ఉత్తరప్రదేశ్‌లో విషాద ఘటన..
ఉత్తరప్రదేశ్‌లోని కౌశాంబి జిల్లాలో హృదయ విదారక ఘటన చోటుచేసుకుంది. ప్రియుడితో వెళ్లిపోయిన కుమార్తెపై ఓ తండ్రి తీవ్ర ఆగ్రహం వ్యక్తం చేశాడు.
భార్య మరణం తర్వాత మరింత కుంగిపోయిన ఆ తండ్రి.. బతికున్న తన కుమార్తెకు పిండప్రదానం చేశాడు.
అంతేకాదు, ఆమెను తన ఆస్తుల నుంచి పూర్తిగా తొలగిస్తున్నట్లు ప్రకటించాడు. ఈ ఘటన స్థానికంగా చర్చనీయాంశంగా మారింది.
కూతురు ప్రియుడితో వెళ్లిపోవడంతో కలకలం
కౌశాంబి జిల్లాలోని సంద్‌పాన్ ఘాట్ పోలీస్ స్టేషన్ పరిధిలో మురత్‌గంజ్-పల్హానా రోడ్డు ప్రాంతానికి చెందిన రాజు గుప్తాకు 19 ఏళ్ల కుమార్తె ఉంది.
ఆమె ఇంటర్మీడియట్ చదువుతోంది. అయితే అక్టోబర్ 15న ఎప్పటిలాగే కాలేజీకి వెళ్లిన యువతి తిరిగి ఇంటికి రాలేదు.
దీంతో ఆందోళనకు గురైన కుటుంబ సభ్యులు ఆమె కోసం వెతికారు. ఈ క్రమంలో ధన్ని గ్రామానికి చెందిన అమర్‌దీప్ రైదాస్ అనే యువకుడితో ఆమె వెళ్లిపోయినట్లు తెలుసుకున్నారు. వెంటనే పోలీసులకు ఫిర్యాదు చేశారు.
ఆరు గంటల్లోనే యువతి ఆచూకీ
కుటుంబ సభ్యుల ఫిర్యాదుతో పోలీసులు కేసు నమోదు చేశారు. యువతి కోసం గాలింపు చేపట్టారు.
ఈ క్రమంలో కేవలం ఆరు గంటల్లోనే యువతిని, ఆమె ప్రియుడు అమర్‌దీప్ రైదాస్‌ను పోలీసులు గుర్తించి అదుపులోకి తీసుకున్నారు.
విచారణ సమయంలో యువతికి ఆమె తల్లి పార్వతి (40) మరణించిన విషయాన్ని పోలీసులు తెలియజేశారు.
అయితే తల్లి అంత్యక్రియలకు హాజరయ్యేందుకు యువతి నిరాకరించింది. ఈ పరిణామం కుటుంబ సభ్యులను మరింత బాధకు గురిచేసింది.
మేజర్ కావడంతో ప్రియుడితో వెళ్లేందుకు అనుమతి
యువతికి 19 ఏళ్లు కావడంతో ఆమె మేజర్. పోలీసులు ఆమె వాంగ్మూలాన్ని కోర్టులో నమోదు చేయించారు.
అనంతరం ఆమె ఇష్టప్రకారం ప్రియుడితో వెళ్లేందుకు అనుమతించారు.
మరోవైపు, కూతురు ఇంటి నుంచి వెళ్లిపోయిందనే బాధతో ఆమె తల్లి పార్వతి తీవ్ర మనోవేదనకు గురైంది.
ఈ క్రమంలో ఆమె మరణించింది. కూతురు ఇంటిని విడిచిపెట్టడం, తల్లి అంత్యక్రియలకు కూడా రాకపోవడం కుటుంబంలో తీవ్ర విషాదాన్ని నింపింది.
బతికున్న కూతురికి పిండప్రదానం
భార్య మరణం, కుమార్తె తీసుకున్న నిర్ణయం రాజు గుప్తాను తీవ్రంగా కలచివేశాయి. దీంతో ఆయన సంచలన నిర్ణయం తీసుకున్నాడు. ఇంకా బతికే ఉన్న తన కుమార్తెకు పిండప్రదానం చేశాడు.
అంతేకాదు, మరణించిన భార్యతోపాటు కుమార్తెకు కూడా పదమూడో రోజు నిర్వహించే తేర్హీ కార్యక్రమాలు జరిపించాడు.
తన కుమార్తెను కుటుంబానికి దూరమైన వ్యక్తిగా భావిస్తూ ఈ కార్యక్రమాలు నిర్వహించినట్లు తెలుస్తోంది.
ఇదే సమయంలో కుమార్తెను తన ఆస్తుల నుంచి పూర్తిగా తొలగిస్తున్నట్లు ప్రకటించాడు. కూతురు తీసుకున్న నిర్ణయంతో తీవ్రంగా బాధపడిన తండ్రి ఈ విధంగా తన ఆవేదనను వ్యక్తం చేశాడు.
నవంబర్ 25న జరగాల్సిన వివాహం
ఈ కుటుంబంలో మరో విషాదకర విషయం కూడా ఉంది. వాస్తవానికి యువతికి నవంబర్ 25న వివాహం జరగాల్సి ఉంది.
అంతకుముందు రెండుసార్లు నిశ్చితార్థాలు రద్దయ్యాయి. దాదాపు నెల రోజుల క్రితం ఫతేపూర్ జిల్లాకు చెందిన ఓ యువకుడితో మరోసారి ఎంగేజ్‌మెంట్ నిశ్చయమైంది.
అయితే ఇంతలోనే యువతి ప్రియుడితో వెళ్లిపోవడం, ఆ తర్వాత తల్లి పార్వతి మరణించడం వంటి పరిణామాలు చోటుచేసుకున్నాయి.
దీంతో పెళ్లి వేడుకలతో సందడిగా ఉండాల్సిన ఆ ఇంట్లో తీవ్ర విషాదం అలుముకుంది.
ఒకవైపు తల్లి మరణం, మరోవైపు కూతురితో తెగిపోయిన సంబంధం.. ఈ రెండు పరిణామాలు రాజు గుప్తా కుటుంబాన్ని తీవ్ర విషాదంలోకి నెట్టాయి.
బతికున్న కుమార్తెకు తండ్రి పిండప్రదానం చేయడం ఇప్పుడు స్థానికంగా చర్చనీయాంశంగా మారింది.