దావూద్ ఇబ్రహీం అడ్డాపై బుల్డోజర్ యాక్షన్.. భెండీ బజార్‌లో కూల్చివేతకు BMC సిద్ధం!

November 18, 2026 3:32 PM

దావూద్ ఇబ్రహీం అడ్డాపై బుల్డోజర్ యాక్షన్..!

ముంబై అండర్‌వరల్డ్ డాన్ దావూద్ ఇబ్రహీం పేరు చెబితే ఒకప్పుడు గుర్తుకొచ్చే భవనం ఇప్పుడు నేలమట్టం కానుంది. దావూద్ నివసించిన, తన నేర సామ్రాజ్య కార్యకలాపాలకు కేంద్రంగా ఉపయోగించుకున్న భవనం వద్దకు బుల్డోజర్లు చేరుకున్నాయి. దక్షిణ ముంబైలోని భెండీ బజార్ ప్రాంతంలో ఉన్న హాజీ ఇస్మాయిల్ హాజీ హబీబ్ ముసాఫిర్‌ఖానాను పూర్తిగా కూల్చివేసేందుకు బృహన్ ముంబై మున్సిపల్ కార్పొరేషన్ (BMC) చర్యలు చేపట్టింది.

రోడ్డు విస్తరణ పనుల్లో భాగంగా ఈ నిర్ణయం తీసుకున్నారు. మరోవైపు భవనం అత్యంత శిథిలావస్థకు చేరడంతో ప్రమాదకరంగా మారింది. దీంతో మిగిలిన నిర్మాణాలను తొలగించాలని అధికారులు నిర్ణయించారు. అయితే భవనంలోని ప్రార్థనా మందిరం విషయంలో వివాదం నెలకొంది.

1939లో యాత్రికుల కోసం నిర్మాణం

ఈ ముసాఫిర్‌ఖానాను 1939 ప్రాంతంలో నిర్మించారు. హజ్ యాత్రకు వెళ్లే యాత్రికులు తాత్కాలికంగా విశ్రాంతి తీసుకునేందుకు దీనిని ఏర్పాటు చేశారు. అయితే కాలక్రమేణా ఈ భవనం మరో విధంగా వార్తల్లోకి వచ్చింది.

1970, 1980 దశకాల్లో ముంబై అండర్‌వరల్డ్‌లో దావూద్ ఇబ్రహీం ప్రభావం పెరిగింది. ఆ సమయంలో ఈ భవనంలోని రెండో అంతస్తును అతడు తన ఆధీనంలోకి తీసుకున్నట్లు కథనాలు చెబుతున్నాయి. అక్కడే అతడి నివాసం, కార్యాలయం ఉండేవని సమాచారం.

స్మగ్లింగ్ ద్వారా తీసుకొచ్చిన అక్రమ వస్తువులను కూడా ఈ భవనంలో నిల్వ చేసేవారని తెలుస్తోంది. దీంతో ఈ భవనం దావూద్ కార్యకలాపాలకు కీలక కేంద్రంగా మారింది.

కుటుంబంతో కలిసి రెండో అంతస్తులో నివాసం

దావూద్ ఇబ్రహీం తన కుటుంబంతో కలిసి ఈ భవనంలోని రెండో అంతస్తులో నివసించేవాడు. అతడి తండ్రి ఇబ్రహీం కస్కర్ పోలీసు శాఖలో హెడ్ కానిస్టేబుల్‌గా పనిచేశారు.

1986లో దావూద్ భారత్ విడిచిపెట్టి వెళ్లిపోయాడు. అయినప్పటికీ అతడి అనుచరులు ఈ భవనంలో తమ కార్యకలాపాలు కొనసాగించినట్లు సమాచారం.

1993 ముంబై వరుస బాంబు పేలుళ్ల కుట్రకు సంబంధించిన చర్చలు కూడా ఈ భవనంలోని రెండో అంతస్తులో ఉన్న కార్యాలయంలోనే జరిగినట్లు కథనాలు పేర్కొన్నాయి.

