ ఎయిర్ మార్షల్ అజిత్ బోన్స్లే నాయకత్వం వహించారు. సుమారు 20-25 నిమిషాల పాటు ఇంటర్వ్యూ సాగిందని అక్షయ్‌ తెలిపారు.
ఇంటర్వ్యూ ప్రారంభంలోనే ‘మీకు ఇప్పటివరకు ఎంతమంది అమ్మాయిలు ప్రపోజ్ చేశారు?’ అని అడిగారని ఆయన చెప్పారు. ఆ ప్రశ్న తనను ఒక్కసారిగా ఆశ్చర్యానికి గురిచేసిందన్నారు. అయితే నవ్వుతూ ‘ఎవరూ లేరు’ అని సమాధానం ఇచ్చినట్లు తెలిపారు.
ఇంటర్వ్యూ బోర్డు తనను ఒత్తిడికి గురిచేయకుండా చాలా సౌకర్యవంతమైన వాతావరణం కల్పించిందని అక్షయ్‌ చెప్పారు. ప్రశ్నలు-జవాబుల కంటే సాధారణ సంభాషణలా ఇంటర్వ్యూ సాగిందని వివరించారు.
మార్చి 23న ఇంటర్వ్యూ.. భగత్ సింగ్‌తో తన వయసు ఒకటే
తన ఇంటర్వ్యూ మార్చి 23న జరిగిందని అక్షయ్‌ తెలిపారు. 1931 మార్చి 23న భగత్ సింగ్, సుఖదేవ్, రాజ్ గురు అమరులయ్యారు. ఆ సమయంలో భగత్ సింగ్ వయసు 23 ఏళ్లు కాగా, తాను కూడా 23 ఏళ్ల వయసులోనే సివిల్ సర్వీసెస్ ఇంటర్వ్యూకు హాజరైనట్లు చెప్పారు.
భగత్ సింగ్ దేశం కోసం ప్రాణత్యాగం చేశారని, తాను దేశానికి సేవ చేయడానికి వస్తున్నానని అక్షయ్‌ చెప్పారు. ఆ రోజు తమ ఇద్దరి మధ్య ఉన్న తేడా అంతేనని ఆయన పేర్కొన్నారు.
తన వయసు, భగత్ సింగ్ వయసు ఒకటే కావడంతో ఇంటర్వ్యూలో ఆయన గురించి ప్రశ్న అడుగుతారని ఊహించినట్లు అక్షయ్‌ తెలిపారు. అయితే అలా జరగలేదన్నారు.
వరంగల్‌ అనగానే నక్సలిజంపై ప్రశ్న
తర్వాత తన విద్య, నేపథ్యానికి సంబంధించిన అంశాలపై ప్రశ్నలు వచ్చాయని అక్షయ్‌ వివరించారు. తాను వరంగల్‌ నుంచి వచ్చినట్లు చెప్పగానే నక్సలిజంపై ప్రశ్న అడిగారని తెలిపారు.
నక్సలిజం సిద్ధాంతంపై తనకు ఆసక్తి ఉండటంతో ఆ ప్రశ్న తనకు నచ్చిందన్నారు. అమెరికాలో జాతి వివక్ష, బ్రిటిష్‌ వలస పాలన ప్రభావం, భారతదేశంపై దాని సానుకూల, ప్రతికూల ప్రభావాలపైనా ప్రశ్నలు ఎదురయ్యాయని చెప్పారు.
తాను వైల్డ్‌లైఫ్‌పై ఆసక్తి ఉందని అప్లికేషన్‌లో పేర్కొనడంతో ఆలివ్ రిడ్లీ తాబేళ్లు, నార్తర్న్ వైట్ రైనో గురించి కూడా బోర్డు ప్రశ్నలు అడిగిందని అక్షయ్‌ తెలిపారు.
అలాగే ఉడాన్‌ పథకం, హన్మకొండ అనే పేరు ఎలా వచ్చిందనే విషయం, చైనా-శ్రీలంకతో భారత సంబంధాలు వంటి అంశాలపైనా ప్రశ్నలు వచ్చాయని చెప్పారు.
