భారత జూనియర్ మహిళల హాకీ జట్టు యూకే పర్యటన.. మూడు విజయాలు..

జూనియర్ ఆసియా కప్‌కు ముందు కీలక అనుభవం అందించిన యూకే టూర్

ఏడు మ్యాచ్‌ల్లో మూడు విజయాలు.. యువ ఆటగాళ్ల నుంచి ఆకట్టుకున్న ప్రదర్శన

India: Indian Junior Women Hockey Team, యునైటెడ్ కింగ్‌డమ్ (UK) పర్యటనను విజయవంతంగా ముగించింది. ఈ పర్యటనలో జట్టు మొత్తం ఏడు హై-ఇంటెన్సిటీ మ్యాచ్‌లు ఆడింది. స్కాట్లాండ్ సీనియర్ మహిళల జట్టు, అమెరికా అండర్-21, ఇంగ్లాండ్ అండర్-21, బెల్జియం అండర్-21 జట్లతో భారత యువ జట్టు తలపడింది.

ఈ పర్యటనలో భారత్ మూడు విజయాలు, మూడు ఓటములు నమోదు చేసింది. మరో మ్యాచ్ డ్రాగా ముగియగా, షూటౌట్‌లో అమెరికా అండర్-21 చేతిలో ఓటమి చవిచూసింది.

బలమైన ప్రత్యర్థులపై పోరాడుతూ భారత ఆటగాళ్లు మ్యాచ్‌కు మ్యాచ్ మెరుగైన ప్రదర్శన కనబరిచారు.

స్కాట్లాండ్‌తో ప్రారంభమైన పర్యటన

ఎడిన్‌బర్గ్‌లో జరిగిన తొలి రెండు మ్యాచ్‌ల్లో భారత్ స్కాట్లాండ్ సీనియర్ మహిళల జట్టుతో తలపడింది. తొలి మ్యాచ్‌లో 2-3 తేడాతో ఓడిన భారత్, రెండో మ్యాచ్‌లో కూడా 1-3తో పరాజయం పాలైంది.

భారత్ తరఫున షషి ఖాసా ఏకైక గోల్ సాధించగా, స్కాట్లాండ్ తరఫున బ్రోన్విన్ షీల్డ్స్, జారా కెన్నెడీ, షార్లెట్ వాట్సన్ గోల్స్ నమోదు చేశారు.

అమెరికాపై ఘన విజయం.. ఇంగ్లాండ్‌పై వరుస విజయాలు

మూడో మ్యాచ్‌లో భారత్ అద్భుతంగా పుంజుకుని అమెరికా అండర్-21 జట్టును 6-0తో చిత్తు చేసింది. సుఖ్‌వీర్ కౌర్ రెండు గోల్స్ చేయగా, కాజల్, షషి ఖాసా, పూర్ణిమ యాదవ్, పూజా సాహూ ఒక్కో గోల్ సాధించారు.

ఆ తర్వాత ఇంగ్లాండ్ అండర్-21తో జరిగిన మ్యాచ్‌లో బినిమా ధన్, రోష్ని ఐండ్ గోల్స్‌తో భారత్ 2-0తో విజయం సాధించింది.

అమెరికాతో డ్రా.. షూటౌట్‌లో పరాజయం

ఐదో మ్యాచ్‌లో అమెరికా అండర్-21తో భారత్ 1-1తో డ్రా చేసింది. భారత్ తరఫున పూజా సాహూ పెనాల్టీ కార్నర్‌ను గోల్‌గా మలచగా, అమెరికా తరఫున రీస్ అనెట్స్‌బెర్గర్ పెనాల్టీ స్ట్రోక్ ద్వారా సమం చేసింది.

అనంతరం జరిగిన షూటౌట్‌లో అమెరికా 3-2తో గెలిచింది. భారత్ తరఫున షషి ఖాసా, గీతా యాదవ్ షూటౌట్‌లో గోల్స్ నమోదు చేశారు.

బెల్జియంతో పోరాడి ఓటమి

ఇంగ్లాండ్ అండర్-21పై మరోసారి 2-0తో విజయం సాధించిన భారత్, చివరి మ్యాచ్‌లో బెల్జియం అండర్-21 చేతిలో 1-2తో ఓడింది.

బెల్జియం తరఫున లూయిస్ వాన్ హెరెండేల్, రొమనీ వెర్హేఘే గోల్స్ చేయగా, భారత్ తరఫున సుఖ్‌వీర్ కౌర్ చివర్లో ఒక గోల్ నమోదు చేసింది.

ఈ పర్యటన మొత్తం భారత జూనియర్ మహిళల జట్టు దాడి, రక్షణ విభాగాల్లో మంచి పురోగతి చూపించింది.

అంతర్జాతీయ స్థాయి ప్రత్యర్థులతో ఆడటం వల్ల ఆటగాళ్లకు విభిన్న పరిస్థితుల్లో విలువైన అనుభవం లభించింది.

పర్యటన ముగిసిన సందర్భంగా జట్టు కెప్టెన్ షిలీమా చాను ఖైదెమ్ మాట్లాడుతూ, ఈ పర్యటన తమకు గొప్ప అనుభవాన్ని ఇచ్చిందన్నారు.

భిన్నమైన ఆటతీరున్న బలమైన జట్లతో ఆడటం వల్ల ప్రతి మ్యాచ్‌లో కొత్త విషయాలు నేర్చుకున్నామని చెప్పారు. క్లిష్ట పరిస్థితుల తర్వాత తిరిగి బలంగా పుంజుకోవడం జట్టులో ఆత్మవిశ్వాసాన్ని పెంచిందన్నారు. చైనాలో జరిగే మహిళల జూనియర్ ఆసియా కప్‌కు సన్నాహకాల్లో ఈ అనుభవం ఎంతో ఉపయోగపడుతుందని ఆమె వెల్లడించారు.