ఉత్తరప్రదేశ్లోని అయోధ్య రామమందిరానికి సంబంధించిన విరాళాల దుర్వినియోగంపై వివాదం తలెత్తింది. ఈ ఆరోపణలపై దర్యాప్తు చేయడానికి రాష్ట్ర ప్రభుత్వం ముగ్గురు సభ్యుల ప్రత్యేక దర్యాప్తు బృందాన్ని (SIT) ఏర్పాటు చేసింది. సిట్ బృందం ఆలయానికి వచ్చిన విరాళాలు, రామమందిర ట్రస్ట్ ఆర్థిక వ్యవహారాలకు సంబంధించిన ఆరోపణలను పరిశీలించనుంది. ఈ నెల ప్రారంభంలో సమాజ్వాదీ పార్టీ చీఫ్ అఖిలేష్ యాదవ్, రామాలయానికి విరాళంగా వచ్చిన కోట్ల రూపాయలు మాయమయ్యాయని ఆరోపించడంతో ఈ విషయం వెలుగులోకి వచ్చింది. దీనిపై న్యాయవ్యవస్థ సుమోటోగా స్పందించి విచారణ చేపట్టాలని ఆయన కోరారు.
దీనిపై ఆలయ ట్రస్ట్ జనరల్ సెక్రటరీ చంపత్ రాయ్ స్పందిస్తూ.. ట్రస్ట్ క్రమం తప్పకుండా అంతర్గత ఆడిట్లను నిర్వహిస్తుందని, ప్రస్తుత ఆడిట్ ప్రక్రియ ఇంకా కొనసాగుతోందని చెప్పారు. ఇప్పటి వరకు ఆడిట్ లో ఎలాంటి పెద్ద అవకతవకలు గుర్తించలేదని ఆయన అన్నారు. శ్రీ రామ జన్మభూమి తీర్థ క్షేత్ర ట్రస్ట్ అభ్యర్థన మేరకు, ఈ వ్యవహారంపై దర్యాప్తు చేసేందుకు రాష్ట్ర ప్రభుత్వం ముగ్గురు సభ్యులతో కూడిన సిట్ను ప్రకటించింది. ఈ ప్యానెల్లో లక్నో డివిజనల్ కమిషనర్ విజయ్ విశ్వాస్ పంత్, ఐజీ (లక్నో రేంజ్) కిరణ్ ఎస్, ఆర్థిక శాఖ ప్రత్యేక కార్యదర్శి నీల్ రతన్ ఉన్నారు. వీరు సమగ్ర దర్యాప్తు చేసి ప్రభుత్వానికి నివేదిక సమర్పించనున్నారు. శుక్రవారం అయోధ్యలో నగదు విరాళాలను లెక్కించే పనిలో ఉన్న ఒక ఉద్యోగి నివాసం నుండి ₹10 లక్షలు స్వాధీనం చేసుకోవడంతో, రాష్ట్ర ప్రభుత్వం వెంటనే సిట్ను ఏర్పాటు చేసింది.