తన ఆప్షనల్ సబ్జెక్ట్ పొలిటికల్ సైన్స్, ఇంటర్నేషనల్ రిలేషన్స్ కావడంతో అంతర్జాతీయ సంబంధాలకు సంబంధించిన ప్రశ్నలు కూడా అడిగినట్లు వివరించారు. ఇండియన్ ఎక్స్‌ప్రెస్‌లో అప్పట్లో చర్చకు వచ్చిన హర్ష్ మందర్, రామచంద్ర గుహ మధ్య డిబేట్‌కు సంబంధించిన ప్రశ్న కూడా ఎదురైందని అక్షయ్‌ తెలిపారు.
ఇంటర్వ్యూ తర్వాత ఢిల్లీ పర్యటన సూచన
ఇంటర్వ్యూ ముగిసే సమయంలో బోర్డు సభ్యుడు అజిత్ బోన్స్లే ‘ఈరోజు మీ ప్లాన్స్ ఏంటి?’ అని అడిగారని అక్షయ్‌ చెప్పారు.
తాను అప్పటివరకు ఏమీ నిర్ణయించుకోలేదని చెప్పడంతో.. ‘ఇప్పుడు నిర్ణయించుకోండి. నేను మీకు సమయం ఇస్తాను’ అని బోన్స్లే చెప్పినట్లు తెలిపారు.
తాను మొదటిసారి ఢిల్లీకి వచ్చానని చెప్పడంతో కుతుబ్ మినార్, కన్నాట్ ప్లేస్ తదితర ప్రాంతాలను సందర్శించవచ్చని బోన్స్లే సూచించినట్లు అక్షయ్‌ చెప్పారు.
ఆ సమయంలో తనకు అది అసలు ఇంటర్వ్యూలా అనిపించలేదని, స్నేహపూర్వక సంభాషణలా సాగిందని అక్షయ్‌ పేర్కొన్నారు.
179 మార్కులు.. ఆందోళనకు తెర
ఇంటర్వ్యూ సమయంలో అంతా ప్రశాంతంగానే సాగినప్పటికీ, బయటకు వచ్చిన తర్వాత మాత్రం తాను ఆందోళనకు గురయ్యానని అక్షయ్‌ తెలిపారు.
చాలా చదువుకుని ఇంటర్వ్యూకు వెళ్లినా తాను ఊహించిన ప్రశ్నలు పెద్దగా రాలేదన్నారు. ప్రశ్నలు తక్కువగా, చర్చ ఎక్కువగా సాగినట్లు అనిపించిందని చెప్పారు. ఈ చర్చ ఆధారంగా తనను ఎలా అంచనా వేస్తారు, ఎన్ని మార్కులు ఇస్తారు అని బయటకు వచ్చిన తర్వాత ఆలోచించినట్లు వివరించారు.
అయితే ఫలితాలు వచ్చిన తర్వాత తనకు మంచి మార్కులు రావడంతో ఆ ఆందోళన అంతా తొలగిపోయిందన్నారు.
సివిల్ సర్వీసెస్ ఇంటర్వ్యూలో తనకు 179 మార్కులు వచ్చాయని అక్షయ్‌ తెలిపారు. దాదాపు 180 మార్కులు వస్తాయని ఊహించలేదని, 120-130 మార్కులు వస్తే గొప్ప అనుకున్నానని చెప్పారు.
‘179 మార్కులు రావడం చాలా మంచి స్కోర్. ఆ మార్కులే నన్ను తుది జాబితాలో నిలబెట్టడానికి ఎంతో ఉపయోగపడ్డాయి. అందుకే బోన్స్లే సర్‌ ఎక్కడ ఉన్నా ఆయనకు ధన్యవాదాలు చెప్పాలి’ అని అక్షయ్‌ తన ఇంటర్వ్యూ అనుభవాన్ని గుర్తుచేసుకున్నారు.