ఉద్యోగం నుంచి తొలగించారన్న పగ.. రూ.20 లక్షల కోసం కిడ్నాప్
సికింద్రాబాద్ బొల్లారంలోని గేటెడ్ కమ్యూనిటీలో ఐదేళ్ల చిన్నారి కిడ్నాప్, హత్య కేసులో పోలీసులు కీలక పురోగతి సాధించారు. ఈ దారుణానికి పాల్పడిన మాజీ సెక్యూరిటీ గార్డు విక్రమ్ కుమార్‌ను అరెస్ట్ చేశారు.
ఉద్యోగం నుంచి తొలగించారన్న పగతో పాటు డబ్బుల కోసం చిన్నారిని కిడ్నాప్ చేసి హత్య చేసినట్లు నిందితుడు అంగీకరించాడని మల్కాజ్‌గిరి పోలీస్ కమిషనర్ బి. సుమతి సోమవారం వెల్లడించారు.
ఈ ఘటన స్థానికంగా తీవ్ర కలకలం రేపింది. చిన్నారి మృతితో కుటుంబ సభ్యులు కన్నీరుమున్నీరవుతున్నారు. నిందితుడిని కఠినంగా శిక్షించాలని కమ్యూనిటీ నివాసితులు డిమాండ్ చేస్తున్నారు.
చిన్నారి కిడ్నాప్.. ఆ తర్వాత ఏం జరిగింది?
పోలీసులు తెలిపిన వివరాల ప్రకారం.. శనివారం సాయంత్రం చిన్నారి గేటెడ్ కమ్యూనిటీలోని క్లబ్‌హౌస్ సమీపంలో సైకిల్ ఆడుకుంటోంది.
అదే సమయంలో మాజీ సెక్యూరిటీ గార్డు విక్రమ్ కుమార్ చిన్నారిని కిడ్నాప్ చేసినట్లు పోలీసులు గుర్తించారు.
రాత్రి 7 గంటలైనా పాప ఇంటికి తిరిగి రాకపోవడంతో కుటుంబ సభ్యులు ఆందోళనకు గురయ్యారు.
వెంటనే చిన్నారి కోసం పరిసర ప్రాంతాల్లో వెతకడం ప్రారంభించారు. ఇంతలో చిన్నారి తండ్రికి గుర్తుతెలియని నంబర్ నుంచి ఫోన్ వచ్చింది.
పాపను విడిచిపెట్టాలంటే రూ.20 లక్షలు ఇవ్వాలని ఫోన్ చేసిన వ్యక్తి డిమాండ్ చేశాడు.
ఆ తర్వాత ఆ ఫోన్ నంబర్ స్విచ్ ఆఫ్ అయింది. దీంతో కుటుంబ సభ్యులు పోలీసులను ఆశ్రయించారు.
చిన్నారి కిడ్నాప్‌పై ఫిర్యాదు అందుకున్న పోలీసులు వెంటనే దర్యాప్తు ప్రారంభించారు.
వాటర్ సంప్‌లో చిన్నారి మృతదేహం
కేసును సీరియస్‌గా తీసుకున్న పోలీసులు ప్రత్యేక బృందాలను ఏర్పాటు చేశారు. ఫోన్ కాల్ డేటా ఆధారంగా నిందితుడి ఆచూకీ కోసం గాలింపు చేపట్టారు. మొదట సికింద్రాబాద్ రైల్వే స్టేషన్ పరిసరాల్లో తనిఖీలు నిర్వహించారు. అయితే అక్కడ ఎలాంటి ఆధారాలు లభించలేదు.
దీంతో పోలీసులు గేటెడ్ కమ్యూనిటీలోనే విస్తృతంగా తనిఖీలు చేపట్టారు.
ఈ క్రమంలో విల్లా ఆర్కిడ్స్‌లోని క్లబ్‌హౌస్ సెల్లార్‌లో ఉన్న వాటర్ సంప్‌లో చిన్నారి మృతదేహాన్ని గుర్తించారు.
ఆదివారం ఈ ఘటన వెలుగులోకి వచ్చింది.
ఈ కేసులో అనుమానితుడిగా ఉన్న బీహార్‌కు చెందిన విక్రమ్ కుమార్‌ను పోలీసులు ఆదివారం సాయంత్రం 4:30 గంటలకు అరెస్ట్ చేశారు.
విచారణలో ఉద్యోగం నుంచి తొలగించారన్న పగతో పాటు డబ్బుల కోసం ఈ నేరానికి పాల్పడినట్లు అతడు అంగీకరించాడని పోలీసులు తెలిపారు.
ఉద్యోగం నుంచి తొలగించడంతో పగ పెంచుకున్న నిందితుడు
పోలీసుల కథనం ప్రకారం.. విక్రమ్ కుమార్ గతంలో అదే గేటెడ్ కమ్యూనిటీలో సెక్యూరిటీ గార్డుగా పనిచేశాడు.
