నాలుగేళ్ల ప్రేమ.. పెళ్లైన గంటలకే పెటాకులు.. రిసెప్షన్‌లో వరుడి వీరంగం!

నాలుగేళ్ల ప్రేమ.. కుటుంబాలను ఒప్పించి పెళ్లి

తమిళనాడులోని కన్యాకుమారి జిల్లాలో ఈ ఘటన జరిగింది. కుళచ్చల్ సమీపంలోని రీతాపురం గ్రామానికి చెందిన రూబెన్ (31) ఆర్మీలో సైనికుడిగా పనిచేస్తున్నాడు.

కేరళ సరిహద్దులోని పారసాల సమీప గ్రామానికి చెందిన 26 ఏళ్ల యువతితో అతడికి నాలుగేళ్లుగా పరిచయం ఉంది. ఆ పరిచయం కాస్త ప్రేమగా మారింది.

ఆ యువతి తిరువనంతపురంలోని ఓ ప్రైవేటు ఆసుపత్రిలో ఫార్మసిస్ట్‌గా పనిచేస్తోంది.

ఆమెను పెళ్లి చేసుకోవాలని రూబెన్ నిర్ణయించుకున్నాడు. అయితే, వీరి ప్రేమకు మొదట్లో కుటుంబ సభ్యుల నుంచి వ్యతిరేకత ఎదురైంది. ముఖ్యంగా యువతి కుటుంబం ఈ వివాహానికి అంగీకరించలేదు.

అయినప్పటికీ, రూబెన్ తన ప్రయత్నాలను ఆపలేదు. యువతిని పెళ్లి చేసుకునేందుకు కుటుంబ సభ్యులను ఒప్పించేందుకు చాలా కష్టపడ్డాడు.

చివరకు ఇరు కుటుంబాల పెద్దలు వీరి వివాహానికి అంగీకరించారు. దీంతో నాలుగేళ్ల ప్రేమకు పెళ్లితో కొత్త జీవితం ప్రారంభమవుతుందని ఆ జంట భావించింది.

అక్టోబర్ 12న ఘనంగా వివాహం

ఇరు కుటుంబాల అంగీకారం తర్వాత అక్టోబర్ 12న సోమవారం ఉదయం పారసాలలో రూబెన్, యువతి వివాహం ఘనంగా జరిగింది. కుటుంబ సభ్యులు, బంధువుల సమక్షంలో వీరిద్దరూ ఒక్కటయ్యారు.

వివాహం అనంతరం అదే రోజు సాయంత్రం వరుడి స్వగ్రామమైన రీతాపురంలో రిసెప్షన్ ఏర్పాటు చేశారు.

ఇందుకోసం అక్కడి ఓ మ్యారేజ్ హాల్‌ను సిద్ధం చేశారు. బంధువులు, స్నేహితుల సమక్షంలో వేడుకను నిర్వహించారు.

సంప్రదాయం ప్రకారం వధువు తండ్రి తన కుమార్తెకు కానుకగా ఫర్నిచర్‌ను తీసుకొచ్చారు.

పెళ్లి వేడుకతో ఇరు కుటుంబాల్లో సంతోషకరమైన వాతావరణం నెలకొంది. అయితే, కొద్దిసేపటికే పరిస్థితి పూర్తిగా మారిపోయింది. వరుడు రూబెన్ ప్రవర్తనతో వేడుకలో వివాదం మొదలైంది.

మద్యం మత్తులో వరుడి వీరంగం

రిసెప్షన్ సమయంలో రూబెన్ ఫుల్లుగా మద్యం సేవించినట్లు కథనంలో పేర్కొన్నారు.

అతడు సరిగా నిలబడలేని స్థితిలో తూలుతూ కనిపించాడు. కొత్తగా పెళ్లైన అల్లుడి పరిస్థితిని గమనించిన వధువు తండ్రి ఆందోళన చెందాడు.

ఈ విషయాన్ని ఆయన తన కుమార్తె దగ్గర ప్రస్తావించాడు. అయితే, ఈ మాటతో రూబెన్ ఆగ్రహానికి గురయ్యాడు.

మామపై దురుసుగా ప్రవర్తించడమే కాకుండా, ఆయనను దూషించి దాడికి పాల్పడ్డాడు.

అక్కడితో ఆగకుండా, గొడవను అడ్డుకునేందుకు ప్రయత్నించిన తన భార్యపైనా చేయి చేసుకున్నాడు.

దీంతో రిసెప్షన్‌లో ఒక్కసారిగా గందరగోళం నెలకొంది. సంతోషంగా సాగాల్సిన వేడుక కాస్తా గొడవగా మారిపోయింది.

భార్య, మామపై దాడి.. వేడుక నుంచి పరార్

రూబెన్ దాడితో వధువు, ఆమె తండ్రి గాయపడ్డారు. పరిస్థితి ఉద్రిక్తంగా మారడంతో రిసెప్షన్‌కు వచ్చినవారు ఆందోళనకు గురయ్యారు. ఈ క్రమంలో రూబెన్ వేడుక నుంచి పారిపోయాడు.

గాయపడిన వధువు, ఆమె తండ్రి చికిత్స కోసం కుళచ్చల్ ప్రభుత్వ ఆసుపత్రికి వెళ్లారు. అక్కడ వారు చికిత్స తీసుకున్నారు. అనంతరం జరిగిన ఘటనపై పోలీసులను ఆశ్రయించారు.

కుళచ్చల్ పోలీస్ స్టేషన్‌లో రూబెన్‌పై ఫిర్యాదు చేశారు. ఫిర్యాదు ఆధారంగా పోలీసులు రెండు సెక్షన్ల కింద కేసు నమోదు చేశారు. ఘటన తర్వాత పరారీలో ఉన్న రూబెన్ కోసం పోలీసులు గాలిస్తున్నారు.

పెళ్లైన రోజే పుట్టింటికి వెళ్లిన వధువు

నాలుగేళ్లుగా ప్రేమించుకుని, ఎన్నో అడ్డంకులను దాటి పెళ్లి చేసుకున్న జంట జీవితం ఒక్క రోజులోనే మలుపు తిరిగింది. ఉదయం పెళ్లితో ఒక్కటైన ఆ జంట.. సాయంత్రం రిసెప్షన్‌లో జరిగిన గొడవతో విడిపోయింది.

భర్త ప్రవర్తనతో మనస్తాపానికి గురైన వధువు అదే రాత్రి తన తండ్రితో కలిసి పుట్టింటికి వెళ్లిపోయింది. పెళ్లి వేడుకలో జరిగిన దాడి కారణంగా ఆమె భర్త నుంచి దూరంగా వెళ్లాల్సి వచ్చింది.

కుటుంబ సభ్యులను ఒప్పించి ఎంతో కష్టపడి వివాహం చేసుకున్న ఈ జంటకు పెళ్లైన రోజే ఇలాంటి పరిస్థితి ఎదురుకావడం స్థానికంగా చర్చనీయాంశమైంది. ప్రస్తుతం రూబెన్ పరారీలో ఉండగా, అతడి కోసం పోలీసులు గాలిస్తున్నారు.