దావూద్ కుటుంబానికి భవనంపై యాజమాన్య హక్కులు లేవు

ఈ భవనంతో దావూద్ కుటుంబానికి సంబంధం ఉన్నప్పటికీ, దానిపై వారికి అధికారిక యాజమాన్య హక్కులు లేవని ప్రభుత్వ రికార్డులు, న్యాయపత్రాలు వెల్లడిస్తున్నాయి. దావూద్‌తో పాటు కస్కర్ కుటుంబ సభ్యుల్లో ఎవరికీ ఈ భవనంపై చట్టబద్ధమైన యాజమాన్య పత్రాలు లేవని తెలుస్తోంది.

ఈ భవనం హాజీ ఇస్మాయిల్ హాజీ హబీబ్ ముసాఫిర్‌ఖానా ట్రస్ట్‌కు చెందినది. 2015 నవంబర్‌లో చారిటీ కమిషనర్ అనుమతితో ఈ భవనాన్ని సైఫీ బుర్హానీ అప్‌లిఫ్ట్‌మెంట్ ట్రస్ట్ (SBUT)కు విక్రయించేందుకు ఆమోదం లభించింది. ఇందుకోసం రూ.1.10 కోట్ల ధరను నిర్ణయించారు.

ప్రస్తుతం భెండీ బజార్ ప్రాంతంలో SBUT భారీ పునరాభివృద్ధి కార్యక్రమాన్ని చేపడుతోంది.

SAFEMA చట్టం కింద దావూద్ కుటుంబ ఆస్తుల స్వాధీనం

1993 ముంబై బాంబు పేలుళ్ల తర్వాత దావూద్ కుటుంబానికి చెందిన ఆస్తులను స్వాధీనం చేసుకునేందుకు కేంద్ర ప్రభుత్వం చర్యలు ప్రారంభించింది. SAFEMA చట్టం కింద ఈ ప్రక్రియ చేపట్టింది.

దావూద్ తల్లి అమీనా బీ, సోదరి హసీనా పార్కర్ ఈ చర్యలను సవాల్ చేశారు. తొలుత ఢిల్లీ హైకోర్టును ఆశ్రయించారు. అనంతరం సుప్రీంకోర్టులోనూ పిటిషన్లు దాఖలు చేశారు.

అయితే 2018 ఏప్రిల్ 20న సుప్రీంకోర్టు వారి పిటిషన్లను కొట్టివేసింది. ముంబైలోని కుటుంబ ఆస్తులను స్వాధీనం చేసుకోవాలని ప్రభుత్వాన్ని ఆదేశించింది.

మరోవైపు TADA చట్టం కింద దావూద్ ఆధీనంలో ఉన్న రెండో అంతస్తును కూడా కోర్టు అటాచ్ చేసింది.

C-1 కేటగిరీలో భవనం.. కూల్చివేతకు కోర్టు అనుమతి

ఈ భవనం పూర్తిగా శిథిలావస్థకు చేరింది. దీంతో BMC అధికారులు దీనిని C-1 కేటగిరీ కింద ప్రమాదకర భవనంగా గుర్తించారు.

2020 ఆగస్టులో బాంబే హైకోర్టు కూల్చివేతకు అనుమతి ఇచ్చింది. దీంతో అధికారులు భవనాన్ని ఖాళీ చేయించారు. దావూద్ నివసించిన మొదటి, రెండో అంతస్తుల్లోని ప్రధాన గదులను ఇప్పటికే తొలగించారు.

ప్రస్తుతం మొదటి అంతస్తులో సుమారు 10 గదులు, గ్రౌండ్ ఫ్లోర్‌లో ప్రార్థనా మందిరం మాత్రమే మిగిలాయి.

నవంబర్ 16న BMC తాజాగా నోటీసులు జారీ చేసింది. నవంబర్ 18, 19 తేదీల్లో మిగిలిన నిర్మాణాలను తొలగించేందుకు చర్యలు చేపట్టింది.

ప్రార్థనా మందిరంపై వివాదం.. మసీదు అని స్థానికుల వాదన

కూల్చివేత ప్రక్రియలో ఇప్పుడు ప్రధాన సమస్య ప్రార్థనా మందిరం రూపంలో ఎదురైంది. గ్రౌండ్ ఫ్లోర్‌లో ఉన్న నిర్మాణాన్ని BMC ప్రార్థనా మందిరంగా పేర్కొంటోంది.