అతడి ప్రవర్తన సరిగా లేకపోవడంతో అక్టోబర్ 6న ఉద్యోగం నుంచి తొలగించారు.
ఈ నిర్ణయం తీసుకున్న కమిటీలో చిన్నారి తాత కూడా ఉన్నారు. దీంతో ఆయనపై విక్రమ్ పగ పెంచుకున్నట్లు పోలీసులు తెలిపారు.
ఉద్యోగం కోల్పోయినందుకు ప్రతీకారం తీర్చుకోవడంతో పాటు డబ్బు సంపాదించాలనే ఉద్దేశంతో చిన్నారిని కిడ్నాప్ చేసినట్లు విచారణలో వెల్లడైందని పేర్కొన్నారు.
సీసీ కెమెరాలకు చిక్కకుండా బయటకు తీసుకెళ్లలేనని భావించి..
చిన్నారిని కిడ్నాప్ చేసిన తర్వాత విక్రమ్ డబ్బులు డిమాండ్ చేసినట్లు పోలీసులు తెలిపారు.
ఇది కూడా చదవండి
సాయి పల్లవి చీరకట్టుకు ఫిదా అవుతున్న ఫ్యాన్స్.. దీపావళికి పర్ఫెక్ట్ ట్రెడిషనల్ లుక్!
అయితే చిన్నారిని బయటకు తీసుకెళ్తే సీసీ కెమెరాలకు చిక్కే అవకాశం ఉందని అతడు భావించినట్లు వెల్లడించారు.
చిన్నారిని తన వద్ద ఎక్కువసేపు ఉంచుకుంటే పట్టుబడతానని భావించి హత్యకు పాల్పడినట్లు నిందితుడు తన వాంగ్మూలంలో చెప్పాడని పోలీసులు పేర్కొన్నారు. చిన్నారి పొట్టకు ఇటుకలు కట్టి వాటర్ సంప్‌లో పడేసినట్లు విచారణలో వెల్లడైందని తెలిపారు.
ఈ ఘటనతో గేటెడ్ కమ్యూనిటీలోని నివాసితులు తీవ్ర ఆగ్రహం వ్యక్తం చేస్తున్నారు. చిన్నారికి న్యాయం చేయాలని, నిందితుడికి కఠిన శిక్ష విధించాలని డిమాండ్ చేస్తున్నారు.
పోలీసు కార్యాలయం వద్ద ఉద్రిక్తత
మల్కాజ్‌గిరి పోలీస్ కమిషనర్ బి. సుమతి మీడియా సమావేశం నిర్వహిస్తున్న సమయంలో చిన్నారి తల్లిదండ్రులు, కమ్యూనిటీ నివాసితులు పోలీసు కార్యాలయానికి చేరుకున్నారు. అక్కడ ఆందోళన చేపట్టారు.
చిన్నారికి న్యాయం చేయాలని, నిందితుడిని కఠినంగా శిక్షించాలని కోరుతూ ప్లకార్డులు ప్రదర్శించారు. నిందితుడిని తమకు అప్పగించాలని డిమాండ్ చేశారు. వెంటనే న్యాయం జరగాలని నినాదాలు చేశారు.
ఆందోళనకారులకు డీసీపీ సి.హెచ్. శ్రీధర్ నచ్చజెప్పే ప్రయత్నం చేశారు. ఈ కేసులో చట్ట ప్రకారం చర్యలు తీసుకుంటామని హామీ ఇచ్చారు. విచారణ వేగంగా పూర్తయ్యేలా ఫాస్ట్ ట్రాక్ కోర్టు ఏర్పాటు చేస్తామని తెలిపారు.
నిందితుడికి కఠిన శిక్ష పడేలా చూస్తాం: కమిషనర్
ఈ ఘటనపై పోలీస్ కమిషనర్ బి. సుమతి స్పందించారు. సమాజంలో చట్టానికి ప్రాధాన్యం ఉంటుందని స్పష్టం చేశారు. నిందితుడిపై చట్ట ప్రకారం చర్యలు తీసుకుంటామని భరోసా ఇచ్చారు.
“మనం నాగరిక సమాజంలో ఉన్నాం. చట్టప్రకారం నిందితుడికి కఠిన శిక్ష పడేలా చూస్తాం” అని కమిషనర్ సుమతి స్పష్టం చేశారు.
చిన్నారి హత్య కేసులో నిందితుడిని అరెస్ట్ చేసిన పోలీసులు, దర్యాప్తును కొనసాగిస్తున్నారు. ఈ ఘటనకు సంబంధించిన పూర్తి వివరాలను సేకరిస్తున్నారు.