ఐస్బాత్ అంటే ఏమిటి?
ఐస్బాత్ అంటే చాలా చల్లని నీటిలో కొద్దిసేపు శరీరాన్ని ఉంచడం. ముఖ్యంగా క్రీడాకారులు, ఫిట్‌నెస్‌ చేసేవారు దీన్ని ఎక్కువగా పాటిస్తుంటారు. వ్యాయామం తర్వాత కండరాల నొప్పులు, అలసట తగ్గుతాయని చాలామంది ఐస్బాత్ చేస్తుంటారు.
ఇటీవల సెలబ్రిటీలు, స్పోర్ట్స్‌ పర్సన్స్‌ ఐస్బాత్ చేస్తున్న వీడియోలు సోషల్ మీడియాలో కనిపిస్తున్నాయి. దీంతో సాధారణ ప్రజల్లోనూ దీనిపై ఆసక్తి పెరిగింది.
అయితే ఐస్బాత్ వల్ల చెప్పుకుంటున్న ప్రతి ప్రయోజనం అందరికీ కచ్చితంగా వస్తుందని చెప్పడానికి తగిన ఆధారాలు లేవు. ముఖ్యంగా గుండె సంబంధిత సమస్యలు ఉన్నవారు వైద్యుల సలహా లేకుండా ఐస్బాత్ చేయడం మంచిది కాదు.
డాక్టర్ దిలీప్ గూడె (సీనియర్ కన్సల్టెంట్ ఫిజిషియన్, యశోద హాస్పిటల్స్, హైదరాబాద్) సూచనల ప్రకారం ఐస్బాత్ గురించి తెలుసుకోవాల్సిన విషయాలు ఇవి.
1. వర్కౌట్ తర్వాత కండరాల నొప్పులు
ఎక్కువగా వ్యాయామం చేసిన తర్వాత కండరాల్లో నొప్పి రావడం సాధారణం. అలాంటి సమయంలో ఐస్బాత్ చేస్తే కొంత ఉపశమనం కలిగినట్లు అనిపించవచ్చు.
అయితే దీనిపై ఉన్న పరిశోధనల్లో ఒకే రకమైన ఫలితాలు కనిపించలేదు. కొన్ని అధ్యయనాలు ఐస్బాత్ వల్ల ఉపయోగం ఉండొచ్చని సూచిస్తే, మరికొన్ని పరిశోధనలు యాక్టివ్‌ రికవరీ కూడా ఇలాంటి ప్రయోజనాలు ఇవ్వొచ్చని చెబుతున్నాయి.
అందుకే కండరాల నొప్పికి ఐస్బాత్ మాత్రమే పరిష్కారం అని భావించకూడదు.
2. వాపు, ఉబ్బరం తగ్గుతుందా?
చల్లని నీటిలో శరీరాన్ని ఉంచినప్పుడు రక్తనాళాలు కొంతసేపు సంకోచిస్తాయి. దీంతో వర్కౌట్ తర్వాత కనిపించే కొద్దిపాటి వాపు లేదా ఉబ్బరం తగ్గినట్లు అనిపించవచ్చు.
అయితే ఈ మార్పు పూర్తిగా ఐస్బాత్ వల్లే వచ్చిందని చెప్పడానికి బలమైన ఆధారాలు లేవు.
కండరాలు రికవరీ అవుతున్న సమయంలో కొంత వాపు రావడం కూడా శరీర సహజ ప్రక్రియలో భాగమే.
3. మానసికంగా యాక్టివ్‌గా ఉంటారా?
ఐస్బాత్ చేసిన తర్వాత ఫ్రెష్‌గా అనిపిస్తుందని చాలామంది చెబుతారు. శరీరానికి ఒక్కసారిగా చలి తగలడం వల్ల కొంతమందికి అప్రమత్తంగా, యాక్టివ్‌గా అనిపించవచ్చు.
అయితే ఐస్బాత్ వల్ల మానసిక ఆరోగ్యం మెరుగవుతుందని చెప్పడానికి ప్రస్తుతం బలమైన ఆధారాలు లేవు.
అందుకే దీన్ని మానసిక ఆరోగ్య సమస్యలకు చికిత్సగా భావించకూడదు.
4. ప్రతి ఒక్కరూ ఐస్బాత్ చేయవచ్చా?
ఇది ముఖ్యమైన విషయం. ఐస్బాత్ అందరికీ సరిపోదు.
చాలా చల్లని నీటిలో ఒక్కసారిగా శరీరాన్ని ఉంచితే శరీరంపై తీవ్రమైన చలి ప్రభావం పడుతుంది. గుండె కొట్టుకునే వేగం, రక్తపోటు వంటి వాటిలో వెంటనే మార్పులు రావచ్చు.
అందుకే గుండె సంబంధిత సమస్యలు ఉన్నవారు ప్రత్యేకంగా జాగ్రత్తగా ఉండాలి. వైద్యుల సలహా లేకుండా ఐస్బాత్ ప్రయత్నించకపోవడం మంచిది.
5. గుండె సమస్యలు ఉన్నవారికి?
ఐస్బాత్ గుండె సమస్యలను తగ్గిస్తుందని చెప్పడానికి తగిన ఆధారాలు లేవు.
అంతేకాదు, ఒక్కసారిగా తీవ్రమైన చలికి శరీరాన్ని గురిచేయడం వల్ల గుండెపై అదనపు ఒత్తిడి పడే అవకాశం ఉంటుంది. కాబట్టి గుండె జబ్బులు, రక్తపోటు వంటి సమస్యలు ఉన్నవారు ముందుగా వైద్యులను సంప్రదించాలి.
సోషల్ మీడియాలో కనిపించే ఆరోగ్య సూచనలను చూసి స్వయంగా ఐస్బాత్ ప్రారంభించడం సరికాదు.
6. వర్కౌట్ చేసేవారు ఏం గుర్తుంచుకోవాలి?
హార్డ్‌ వర్కౌట్ చేసిన తర్వాత ఐస్బాత్ కొంత రిలాక్సేషన్‌ ఇచ్చినట్లు అనిపించవచ్చు. కండరాల నొప్పి, అలసట తగ్గినట్లు కొందరికి అనిపిస్తుంది.
అయితే ప్రతి వర్కౌట్ తర్వాత ఐస్బాత్ చేయాల్సిన అవసరం లేదు.
శరీర పరిస్థితి, వ్యాయామం తీవ్రత, ఆరోగ్య సమస్యలు వంటి అంశాలను పరిగణనలోకి తీసుకోవాలి.
7. ఐస్‌బాత్‌ను ట్రెండ్‌గా చూడకండి
సెలబ్రిటీలు లేదా స్పోర్ట్స్‌ పర్సన్స్‌ ఐస్బాత్ చేస్తున్నారని చూసి అందరూ అదే చేయాల్సిన అవసరం లేదు.
ఒక వ్యక్తికి ఉపయోగకరంగా అనిపించిన పద్ధతి మరో వ్యక్తికి అదే విధంగా పనిచేస్తుందని చెప్పలేం. ముఖ్యంగా ఆరోగ్య సమస్యలు ఉన్నవారు జాగ్రత్తగా ఉండాలి.