బాలిలో పెట్రోల్ కొరత.. బంకుల వద్ద భారీగా వాహనాలు
Indonesia: ఇండోనేషియాలోని ప్రముఖ పర్యాటక ద్వీపం బాలిలో పెట్రోల్ కోసం వాహనదారులు తీవ్ర ఇబ్బందులు ఎదుర్కొంటున్నారు.
ఈ వారం ద్వీపంలోని పలు పెట్రోల్ బంకుల వద్ద ద్విచక్ర వాహనాలు, కార్లు భారీగా బారులు తీరాయి.
పెట్రోల్ కోసం గంటల తరబడి వేచి చూడాల్సిన పరిస్థితి ఏర్పడింది. కొన్ని ప్రాంతాల్లో వాహనాల క్యూలు ప్రధాన రహదారుల వరకు విస్తరించాయి.
ఆదివారం నుంచి ఈ పరిస్థితి కొనసాగుతోంది. సాంకేతిక సమస్యలు, ప్రతికూల వాతావరణం, ట్యాంకర్ల రాకలో ఆలస్యం, ఒక్కసారిగా పెరిగిన డిమాండ్ కారణంగా ఇంధన పంపిణీకి ఆటంకాలు ఏర్పడ్డాయని అధికారులు బుధవారం తెలిపారు.
అయితే, ద్వీపంలో ఇంధన నిల్వలు పూర్తిగా అయిపోలేదని స్పష్టం చేశారు.
ట్యాంకర్ల రాకలో ఆలస్యం.. సరఫరాపై ప్రభావం
ఇంధన, ఖనిజ వనరుల మంత్రిత్వ శాఖలోని చమురు, సహజ వాయువు విభాగం డైరెక్టర్ జనరల్ లావోడె సులేమాన్ ఈ సమస్యపై స్పందించారు.
ఇది ఇంధన నిల్వల కొరత కాదని, ప్రధానంగా పంపిణీకి సంబంధించిన సమస్య అని వివరించారు.
బాలికి ఇంధనం తీసుకొస్తున్న ఓ ట్యాంకర్ ఆలస్యంగా చేరిందని చెప్పారు.
ట్యాంకర్ నుంచి ఇంధనాన్ని దించేందుకు సిద్ధమవుతున్న సమయంలో లంగరుకు సంబంధించిన సమస్య తలెత్తిందని తెలిపారు.
దీంతో ద్వీపంలోని ప్రధాన ఇంధన నిల్వ కేంద్రాలకు సరఫరా ఆలస్యమైందన్నారు.
అయితే, ఆ ట్యాంకర్ ఇప్పుడు చేరుకుందని సులేమాన్ వెల్లడించారు. మంగళవారం నుంచి 24 గంటల పాటు ఇంధన సరఫరా కొనసాగుతోందని చెప్పారు.
ప్రతికూల వాతావరణం కూడా కారణమే
సముద్రంలో అలల ఉద్ధృతి, ప్రతికూల వాతావరణం కారణంగా ఇంధన రవాణా నెమ్మదించింది.
దెన్పసార్‌లోని సంగరన్, తూర్పు బాలిలోని మంగిస్ టెర్మినళ్లకు ఇంధనం చేరడంలో జాప్యం జరిగిందని అధికారులు తెలిపారు.
టెర్మినళ్ల నుంచి పెట్రోల్ బంకులకు ఇంధనం చేరేందుకు మరింత సమయం పట్టింది.
దీనివల్ల కొన్ని ప్రాంతాల్లో పెట్రోల్ కోసం వాహనదారులు ఎక్కువసేపు వేచి ఉండాల్సి వచ్చింది.
సబ్సిడీ పెట్రోల్ కోసం పెరిగిన డిమాండ్
ప్రభుత్వ సబ్సిడీతో లభించే పెర్టలైట్ పెట్రోల్‌కు డిమాండ్ పెరగడం కూడా పరిస్థితిని తీవ్రతరం చేసింది.
సబ్సిడీ లేని ఇంధనంతో పోలిస్తే పెర్టలైట్ ధర తక్కువగా ఉంటుంది.
ఇంధన కొరత ఏర్పడుతుందనే ఆందోళనతో వాహనదారులు ముందుగానే పెట్రోల్ కొనుగోలు చేసేందుకు ప్రయత్నించారు.
దీంతో కొన్ని బంకుల వద్ద డిమాండ్ ఒక్కసారిగా పెరిగింది. అందుబాటులో ఉన్న నిల్వలపై ఒత్తిడి ఎక్కువైంది.
కొన్ని పెట్రోల్ బంకుల వద్ద ఇంధనం అందుబాటులో లేదని తెలిపే బోర్డులు ఏర్పాటు చేశారు. సరఫరా కోసం ఎదురుచూస్తూ వాహనదారులు బంకుల బయటే నిలిచిపోయారు.
ఏడు గంటలుగా ఎదురుచూస్తున్నాం
పెట్రోల్ కోసం గంటల తరబడి వేచి ఉండాల్సి రావడంపై స్థానికులు అసహనం వ్యక్తం చేస్తున్నారు.
ఎండలో నిలబడి ఇంధనం కోసం ఎదురుచూడాల్సి వస్తోందని ఆవేదన వ్యక్తం చేస్తున్నారు.
