సోనియా గాంధీని విమర్శించే స్థాయి బండి సంజయ్‌కు లేదు: ఎంపీ చామల

వందేమాతరం విషయంలో కాంగ్రెస్ నేతలపై బండి సంజయ్ వ్యాఖ్యలు

బీజేపీ, బీఆర్ఎస్‌పై చామల కిరణ్ కుమార్ రెడ్డి విమర్శలు

సోనియా గాంధీపై వ్యాఖ్యలు చేసే స్థాయి బండి సంజయ్‌కు లేదు

వందేమాతరం గీతం విషయంలో కాంగ్రెస్ అగ్రనేతలు సోనియా గాంధీ, మల్లికార్జున ఖర్గేల వైఖరిపై కేంద్రమంత్రి బండి సంజయ్ చేసిన వ్యాఖ్యలకు భువనగిరి ఎంపీ చామల కిరణ్ కుమార్ రెడ్డి తీవ్రంగా స్పందించారు.

సోనియా గాంధీపై అనుచిత వ్యాఖ్యలు చేసే స్థాయి బండి సంజయ్‌కు లేదని అన్నారు.

దేశ సంప్రదాయాలు, చరిత్ర తెలిసిన సోనియా గాంధీ ప్రత్యేక తెలంగాణ రాష్ట్రాన్ని ఇచ్చారని చామల కిరణ్ కుమార్ రెడ్డి చెప్పారు.

ఆమె పుణ్యంతోనే తెలంగాణ రాష్ట్రం ఏర్పడిందని, అందుకే తామంతా నేడు ఎంపీలుగా ఉన్నామని స్పష్టం చేశారు.

తెలంగాణలో బీజేపీ అధికారంలోకి రావడం పగటి కల

తెలంగాణలో బీజేపీ అధికారంలోకి రావడం కేవలం పగటి కల మాత్రమేనని చామల కిరణ్ కుమార్ రెడ్డి ఎద్దేవా చేశారు.

2014 నుంచి కేంద్రంలో బీజేపీ అధికారంలో ఉన్నప్పటికీ రాష్ట్ర ప్రజలకు ఆ పార్టీపై నమ్మకం లేదన్నారు.

బీఆర్ఎస్, బీజేపీలు కుమ్మక్కై మ్యాచ్ ఫిక్సింగ్ రాజకీయాలు చేస్తున్నాయని ఆరోపించారు.

కేసీఆర్ హయాంలో జరిగిన కాళేశ్వరం, ఫార్ములా ఈ-కార్ రేస్ అవినీతిపై బీజేపీ ఎందుకు మౌనంగా ఉందో బండి సంజయ్ సమాధానం చెప్పాలని డిమాండ్ చేశారు.

కాంగ్రెస్ ప్రభుత్వం సంక్షేమ పథకాలు అమలు చేస్తోంది

కాంగ్రెస్ ప్రభుత్వం అధికారంలోకి వచ్చిన వెంటనే రూ. 22 వేల కోట్ల రుణమాఫీ చేసిందని చామల తెలిపారు.

రైతు భరోసా, పంట బోనస్, మహిళలకు ఉచిత బస్సు ప్రయాణం, ఇందిరమ్మ ఇళ్లు, ఉచిత కరెంటు, సబ్సిడీ గ్యాస్ సిలిండర్ల వంటి సంక్షేమ పథకాలను అమలు చేస్తోందని చెప్పారు.

తెలంగాణ ప్రజలు కాంగ్రెస్‌ను గెలిపించారనే కక్షతోనే కేంద్రం రాష్ట్రానికి రావాల్సిన నిధులను అడ్డుకుంటోందని ఆరోపించారు.

ట్రిపుల్ ఆర్, మెట్రో ఫేజ్-2, మూసీ ప్రక్షాళన వంటి అభివృద్ధి కార్యక్రమాలను సీఎం రేవంత్ రెడ్డి చేపడుతుంటే, పేరు వస్తుందనే భయంతోనే బీజేపీ నేతలు వాటిని అడ్డుకుంటున్నారని మండిపడ్డారు.

వందేమాతరంపై బండి సంజయ్ వ్యాఖ్యలు

ఇదిలా ఉంటే.. హైదరాబాద్‌లో బండి సంజయ్ మాట్లాడుతూ, కాంగ్రెస్ అగ్రనేతలు సోనియా గాంధీ, మల్లికార్జున ఖర్గేల వైఖరి చూసి దేశ ప్రజలంతా విస్మయం చెందుతున్నారని అన్నారు.

స్వాతంత్ర్య దినోత్సవ వేడుకల సందర్భంగా వందేమాతరం గీతాలాపనను నిరోధించడం అత్యంత దురదృష్టకరమని పేర్కొన్నారు.

దేశంలో కేవలం కాంగ్రెస్, మజ్లిస్ పార్టీలు మాత్రమే వందేమాతరాన్ని వ్యతిరేకిస్తున్నాయని బండి సంజయ్ ఆరోపించారు.

ఈ రెండు పార్టీలకు ప్రజలు తగిన రీతిలో బుద్ధి చెప్పాల్సిన అవసరం ఉందని అన్నారు.

స్వాతంత్య్ర పోరాట కాలంలో దేశ ప్రజల్లో స్ఫూర్తిని రగిల్చిన వందేమాతరం గీతం పట్ల కాంగ్రెస్ పార్టీ వ్యవహరిస్తున్న తీరు సరికాదని బండి సంజయ్ హితవు పలికారు.