నెల్లూరు నగరంలోని మూలపేటలో ఉన్న శ్రీమత్ ద్రౌపతి దేవి సమేత శ్రీ కృష్ణ ధర్మరాజ దేవస్థానం చారిత్రకమైన, శతాబ్దాలనాటి పవిత్ర పుణ్యక్షేత్రంగా ప్రసిద్ధి పొందింది. అగ్నికులజుల కులదైవంగా ఆరాధించే ఈ ఆలయం పురాణాల్లో విశేషమైన స్థానం కలిగిఉంది. హిమాలయ ప్రాంతంలో జంభుమహర్షి నిర్వహించిన మహాయాగం నుండి స్వాయంభువమనువు, ద్రౌపతి దేవి అగ్నిజాతులుగా అవతరించినట్లు స్థల పురాణం తెలుపుతుంది.
సుమారు ఒక ఎకరంలో నిర్మితమైన ఈ దేవాలయం తూర్పు ముఖద్వారం, విశాల ప్రాంగణం, శాక్తేయ–ద్రావిడ పూజా సంప్రదాయాలతో ప్రత్యేక గుర్తింపు పొందింది. ప్రధాన మూలవిగ్రహాలైన ద్రౌపతి దేవి, పార్థసారథి-యుధిష్ఠిరులు, అలాగే దక్షిణాన పరీక్షిత్తు, ఉత్తరాన వ్యాసభగవాన్, దౌమ్య మహర్షుల శిలావిగ్రహాలు అత్యంత అపూర్వమైనవిగా భావిస్తారు.
ఆలయంలోని నైరుతి దిశలో ఉన్న నాగుల పుట్ట, ప్రతి నాగుల చవితికి వేలాది మంది భక్తులను ఆకర్షిస్తుంది. ఈశాన్యదిశలోని పవిత్ర బావి తీర్తం అత్యంత పవిత్రంగా భావించబడుతుంది; ఈ నీరు పాపాలను నివారించడమే కాక రోగ విముక్తిని ఇస్తుందనే నమ్మకం ఉంది.
పోతురాజు విగ్రహం, మునీశ్వరుడు–సప్తకన్యల గుడి, యాగశాల వంటి నిర్మాణాలు ఆలయ విశిష్టతను మరింత పెంచుతున్నాయి. ఆలయంలో వివాహాలు, కేశఖండనాలు, పొంగల్ ఉత్సవాలు సహా అనేక ప్రత్యేక కార్యక్రమాలు నిత్యం నిర్వహించబడుతున్నాయి.