బతుకుదెరువు కోసం వెళ్లి యుద్ధంలోకి..
రష్యా-ఉక్రెయిన్ యుద్ధం తెలంగాణ కుటుంబాల్లో తీవ్ర ఆందోళన కలిగిస్తోంది. ఉపాధి కోసం విదేశాలకు వెళ్లిన పలువురు తెలంగాణ యువకులు అనుకోకుండా యుద్ధంలో భాగస్వాములవుతున్నారు.
మంచి జీతం వస్తుందనే ఆశతో వెళ్లిన వారు ఇప్పుడు ప్రాణాలు అరచేతిలో పెట్టుకుని బతుకుతున్నారు. కొందరిని రష్యా ఆర్మీలో చేర్చుకుని యుద్ధ క్షేత్రానికి పంపిస్తున్నారు.
మరికొందరు అక్కడి పరిస్థితుల నుంచి బయటపడలేక ఇబ్బందులు ఎదుర్కొంటున్నారు.
ఉద్యోగాలు ఇప్పిస్తామని చెప్పిన ఏజెంట్లు యువకులను విదేశాలకు పంపిస్తున్నారు. మొదట సాధారణ పనులు చూపిస్తున్నారు. ఆ తర్వాత ఆర్మీలో చేరాలని ఒత్తిడి చేస్తున్నారనే ఆరోపణలు ఉన్నాయి.
కొందరి నుంచి భారత పౌరసత్వాన్ని వదులుకుంటున్నట్లు నోటరీ పత్రాలు తీసుకుంటున్నారని బాధితులు చెబుతున్నారు.
అనంతరం రష్యా పౌరసత్వం, పాస్‌పోర్టులు ఇచ్చి సైన్యంలో చేర్చుకుంటున్నారని ఆరోపణలు వినిపిస్తున్నాయి.
జగిత్యాల యువకుడు సుదర్శన్‌గౌడ్‌ మృతి
జగిత్యాల అర్బన్‌ మండలం హుస్నాబాద్‌కు చెందిన వావిలాల సుదర్శన్‌గౌడ్‌ ఉపాధి కోసం విదేశాలకు వెళ్లాలని నిర్ణయించుకున్నాడు.
ఆయనకు ఇద్దరు ఆడపిల్లలు ఉన్నారు. వారికి పెళ్లి చేయాల్సిన బాధ్యత ఉంది. మరోవైపు తల్లి క్యాన్సర్‌తో బాధపడుతున్నారు. కుటుంబ ఆర్థిక పరిస్థితుల కారణంగా గల్ఫ్‌కు వెళ్లేందుకు ప్రయత్నించాడు.
ఈ క్రమంలో జగిత్యాలకు చెందిన ఓ ఏజెంట్‌ నెలకు రూ.లక్ష వేతనం వస్తుందని నమ్మించాడు. దీంతో సుదర్శన్‌గౌడ్‌ ఉక్రెయిన్‌కు వెళ్లాడు.
అక్కడ బీకేపీ కంపెనీలో పనిచేశాడు. అయితే రెండు నెలల క్రితం రష్యా జరిపిన డ్రోన్ బాంబు దాడిలో ఆయన ప్రాణాలు కోల్పోయాడు.
అయితే ఇప్పటివరకు సుదర్శన్‌గౌడ్‌ మృతదేహం స్వగ్రామానికి చేరలేదు. ఆయన కుటుంబం తీవ్ర విషాదంలో ఉంది.
సుదర్శన్‌తో పాటు ఉక్రెయిన్‌కు వెళ్లిన మరో ఐదుగురు తెలంగాణ యువకులు అక్కడే చిక్కుకుపోయారు. ప్రతిరోజూ భయంతో కాలం గడుపుతున్నారు.
కనుకయ్యకు రష్యా పౌరసత్వం.. ఆర్మీలో చేరిక
కరీంనగర్‌ జిల్లా రామడుగు మండలం రామచంద్రాపురానికి చెందిన ఎడవెల్లి కనుకయ్య ఉపాధి కోసం రష్యా వెళ్లాడు.
ఫిబ్రవరి 10న ఓ ఏజెంట్‌కు రూ.2.50 లక్షలు చెల్లించాడు. అక్కడికి వెళ్లిన తర్వాత మూడు నెలల పాటు పనిచేశాడు.
ఆ తర్వాత ఆయనకు ఆర్మీ విభాగంలో శిక్షణ ఇచ్చారు. భారత పౌరసత్వాన్ని వదులుకుంటున్నట్లు కనుకయ్యతో నోటరీ చేయించుకున్నట్లు సమాచారం.