స్థానికురాలు మడే మార్లియాంటి మాట్లాడుతూ, సుమారు ఏడు గంటలుగా పెట్రోల్ కోసం ఎదురుచూస్తున్నట్లు చెప్పారు.
ఈ విధంగా క్యూలో సమయం గడపడం వల్ల రోజువారీ పనులు చేసుకోలేకపోతున్నామని ఆమె ఆవేదన వ్యక్తం చేశారు.
ఫ్యాషన్ దుకాణం యజమాని ఫెబి మార్షా కూడా అధికారుల నిర్వహణ తీరుపై అసంతృప్తి వ్యక్తం చేశారు. ఇంధనం ఉన్నప్పటికీ సరఫరా పరిమితంగా ఉందని చెప్పారు. ఇలాంటి పరిస్థితులు తలెత్తకుండా అధికారులు ముందుగానే క్యూలను సక్రమంగా నిర్వహించాలని సూచించారు.
పరిస్థితిని అదుపు చేసేందుకు భద్రతా సిబ్బంది
బుధవారం వివిధ ప్రాంతాల నుంచి వచ్చిన ఫొటోలు, వీడియోల్లో పెట్రోల్ బంకుల వద్ద భారీగా వాహనాలు నిలిచిపోయిన దృశ్యాలు కనిపించాయి. కొన్ని చోట్ల ఇంధన పంపులు పనిచేయకపోవడంతో వాహనదారులు ఇబ్బందులు పడ్డారు.
బంకుల వద్ద రద్దీని నియంత్రించేందుకు అధికారులు భద్రతా సిబ్బందితో పాటు సైనికులను కూడా మోహరించారు. పర్యాటక రంగంపై ఎక్కువగా ఆధారపడే బాలిలో రవాణా వ్యవస్థకు ఇంధనం చాలా కీలకం. అందువల్ల ఈ సమస్య స్థానికులతో పాటు వ్యాపారులపైనా ప్రభావం చూపుతోంది.
ఇంధన నిల్వలు సరిపడా ఉన్నాయి: బాలీ గవర్నర్
బాలీ గవర్నర్ ఐ వయాన్ కోస్టర్ ఇంధన సరఫరాపై స్పందించారు. నిల్వ కేంద్రాల్లో తగినంత ఇంధనం ఉందని చెప్పారు. ట్యాంకర్లు ఆలస్యంగా చేరడం, రహదారులపై రద్దీ కారణంగా పెట్రోల్ బంకులకు సరఫరా నెమ్మదించిందని వివరించారు.
ప్రజలు ఆందోళన చెందవద్దని కోరారు. ద్వీపంలోని వివిధ ప్రాంతాలకు అదనపు ఇంధనాన్ని పంపిస్తున్నట్లు తెలిపారు.
ప్రభుత్వ రంగ ఇంధన సంస్థ పెర్టమినా కూడా పరిస్థితిని నిశితంగా పర్యవేక్షిస్తున్నట్లు వెల్లడించింది. 1.8 కోట్ల లీటర్ల (48 లక్షల గ్యాలన్ల) పెర్టలైట్, 25 లక్షల లీటర్ల (6.6 లక్షల గ్యాలన్ల) పెర్టమాక్స్ పెట్రోల్‌తో ఓ ట్యాంకర్ చేరుకున్నట్లు తెలిపింది.
పెర్టమాక్స్ అనేది అధిక ఆక్టేన్ విలువ కలిగిన, సబ్సిడీ లేని పెట్రోల్. ఈ ఇంధన సరఫరాతో బంకుల వద్ద పరిస్థితి మెరుగుపడుతుందని అధికారులు ఆశిస్తున్నారు.
అంతర్జాతీయ పరిస్థితుల ప్రభావం
మరోవైపు, మధ్యప్రాచ్యంలో కొనసాగుతున్న ఉద్రిక్తతలు అంతర్జాతీయ నౌకా రవాణా మార్గాలపై ప్రభావం చూపుతున్నాయి. దీంతో ఇండోనేషియా ఇంధన దిగుమతుల విషయంలోనూ సవాళ్లను ఎదుర్కొంటోంది.
ఇంధనంపై ప్రభుత్వ సబ్సిడీల భారం పెరుగుతున్నప్పటికీ, ద్రవ్యోల్బణాన్ని అదుపులో ఉంచడం, కుటుంబాల కొనుగోలు శక్తిని కాపాడడం లక్ష్యంగా అధ్యక్షుడు ప్రబోవో సుబియాంటో ఈ ఏడాది చివరి వరకు సబ్సిడీ పెట్రోల్ ధరలను మార్చకుండా కొనసాగిస్తున్నారు.
ప్రస్తుతం బాలిలో ప్రధాన సమస్య ఇంధన నిల్వలు పూర్తిగా లేకపోవడం కంటే, వాటిని పెట్రోల్ బంకులకు సకాలంలో చేరవేయడంలో ఎదురైన ఇబ్బందులేనని అధికారులు చెబుతున్నారు. అదనపు సరఫరా, రవాణా వ్యవస్థ మెరుగుదలతో పరిస్థితి సాధారణ స్థితికి వస్తుందా అనేది చూడాలి.