రెండో–మూడో అంతస్తుల మధ్య వేలాడిన వ్యక్తి
హైదరాబాద్‌లో ఓ పాత లిఫ్ట్ ప్రమాదం కలకలం రేపింది. లిఫ్ట్ మొరాయించడంతో ఓ వ్యక్తి కాలు గ్రిల్స్‌లో ఇరుక్కుపోయింది.
దీంతో ఆయన రెండో అంతస్తు, మూడో అంతస్తు మధ్య ప్రాణాపాయ స్థితిలో వేలాడారు. సమాచారం అందుకున్న హైడ్రా డిజాస్టర్ రెస్పాన్స్ ఫోర్స్ (DRF) బృందం వెంటనే రంగంలోకి దిగింది.
సుమారు గంటన్నర పాటు శ్రమించి బాధితుడిని సురక్షితంగా బయటకు తీసింది.
మూసాపేట్ ఆంజనేయనగర్‌లో ఘటన
ఈ ఘటన హైదరాబాద్‌లోని మూసాపేట్ ఆంజనేయనగర్‌లో జరిగింది. అక్కడ ఓ మూడు అంతస్తుల పాత అపార్ట్‌మెంట్ ఉంది. ఆ భవనంలో పాతకాలపు గ్రిల్స్ ఉన్న లిఫ్ట్‌ను ఉపయోగిస్తున్నారు.
ఆదివారం ఉదయం మురళి (40) తన భార్యతో కలిసి గ్రౌండ్ ఫ్లోర్ నుంచి రెండో అంతస్తుకు వెళ్లేందుకు లిఫ్ట్ ఎక్కారు. లిఫ్ట్ రెండో అంతస్తుకు చేరుకుంది. దీంతో మురళి బయటకు అడుగు పెట్టేందుకు ప్రయత్నించారు.
సెన్సార్లు పనిచేయకపోవడంతో ప్రమాదం
మురళి లిఫ్ట్ నుంచి బయటకు వస్తున్న సమయంలోనే మూడో అంతస్తులో ఉన్న ఓ వ్యక్తి లిఫ్ట్ బటన్ నొక్కారు.
అదే సమయంలో లిఫ్ట్ గ్రిల్ డోర్ పూర్తిగా మూసుకోలేదు. లిఫ్ట్‌లోని సెన్సార్లు సరిగ్గా పనిచేయకపోవడంతో అది పైకి కదిలింది.
మురళి ఒక కాలు రెండో ఫ్లోర్‌పై పెట్టారు. మరో కాలు లిఫ్ట్ లోపలే ఉంది. లిఫ్ట్ ఒక్కసారిగా పైకి వెళ్లడంతో ఆయన కాలు గ్రిల్స్‌లో ఇరుక్కుంది. లిఫ్ట్‌కు, గోడకు మధ్య కాలు నలిగిపోయింది.
దీంతో మురళి తలకిందులుగా వేలాడిపోయారు. పరిస్థితి అత్యంత ప్రమాదకరంగా మారింది.
భార్య కేకలతో స్థానికులు అక్కడికి చేరుకున్నారు
లిఫ్ట్‌లో ఉన్న మురళి భార్య ఈ ఘటనను చూసి గట్టిగా కేకలు వేశారు. ఆమె అరుపులు విన్న స్థానికులు వెంటనే అక్కడికి చేరుకున్నారు.
మురళిని బయటకు తీసేందుకు ప్రయత్నించారు. అయితే లిఫ్ట్, గోడ మధ్య కాలు ఇరుక్కుపోవడంతో స్థానికుల ప్రయత్నాలు ఫలించలేదు.
పరిస్థితి విషమించడంతో వెంటనే హైడ్రా కంట్రోల్ రూమ్‌కు సమాచారం ఇచ్చారు.
రంగంలోకి దిగిన హైడ్రా DRF బృందం
సమాచారం అందిన వెంటనే కూకట్‌పల్లి పరిధిలో ఉన్న హైడ్రా డిజాస్టర్ రెస్పాన్స్ ఫోర్స్ (DRF) బృందం ఘటనా స్థలానికి చేరుకుంది. పరిస్థితిని పరిశీలించిన సిబ్బంది ప్రత్యేక రెస్క్యూ ఆపరేషన్ ప్రారంభించారు.
అదే సమయంలో సనత్‌నగర్ ఫైర్ సిబ్బందిని కూడా ఘటనా స్థలానికి రప్పించారు. లిఫ్ట్‌లో ఇరుక్కున్న మురళిని బయటకు తీసేందుకు ప్రత్యేక పరికరాలను ఉపయోగించారు.
గోడ పగులగొట్టి.. హైడ్రాలిక్ కట్టర్లతో రెస్క్యూ
మురళి కాలు లిఫ్ట్ గ్రిల్స్‌లో బలంగా ఇరుక్కుంది. దీంతో తొలుత లిఫ్ట్‌కు సంబంధించిన గోడను జాగ్రత్తగా పగులగొట్టారు. ఆ తర్వాత ఫైర్ సిబ్బంది వద్ద ఉన్న హైడ్రాలిక్ కట్టర్లను ఉపయోగించారు.
గ్రిల్స్‌ను ఒక్కో భాగంగా జాగ్రత్తగా కట్ చేశారు. మురళికి మరింత గాయం కాకుండా సిబ్బంది అప్రమత్తంగా వ్యవహరించారు. రెస్క్యూ ఆపరేషన్ మొత్తం అత్యంత జాగ్రత్తగా కొనసాగింది.
గంటన్నర తర్వాత సురక్షితంగా బయటకు
మురళిని బయటకు తీసేందుకు హైడ్రా, ఫైర్ సిబ్బంది దాదాపు గంటన్నర పాటు శ్రమించారు. చివరకు ఉదయం సరిగ్గా 10:50 గంటలకు ఆయనను సురక్షితంగా బయటకు తీశారు.
ఈ ప్రమాదంలో మురళి కాలు లిఫ్ట్, గోడ మధ్య నలిగిపోయింది. దీంతో కాలికి తీవ్ర ఫ్రాక్చర్ అయినట్లు సమాచారం. రెస్క్యూ పూర్తయిన వెంటనే మురళిని చికిత్స కోసం సమీపంలోని ప్రైవేట్ ఆసుపత్రికి తరలించారు.
హైడ్రా, ఫైర్ సిబ్బందికి ప్రశంసలు
ప్రమాదం గురించి సమాచారం అందిన వెంటనే స్పందించిన హైడ్రా, అగ్నిమాపక సిబ్బంది మురళి ప్రాణాలను కాపాడారు. క్లిష్ట పరిస్థితుల్లో గంటన్నర పాటు శ్రమించి రెస్క్యూ ఆపరేషన్ పూర్తి చేశారు.
సకాలంలో స్పందించి బాధితుడిని సురక్షితంగా బయటకు తీసిన హైడ్రా, ఫైర్ సిబ్బందిని స్థానికులు ప్రశంసించారు.