హైదరాబాద్లోని ఖైరతాబాద్ రాజకీయాలు మరోసారి ఆసక్తికరంగా మారాయి. కాంగ్రెస్ పార్టీకి రాబోయే రోజుల్లో గట్టి ఎదురుదెబ్బ తగలబోతోందని మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్ రావు అన్నారు. ఖైరతాబాద్లో బీఆర్ఎస్ పార్టీ మీద గెలిచి, ఆ తర్వాత పార్టీ మారిన దానం నాగేందర్పై హైకోర్టు అనర్హత వేటు వేసిందని గుర్తుచేశారు. త్వరలోనే ఎన్నికలు రాబోతున్నాయని చెప్పారు. ఈ సమయంలో ఖైరతాబాద్లో కాంగ్రెస్ పార్టీ ఖాళీ అవుతుందని వ్యాఖ్యానించారు. ఇది బీఆర్ఎస్ విజయానికి గొప్ప సూచిక అని అన్నారు.
సోమాజిగూడ డివిజన్ యువ నాయకుడు మహేశ్ యాదవ్ ఆధ్వర్యంలో పలువురు నాయకులు, కార్యకర్తలు బీఆర్ఎస్లో చేరారు. త్రినాథ్తో పాటు పలువురు కార్యకర్తలు మాజీ మంత్రులు హరీశ్ రావు, తలసాని శ్రీనివాస్ యాదవ్ సమక్షంలో గులాబీ పార్టీలో చేరారు. ఈ సందర్భంగా హరీశ్ రావు వారికి గులాబీ కండువాలు కప్పి పార్టీలోకి ఆహ్వానించారు.
రాష్ట్రంలో మళ్లీ బీఆర్ఎస్ ప్రభుత్వమే వస్తుంది
ఈ సందర్భంగా హరీశ్ రావు కాంగ్రెస్ ప్రభుత్వంపై విమర్శలు చేశారు. రాష్ట్రంలో ఇటీవల నిర్వహించిన సర్వేలన్నీ బీఆర్ఎస్కు అనుకూలంగా ఉన్నాయని చెప్పారు.
ముఖ్యమంత్రి రేవంత్ రెడ్డి సర్వే చేయించినా, వివిధ సంస్థలు సర్వేలు నిర్వహించినా ఫలితం ఒక్కటేనని అన్నారు.
రాష్ట్రంలోని ప్రజలు మళ్లీ బీఆర్ఎస్ ప్రభుత్వాన్ని కోరుకుంటున్నారని హరీశ్ రావు పేర్కొన్నారు. కేసీఆర్ ముఖ్యమంత్రి కావాలని అన్ని సర్వేలు చెబుతున్నాయని అన్నారు.
రాబోయే ఎన్నికల్లో బీఆర్ఎస్ తిరిగి అధికారంలోకి వస్తుందని ధీమా వ్యక్తం చేశారు.
ప్రస్తుత కాంగ్రెస్ పాలనపై ప్రజల్లో అసంతృప్తి పెరుగుతోందని ఆయన విమర్శించారు. ప్రభుత్వ పనితీరు, అభివృద్ధి కార్యక్రమాల విషయంలో కాంగ్రెస్ పార్టీ ప్రజలకు ఇచ్చిన హామీలను నెరవేర్చడం లేదని ఆరోపించారు.
పరిశ్రమలను ఎలా ఆకర్షిస్తారు.. రేవంత్ రెడ్డిపై హరీశ్ రావు ఫైర్
తెలంగాణకు పరిశ్రమలను తీసుకొస్తానని, భారత్ సమ్మిట్ నిర్వహిస్తానని ముఖ్యమంత్రి రేవంత్ రెడ్డి చెబుతున్నారని హరీశ్ రావు విమర్శించారు.
అయితే రాష్ట్రంలో పరిశ్రమల శాఖకు రెండేళ్ల నుంచి కార్యదర్శి లేరని ఆరోపించారు. ఐటీ శాఖకు కూడా ప్రత్యేక కార్యదర్శి లేరని అన్నారు.
పరిశ్రమలను ఆకర్షించాలంటే ముందుగా ఆయా శాఖల్లో కీలక అధికారులను నియమించాలని హరీశ్ రావు సూచించారు. పరిశ్రమల శాఖకు ఒక ప్రిన్సిపల్ సెక్రటరీ ఉండాలని చెప్పారు.
అలాగే ఐటీ శాఖకు కూడా ప్రత్యేకంగా ఒక ప్రిన్సిపల్ సెక్రటరీ అవసరమని అన్నారు.
ప్రస్తుతం చీఫ్ సెక్రటరీనే ఇన్చార్జ్గా పెట్టి రెండు శాఖలను నడిపిస్తున్నారని విమర్శించారు. చీఫ్ సెక్రటరీకి ఇప్పటికే అనేక బాధ్యతలు ఉంటాయని చెప్పారు. అలాంటి పరిస్థితుల్లో పరిశ్రమల ప్రతినిధులకు, పారిశ్రామికవేత్తలకు ఆయన ఎంత సమయం కేటాయించగలరని ప్రశ్నించారు.
ఐటీ కంపెనీలతో సమావేశాలు నిర్వహించడానికి, వారి సమస్యలు తెలుసుకోవడానికి ప్రత్యేకంగా సమయం కేటాయించడం అవసరమని అన్నారు.
కానీ కాంగ్రెస్ ప్రభుత్వం కనీసం పరిశ్రమల శాఖకు, ఐటీ శాఖకు ప్రత్యేక కార్యదర్శులను కూడా నియమించలేకపోయిందని విమర్శించారు.
హైదరాబాద్ బ్రాండ్ ఇమేజ్పై కాంగ్రెస్కు ప్రశ్నలు
హైదరాబాద్ బ్రాండ్ ఇమేజ్ గురించి కాంగ్రెస్ నాయకులు మాట్లాడుతున్నారని హరీశ్ రావు అన్నారు. ఒకవైపు హైదరాబాద్ను అంతర్జాతీయ స్థాయిలో అభివృద్ధి చేస్తామని చెబుతూ, మరోవైపు పరిశ్రమలు, ఐటీ రంగాలకు అవసరమైన అధికారులను నియమించకపోవడం ఏమిటని ప్రశ్నించారు.
పరిశ్రమలకు అనుకూలమైన వాతావరణం కల్పించకుండా పెట్టుబడులను ఎలా ఆకర్షిస్తారని నిలదీశారు.
రాష్ట్రంలో ఐటీ, పారిశ్రామిక రంగాల అభివృద్ధికి అవసరమైన పరిపాలనా వ్యవస్థను ముందుగా బలోపేతం చేయాలని సూచించారు.
ఖైరతాబాద్లో దానం నాగేందర్ వ్యవహారం, సోమాజిగూడలో బీఆర్ఎస్లోకి కొత్త చేరికలు, రాష్ట్రంలో కాంగ్రెస్ పాలనపై విమర్శలతో హరీశ్ రావు చేసిన వ్యాఖ్యలు రాజకీయంగా ప్రాధాన్యం సంతరించుకున్నాయి.
రాబోయే ఎన్నికల్లో బీఆర్ఎస్ విజయం సాధిస్తుందని ఆయన మరోసారి ధీమా వ్యక్తం చేశారు.



