ఫేస్‌బుక్ పరిచయం.. ట్రేడింగ్ పేరుతో భారీ మోసం

రూ.14.61 కోట్లు పోగొట్టుకున్న దంత వైద్యుడు

హైదరాబాద్‌: హైదరాబాద్‌లో మరో భారీ సైబర్ మోసం వెలుగులోకి వచ్చింది. సోషల్ మీడియాలో పరిచయమైన ఓ మహిళ మాటలు నమ్మిన 44 ఏళ్ల దంత వైద్యుడు ఏకంగా రూ.14.61 కోట్లు నష్టపోయాడు. ఎర్రగడ్డకు చెందిన ఈ వైద్యుడిని నకిలీ ట్రేడింగ్ ప్లాట్‌ఫామ్ ద్వారా సైబర్ నేరగాళ్లు మోసం చేశారు. ఈ ఘటన హైదరాబాద్‌లో సంచలనంగా మారింది.

ఫేస్‌బుక్‌లో ‘హాయ్’ అంటూ మెసేజ్

వివరాల ప్రకారం.. ఆగస్టు 27న దంత వైద్యుడికి ఫేస్‌బుక్‌లో ఓ మహిళ నుంచి మెసేజ్ వచ్చింది. తన పేరు ‘మోనికా మాధవ్’ అని ఆమె పరిచయం చేసుకుంది. తాను చెన్నైలో ఉంటానని చెప్పింది.

మొదట ఇద్దరి మధ్య సాధారణ సంభాషణ మొదలైంది. తర్వాత వ్యక్తిగత విషయాలు మాట్లాడటం ప్రారంభించింది. ఆ తర్వాత సంభాషణను టెలిగ్రామ్‌కు మార్చింది.

తనకు పెళ్లైందని మోనికా చెప్పింది. భర్తతో విభేదాలు ఉన్నాయని తెలిపింది. త్వరలో విడాకులు తీసుకోబోతున్నట్లు నమ్మించింది.

ట్రేడింగ్‌తో రోజుకు రూ.5 లక్షలు సంపాదిస్తున్నానంటూ..

కొద్దిరోజుల తర్వాత మోనికా అసలు విషయాన్ని మొదలుపెట్టింది. తాను ట్రేడింగ్ చేస్తున్నానని చెప్పింది. దాని ద్వారా రోజుకు రూ.4 లక్షల నుంచి రూ.5 లక్షల వరకు సంపాదిస్తున్నానని నమ్మించింది.

తనతో కలిసి పెట్టుబడి పెడితే భారీగా లాభాలు వస్తాయని వైద్యుడికి చెప్పింది. ఆమె మాటలను నమ్మిన డాక్టర్ ట్రేడింగ్‌లో పెట్టుబడి పెట్టేందుకు సిద్ధమయ్యారు.

మొదట రూ.30 లక్షలు పెట్టుబడి

సెప్టెంబరు 3న మోనికా సూచించిన సైట్‌లో డాక్టర్ తొలిసారి రూ.30 లక్షలు డిపాజిట్ చేశారు. ఆ తర్వాత ఆ సైట్‌లో రూ.8.6 లక్షల లాభం వచ్చినట్లు కనిపించింది.

అంతేకాదు.. అందులోంచి రూ.85,000 విత్‌డ్రా చేసుకునే అవకాశం కూడా కల్పించారు. దీంతో డాక్టర్‌కు ఆ ప్లాట్‌ఫామ్‌పై మరింత నమ్మకం ఏర్పడింది.

రూ.10 కోట్లు పెట్టుబడి పెడదామని ప్రతిపాదన

మొదటి పెట్టుబడిపై లాభం వచ్చినట్లు చూపించడంతో డాక్టర్‌ను మోనికా మరింతగా నమ్మించింది. ఇద్దరం కలిసి రూ.10 కోట్లు పెట్టుబడి పెడదామని ప్రతిపాదించింది.

భారీ లాభాలు వస్తాయని ఆశ చూపించింది. దీంతో డాక్టర్ ఆమె మాటలకు అంగీకరించారు.

తన వద్ద ఉన్న పొదుపు మొత్తాలను పెట్టుబడిగా పెట్టారు. అంతేకాదు.. భారీగా అప్పులు కూడా చేశారు. విడతల వారీగా డబ్బులు చెల్లించారు.

నకిలీ యాప్‌లో రూ.14.51 కోట్లు

అలా మొత్తం రూ.14.51 కోట్లను నకిలీ ట్రేడింగ్ యాప్‌లో డిపాజిట్ చేశారు. ప్రతిసారీ పెట్టుబడి పెట్టిన తర్వాత ఖాతాలో లాభాలు పెరుగుతున్నట్లు సైట్లో చూపించారు.

చివరకు డాక్టర్ ఖాతాలో ఏకంగా రూ.34 కోట్ల లాభం ఉన్నట్లు కనిపించింది.

ఆ మొత్తాన్ని చూసిన డాక్టర్ తాను పెట్టిన డబ్బుకు భారీగా లాభం వచ్చిందని భావించారు.

డబ్బు విత్‌డ్రా చేసుకునే సమయంలో అసలు విషయం

ఖాతాలో కనిపిస్తున్న లాభాలను తన బ్యాంకు ఖాతాలోకి తీసుకోవాలని డాక్టర్ ప్రయత్నించారు. అయితే విత్‌డ్రా ఆప్షన్ పనిచేయలేదు.

దీంతో ఆయనకు అనుమానం వచ్చింది. ఈ విషయంపై మోనికాను సంప్రదించేందుకు ప్రయత్నించారు.

అయితే అప్పటికే ఆమె తన కాంటాక్ట్ నంబర్లను బ్లాక్ చేసింది. ఆ తర్వాత ఆమె ఆచూకీ లేకుండా పోయింది.

ట్యాక్స్ పేరుతో మరో రూ.7.5 కోట్లు

దీంతో డాక్టర్ నకిలీ ప్లాట్‌ఫామ్ కస్టమర్ కేర్‌ను సంప్రదించారు. అప్పుడు సైబర్ నేరగాళ్లు మరో కొత్త కథ చెప్పారు.

ఖాతాలో కనిపిస్తున్న లాభాలను విత్‌డ్రా చేసుకోవాలంటే ముందుగా రూ.7.5 కోట్లు ట్యాక్స్‌గా చెల్లించాలని చెప్పారు.

దీంతో డాక్టర్‌కు అసలు విషయం అర్థమైంది. తాను భారీ సైబర్ మోసానికి గురైనట్లు గుర్తించారు.

సైబర్ క్రైమ్ పోలీసులకు ఫిర్యాదు

వెంటనే బాధితుడు హైదరాబాద్ సైబర్ క్రైమ్ పోలీసులను ఆశ్రయించారు. జరిగిన విషయాలను పోలీసులకు వివరించారు.

ఫిర్యాదు స్వీకరించిన పోలీసులు కేసు నమోదు చేశారు. ఘటనపై దర్యాప్తు కొనసాగిస్తున్నారు.

ఒక్క వ్యక్తి నుంచి సైబర్ నేరగాళ్లు ఇంత భారీ మొత్తాన్ని కొల్లగొట్టిన ఘటనల్లో ఇది కూడా ఒకటిగా నిలిచింది. సోషల్ మీడియాలో పరిచయమయ్యే అపరిచితులను నమ్మి పెట్టుబడులు పెట్టొద్దని ఈ ఘటన మరోసారి హెచ్చరిస్తోంది.