ముఖ్యమంత్రి నారా చంద్రబాబు నాయుడు నేటి నుంచి (జనవరి 30, 2026) మూడు రోజుల పాటు తన సొంత నియోజకవర్గం కుప్పంలో పర్యటించనున్నారు. ఈ పర్యటనలో భాగంగా నియోజకవర్గాన్ని పారిశ్రామికంగా, పర్యాటక పరంగా తీర్చిదిద్దే లక్ష్యంతో సుమారు రూ. 690 కోట్ల విలువైన అభివృద్ధి పనులకు శంకుస్థాపనలు మరియు ప్రారంభోత్సవాలు చేయనున్నారు.
కుప్పం అభివృద్ధిలో భాగంగా రూ. 675.24 కోట్ల పెట్టుబడులతో ఏడు కంపెనీలతో ఎంఓయూలు (MoUs) కుదుర్చుకోనున్నారు. దీని ద్వారా సుమారు 12,000 మంది యువతకు ఉపాధి లభించనుంది. గుడిపల్లిలో రూ. 3 కోట్లతో నిర్మించిన అగస్త్య విద్యాచల్ అకాడమీ ప్రారంభం, రూ. 10 కోట్లతో లెర్నర్స్ అకామిడేషన్ ఫెసిలిటీకి శంకుస్థాపన. కుప్పం మున్సిపాలిటీలో ‘స్వర్ణ నవదిశ’ కో-వర్కింగ్ స్పేస్ మరియు ఆదిత్య బిర్లా మల్టీ స్కిల్ డెవలప్మెంట్ సెంటర్ ప్రారంభోత్సవం. కంగుంది హెరిటేజ్ విలేజ్, బౌల్డరింగ్ పార్క్ మరియు పున్నమి రిసార్ట్ ప్రారంభం. ‘డిస్కవర్ కుప్పం’ టూరిజం వెబ్సైట్ ఆవిష్కరణ. శనివారం బెగ్గులపల్లెలో పెన్షన్ల పంపిణీ మరియు 5,555 ఈ-సైకిళ్ల పంపిణీ కార్యక్రమంలో పాల్గొంటారు. ఆదివారం పార్టీ కార్యకర్తలతో మరియు కుప్పం ఏరియా డెవలప్మెంట్ అథారిటీ (KADA) అధికారులతో సమీక్ష నిర్వహించి సాయంత్రం అమరావతికి తిరిగి పయనమవుతారు.