బైక్పై వచ్చి పోలీసులకు చిక్కకుండా పరార్.. సీసీ కెమెరాలతో గాలింపు
విద్యార్థినులను వేధిస్తున్న యువకుడు
స్థానికంగా ఉన్న ఓ బాలికల పాఠశాల వద్ద గత కొన్ని రోజులుగా ఓ యువకుడు విద్యార్థినులను వేధిస్తున్నాడు.
విద్యార్థినులు వెళ్లే సమయంలో అడ్రస్ అడుగుతున్నట్లు నటిస్తూ.. వారికి అసభ్యకరమైన చిత్రాలు చూపిస్తున్నాడు.
దీంతో బాలికలు భయాందోళనకు గురయ్యారు. కొందరు విద్యార్థినులు బడికి రావడానికే భయపడే పరిస్థితి ఏర్పడింది.
ఆ యువకుడు ఎవరో తెలుసుకునేందుకు ప్రయత్నించినా వివరాలు తెలియలేదు.
చివరకు విద్యార్థినులు కన్నీటిపర్యంతమవుతూ పక్కనే ఉన్న తహశీల్దార్ గోపాలకృష్ణకు విషయం చెప్పారు.
మారువేశంలో తహశీల్దార్, పోలీసులు
విద్యార్థినుల ఫిర్యాదుతో తహశీల్దార్ గోపాలకృష్ణ ఆగంతకుడి కోసం ఆరా తీశారు. ఎలాంటి సమాచారం లభించకపోవడంతో ఆయనే రంగంలోకి దిగారు.
మరుసటి రోజు మాస్క్ ధరించి మారువేశంలో పాఠశాల వద్ద నిఘా పెట్టారు.
సీఐ రాంబాబు, కానిస్టేబుళ్ల సహకారంతో అనుమానం రాకుండా కాపు కాశారు.
తహశీల్దార్ ఒకసారి సైకిల్పై, మరోసారి బైక్పై తిరుగుతూ పోలీసు సిబ్బందితో మాట్లాడుతూ అక్కడే ఉన్నారు.
పోలీసులను చూసి బైక్పై పరార్
అనుకున్నట్లుగానే ఆ ఆగంతకుడు బైక్పై పాఠశాల వద్దకు వచ్చాడు
అతడిని గుర్తించిన ఓ విద్యార్థిని ధైర్యంగా మాస్క్ ధరించి ఉన్న తహశీల్దార్ వద్దకు వెళ్లి సమాచారం అందించింది.
దీంతో తహశీల్దార్, సీఐ, పోలీసు సిబ్బంది అప్రమత్తమయ్యారు. బైక్పై వెళ్లేందుకు సిద్ధమైన యువకుడిని పట్టుకునేందుకు ప్రయత్నించారు.
అయితే వారి మధ్య దూరం ఎక్కువగా ఉండటంతో అతడు బైక్ ఆపకుండా వేగంగా అక్కడి నుంచి పరారయ్యాడు. పోలీసులు వెంబడించినా అతడిని పట్టుకోలేకపోయారు.
సీసీ కెమెరాలతో గాలింపు
యువకుడు బైక్పై పాఠశాల వద్దకు వచ్చిన దృశ్యాలు సమీపంలోని సీసీ కెమెరాల్లో రికార్డయ్యాయి.
ఆ దృశ్యాల ఆధారంగా పోలీసులు నిందితుడి కోసం గాలింపు ముమ్మరం చేశారు.
ఈ ఘటన తర్వాత తహశీల్దార్ గోపాలకృష్ణ, సీఐ రాంబాబు పాఠశాలకు వెళ్లి విద్యార్థినులు, ఉపాధ్యాయులకు భరోసా కల్పించారు. ఆగంతకుల పట్ల అప్రమత్తంగా ఉండాలని సూచించారు.
ఎవరూ భయపడాల్సిన అవసరం లేదని చెప్పారు. ఏదైనా సమస్య ఎదురైతే వెంటనే తమకు ఫోన్ చేయాలని నంబర్లు అందించారు.
విద్యార్థినుల పట్ల అసభ్యకరంగా ప్రవర్తిస్తే ఉపేక్షించేది లేదని అధికారులు హెచ్చరించారు.