అనంతరం రష్యా పౌరసత్వం ఇచ్చారు. రష్యా పాస్‌పోర్టు అందించి ఉక్రెయిన్ సరిహద్దుల్లోని యుద్ధ క్షేత్రానికి పంపించారు.
గత నాలుగు నెలలుగా కనుకయ్య రష్యా ఆర్మీతో కలిసి పనిచేస్తున్నాడు. అక్కడి నుంచి బయటపడలేక తీవ్ర ఇబ్బందులు ఎదుర్కొంటున్నట్లు తెలుస్తోంది.
మరికొందరు తెలంగాణ యువకులదీ అదే పరిస్థితి
జగిత్యాల జిల్లా కోరుట్లకు చెందిన ముక్కెర రాజ్‌కుమార్‌ గతంలో జగిత్యాల కలెక్టరేట్‌లో ఔట్‌సోర్సింగ్ ఉద్యోగిగా పనిచేశాడు.
మెరుగైన ఉపాధి కోసం రూ.2.50 లక్షలు చెల్లించి రష్యా వెళ్లాడు. అక్కడ ఆయన కూడా రష్యా పౌరసత్వం తీసుకోవాల్సి వచ్చిందని సమాచారం.
నిజామాబాద్‌ జిల్లాకు చెందిన భూక్యా రవీందర్‌, పెద్దవాల్గోట్‌కు చెందిన సిర్ష అశోక్‌, చెరువుతండాకు చెందిన మెగావత్‌ ప్రకాశ్‌ కూడా రష్యా వెళ్లారు.
కామారెడ్డి జిల్లా తాడ్కోల్‌కు చెందిన అప్జల్‌ఖాన్‌ యుద్ధంలో గాయపడినట్లు సమాచారం.
వీరితో పాటు పోతురాజ్‌ విజయ్‌కుమార్‌, గుజ్జు జగబంధు, మాణిక్యాల నరేశ్‌, కరీంనగర్‌ జిల్లా నారాయణపూర్‌కు చెందిన దొమ్మాటి కిషన్‌ కూడా రష్యా వెళ్లినట్లు వివరాలు ఉన్నాయి. వీరంతా మొదట లేబర్ పనుల కోసం వెళ్లి, ఆ తర్వాత రష్యా పౌరసత్వం తీసుకుని సైన్యంలో పనిచేస్తున్నారని ఆరోపణలు ఉన్నాయి.
ఏజెంట్ల మోసాలే ప్రధాన కారణమా?
తెలంగాణ యువకులు యుద్ధ క్షేత్రాలకు చేరడానికి ఏజెంట్ల మోసాలే ప్రధాన కారణమనే ఆరోపణలు వస్తున్నాయి. స్థానికంగా ఉన్న కొందరు ఏజెంట్లు యువకులకు భారీ జీతాలు ఆశ చూపిస్తున్నారు. రష్యా, ఉక్రెయిన్‌లో ఉన్న ఏజెంట్లతో సంబంధాలు పెట్టుకుని వారిని విదేశాలకు పంపిస్తున్నారు.
విదేశాలకు వెళ్లిన తర్వాత మొదట మూడు నెలల పాటు సాధారణ పనులు చూపిస్తున్నారని బాధితుల కుటుంబాలు చెబుతున్నాయి. ఆ తర్వాత ఆర్మీలో పనిచేయాలని చెబుతున్నారని ఆరోపిస్తున్నాయి. నోటరీ పత్రాలపై సంతకాలు తీసుకుని రష్యా పౌరసత్వం ఇస్తున్నారని సమాచారం.
యువకులకు భారత కరెన్సీలో రూ.8 లక్షలు ఇస్తామని చెప్పి, అందులో రూ.4 లక్షలను అక్కడి ఏజెంట్లు తీసుకుంటున్నారనే ఆరోపణలు ఉన్నాయి. దీంతో ఉపాధి కోసం వెళ్లిన యువకులు ఆర్థికంగా నష్టపోవడమే కాకుండా ప్రాణాపాయ పరిస్థితుల్లో చిక్కుకుంటున్నారు.
తెలంగాణ యువకుల రక్షణపై కేంద్రం స్పందించాలి
రష్యా, ఉక్రెయిన్ దేశాల్లో చిక్కుకున్న భారతీయ యువకులను రక్షించే విషయంలో కేంద్ర ప్రభుత్వం తగిన చర్యలు తీసుకోవడం లేదనే విమర్శలు వస్తున్నాయి. ఉత్తర తెలంగాణలోని నిజామాబాద్‌, కామారెడ్డి, కరీంనగర్‌, జగిత్యాల, ఆదిలాబాద్‌ జిల్లాలకు చెందిన పలువురు యువకులు అక్కడి ఆర్మీ క్యాంపుల్లో ఉన్నట్లు సమాచారం.
