బీఆర్ఎస్ యువత ఆధ్వర్యంలో ప్రత్యేక కార్యక్రమం
కేటీఆర్ ప్రారంభించనున్న రక్తదాన శిబిరం.. రైతుల పక్షాన నిలుస్తామంటున్న నేతలు
హైదరాబాద్: హైదరాబాద్లోని తెలంగాణ భవన్లో నేడు బీఆర్ఎస్ ఆధ్వర్యంలో భారీ రక్తదాన శిబిరాన్ని నిర్వహిస్తున్నారు. బీఆర్ఎస్ యువత ఈ కార్యక్రమాన్ని ఏర్పాటు చేసింది. పార్టీ నేతలు, కార్యకర్తలు, యువజన విభాగం ప్రతినిధులు పెద్ద సంఖ్యలో ఈ శిబిరంలో పాల్గొననున్నారు.
రేవంత్ వ్యాఖ్యలపై నిరసన
ఇటీవల ముఖ్యమంత్రి రేవంత్ రెడ్డి చేసిన వ్యాఖ్యలు రాజకీయంగా చర్చకు దారితీశాయి. బీఆర్ఎస్ నేతల రక్తంతోనే నేలను తడిపి పంటలను రక్షించాలని ఆయన చేసిన వ్యాఖ్యలపై బీఆర్ఎస్ తీవ్ర అభ్యంతరం వ్యక్తం చేసింది. ఆ వ్యాఖ్యలకు నిరసనగా ఈ రక్తదాన శిబిరాన్ని నిర్వహిస్తున్నట్లు పార్టీ నాయకులు తెలిపారు.
ఈ కార్యక్రమానికి “రేవంత్ రక్తదాహానికి… బీఆర్ఎస్ రక్తదానం” అనే నినాదాన్ని బీఆర్ఎస్ ప్రకటించింది. అదే నినాదంతో పార్టీ కార్యకర్తలు రక్తదానం చేయనున్నారు.
రక్తదాన శిబిరాన్నికేటీఆర్ చేతుల మీదుగా ప్రారంభం
ఈ రక్తదాన శిబిరాన్ని బీఆర్ఎస్ వర్కింగ్ ప్రెసిడెంట్ కేటీఆర్ ప్రారంభించనున్నారు. కార్యక్రమంలో పార్టీకి చెందిన పలువురు సీనియర్ నేతలు, ఎమ్మెల్యేలు, మాజీ ప్రజాప్రతినిధులు, బీఆర్ఎస్వీ నాయకులు పాల్గొననున్నారు.
రక్తదానం చేసే ప్రతి ఒక్కరికి పార్టీ తరఫున అభినందనలు తెలియజేయనున్నారు. ఎక్కువ మంది యువత రక్తదానంలో భాగస్వాములు కావాలని నేతలు పిలుపునిచ్చారు.
బీఆర్ఎస్ రక్తదాన శిబిరం రైతుల కోసం రక్తం ఇవ్వడానికి సిద్ధం
ఈ వేదికపై రైతుల సమస్యలపై కూడా బీఆర్ఎస్ తన వైఖరిని వెల్లడించనుంది. రైతులకు అవసరమైతే తాము రక్తం ఇవ్వడానికి కూడా సిద్ధంగా ఉన్నామని పార్టీ నేతలు చెప్పనున్నారు.
రైతుల సంక్షేమం కోసం ఎప్పుడూ తమ పోరాటం కొనసాగుతుందని స్పష్టం చేయనున్నారు.
ప్రజా సమస్యలపై పోరాటం కొనసాగిస్తూనే సామాజిక బాధ్యతలో భాగంగా రక్తదాన శిబిరాలను నిర్వహించడం తమ సంప్రదాయమని బీఆర్ఎస్ నాయకులు పేర్కొంటున్నారు.
రక్తదానం ద్వారా ప్రాణాలను కాపాడటంతో పాటు సమాజానికి సేవ చేయాలనే సందేశాన్ని ఈ కార్యక్రమం ద్వారా ఇవ్వాలని పార్టీ భావిస్తోంది.
ఈ శిబిరానికి రాష్ట్రంలోని వివిధ ప్రాంతాల నుంచి బీఆర్ఎస్ కార్యకర్తలు, బీఆర్ఎస్వీ నాయకులు, యువత పెద్ద సంఖ్యలో హాజరయ్యే అవకాశం ఉంది.
రాజకీయ నిరసనతో పాటు సామాజిక సేవను కలిపి నిర్వహిస్తున్న ఈ కార్యక్రమం రాష్ట్ర రాజకీయాల్లో ఆసక్తికరంగా మారింది.