అయితే స్థానికులు, దుకాణదారులు, మహారాష్ట్ర వక్ఫ్ బోర్డు దీనిపై అభ్యంతరం వ్యక్తం చేస్తున్నారు. ఇది 140 ఏళ్ల పురాతన మసీదు అని, వక్ఫ్ ఆస్తి అని వారు వాదిస్తున్నారు.

ఈ భవనాన్ని SBUTకు విక్రయించడం కూడా చట్టబద్ధం కాదని అభ్యంతరాలు వ్యక్తం చేస్తున్నారు. ఈ వ్యవహారంపై వక్ఫ్ ట్రిబ్యునల్‌లో న్యాయపోరాటం కొనసాగుతోంది.

BMC చర్యలను తప్పుబట్టిన వారిస్ పఠాన్

AIMIM నేత వారిస్ పఠాన్ BMC కూల్చివేత చర్యలను తీవ్రంగా వ్యతిరేకించారు. సుప్రీంకోర్టు, వక్ఫ్ ట్రిబ్యునల్ స్టే ఉత్తర్వులు ఉన్నప్పటికీ కూల్చివేత నోటీసులు ఇవ్వడం చట్టవిరుద్ధమని ఆరోపించారు.

తమ వాదనలు వినిపించేందుకు కనీసం 15 రోజుల సమయం ఇవ్వాలని ఆయన కోరారు. న్యాయపరమైన అంశాలను పరిశీలించకుండా తొందరపాటు చర్యలు తీసుకోవద్దని అభిప్రాయపడ్డారు.

కాంగ్రెస్ ఎమ్మెల్యే అమిన్ పటేల్ అభ్యంతరం

కాంగ్రెస్ ఎమ్మెల్యే అమిన్ పటేల్ కూడా BMC చర్యలను వ్యతిరేకించారు. ట్రస్ట్ చేపడుతున్న అభివృద్ధి కార్యక్రమాలకు తాము వ్యతిరేకం కాదని స్పష్టం చేశారు.

అయితే ఈ వివాదం న్యాయస్థానంలో పెండింగ్‌లో ఉన్నప్పుడు ఇరువర్గాల వాదనలు వినకుండా ఏకపక్షంగా చర్యలు తీసుకోవడం సరికాదని పేర్కొన్నారు.

మరోవైపు కూల్చివేత సమయంలో ఎలాంటి శాంతిభద్రతల సమస్యలు తలెత్తకుండా BMC అధికారులు, పోలీసులు ముందస్తు ఏర్పాట్లు చేస్తున్నారు.

కనుమరుగుకానున్న దావూద్ గత జ్ఞాపకాలు!

ఒకప్పుడు ముంబై అండర్‌వరల్డ్ కార్యకలాపాలకు కేంద్రంగా నిలిచిన ఈ భవనం ఇప్పుడు పూర్తిగా కనుమరుగయ్యే పరిస్థితి ఏర్పడింది. దావూద్ ఇబ్రహీం నివసించిన గదులు ఇప్పటికే తొలగించారు. మిగిలిన నిర్మాణాలను కూడా కూల్చేందుకు అధికారులు సిద్ధమయ్యారు.

అయితే ప్రార్థనా మందిరం విషయంలో వివాదం, భవనం యాజమాన్య హక్కులపై కొనసాగుతున్న న్యాయపోరాటం ఈ వ్యవహారాన్ని మరింత క్లిష్టంగా మార్చాయి. BMC కూల్చివేత చర్యలు ఎలాంటి పరిణామాలకు దారితీస్తాయో చూడాలి.


ఆటోమొబైల్, వ్యాపారం, టెక్నాలజీ, ఫైనాన్స్, వినోదం, విద్య మరియు క్రీడలతో సహా వివిధ వర్గాలలో తాజా మరియు అత్యంత విశ్వసనీయ వార్తలను అందించే మీ విశ్వసనీయ వార్తల వేదిక!

Follow Us On Social Media

Get Latest Update On Social Media