విదేశాలకు పంపిస్తున్న రిక్రూటర్ల వివరాలను గుర్తించడంలో ప్రభుత్వ యంత్రాంగం విఫలమవుతోందనే ఆరోపణలు ఉన్నాయి. రష్యాలోని భారత కాన్సులేట్‌ కూడా బాధితులకు తగిన సహాయం అందించాలని కుటుంబాలు కోరుతున్నాయి.
తమవారిని సురక్షితంగా స్వదేశానికి తీసుకురావాలని బాధిత కుటుంబాలు కేంద్ర ప్రభుత్వాన్ని వేడుకుంటున్నాయి. విదేశాల్లో ఉన్న భారతీయుల భద్రతపై ప్రత్యేక దృష్టి పెట్టాలని విజ్ఞప్తి చేస్తున్నాయి.
ప్రవాసీ ప్రజావాణి ఫిర్యాదులపై రేవంత్‌ సర్కార్‌ నిర్లక్ష్యమా?
తెలంగాణ యువకులు విదేశాల్లో చిక్కుకున్న విషయంపై రాష్ట్ర ప్రభుత్వానికి కూడా ఫిర్యాదులు అందుతున్నాయి. గత మూడు నెలలుగా ప్రవాసీ ప్రజావాణిలో బాధిత కుటుంబాలు తమ సమస్యలను వెల్లడిస్తున్నాయి. అయినప్పటికీ ప్రభుత్వం ఇప్పటివరకు సమగ్ర సమీక్ష నిర్వహించలేదనే విమర్శలు వినిపిస్తున్నాయి.
ప్రవాసీ అంశాలను పర్యవేక్షిస్తున్న మంత్రి దుద్దిళ్ల శ్రీధర్‌బాబు ఈ వ్యవహారంపై స్పందించాలని బాధిత కుటుంబాలు కోరుతున్నాయి. ముఖ్యమంత్రి రేవంత్‌రెడ్డి కూడా ప్రత్యేక ప్రకటన చేసి బాధితులను ఆదుకోవాలని విజ్ఞప్తి చేస్తున్నాయి.
తమ కుటుంబ సభ్యులు యుద్ధ క్షేత్రంలో ప్రాణభయంతో బతుకుతున్నారని, వారిని రక్షించేందుకు ప్రభుత్వం వెంటనే చర్యలు తీసుకోవాలని కుటుంబ సభ్యులు కోరుతున్నారు.
కేంద్ర, రాష్ట్ర ప్రభుత్వాలు కలిసి చర్యలు తీసుకోవాలి
రష్యాలో చిక్కుకున్న తెలంగాణ యువకులను వెంటనే స్వదేశానికి తీసుకురావాలని తెలంగాణ గల్ఫ్ జేఏసీ వైస్ ప్రెసిడెంట్ గంగుల మురళీధర్‌ రెడ్డి కోరారు. పౌరసత్వ మార్పిడి, పాస్‌పోర్టుల జారీ, మిలటరీ బ్యాడ్జ్‌ల వ్యవహారంపై కేంద్ర, రాష్ట్ర ప్రభుత్వాలు సీరియస్‌గా దృష్టి పెట్టాలని సూచించారు.
యువకులను విదేశాలకు పంపించిన స్థానిక ఏజెంట్లతో పాటు రష్యాలో ఉన్న ఏజెంట్ల పాత్రపై సమగ్ర విచారణ జరపాలని అన్నారు. బాధితులు చెల్లించిన డబ్బును తిరిగి ఇప్పించాలని కోరారు. ఈ వ్యవహారంలో తప్పు చేసిన వారిపై కఠిన చర్యలు తీసుకోవాలని డిమాండ్ చేశారు.
విదేశాలకు వెళ్లే తెలంగాణ ప్రజలకు సరైన సమాచారం అందించాలని సూచించారు. విదేశాల్లో ఇబ్బందులు ఎదుర్కొంటున్న వారిని ఆదుకునేందుకు ప్రత్యేక బోర్డు ఏర్పాటు చేయాలని కోరారు.
ఉపాధి కోసం విదేశాలకు వెళ్లిన తెలంగాణ యువకులు యుద్ధ క్షేత్రాల్లో చిక్కుకోవడం ఆందోళన కలిగిస్తోంది. వారి భద్రతపై ప్రభుత్వాలు వెంటనే స్పందించాల్సిన అవసరం ఉంది.