లక్నోలో పట్టపగలే కాల్పులు.. కుటుంబ వివాదాలు, విడాకుల వ్యవహారమే కారణమా?
ఉత్తరప్రదేశ్ రాజధాని లక్నోలో పట్టపగలే దారుణ ఘటన జరిగింది.
గోమతి నగర్‌లో ఒకే కుటుంబానికి చెందిన ముగ్గురు ప్రాణాలు కోల్పోయారు. కుటుంబ వివాదాలు, విడాకుల వ్యవహారం చివరకు హత్యలు, ఆత్మహత్యకు దారితీసినట్లు పోలీసులు అనుమానిస్తున్నారు.
బ్యాంకు వద్ద భార్యపై కాల్పులు
గురువారం (ఆగస్టు 20) ఉదయం దివ్య మిశ్రా ఎప్పటిలాగే గోమతినగర్‌లోని ICICI Bankకు విధులకు వెళ్లారు.
ఆమె అక్కడ రిలేషన్‌షిప్ మేనేజర్‌గా పనిచేస్తున్నారు. కొద్దిసేపటికే ఆమె మొబైల్‌కు ఫోన్ రావడంతో బ్యాంకు బయటకు వెళ్లారు.
ప్రత్యక్ష సాక్షుల ప్రకారం.. దివ్య భర్త మానస్ బాజ్‌పాయ్ రెండు పిస్టళ్లతో బ్యాంకు గేటు వద్ద వేచి ఉన్నాడు.
దివ్య బయటకు రాగానే ఆమెతో మాట్లాడేందుకు ప్రయత్నించాడు. అయితే ఆమె స్పందించకపోవడంతో మానస్ కాల్పులు జరిపాడు.
రెండు బుల్లెట్లు తగలడంతో దివ్య అక్కడికక్కడే కుప్పకూలారు.
తీవ్రంగా గాయపడిన ఆమెను వెంటనే ఆసుపత్రికి తరలించారు. చికిత్స పొందుతూ ఆమె మృతి చెందారు.
మృతురాలు దివ్య మిశ్రా ప్రముఖ జర్నలిస్ట్ ప్రజ్ఞా మిశ్రా సోదరిగా పోలీసులు గుర్తించారు.
ఇంటికి వెళ్లి సోదరిని కూడా హత్య
భార్యపై కాల్పుల తర్వాత మానస్ ఆటోరిక్షాలో హుసదియా స్క్వేర్‌లోని తన నివాసానికి వెళ్లాడు.
అక్కడ తన సోదరిపై కూడా కాల్పులు జరిపి హత్య చేసినట్లు పోలీసులు తెలిపారు.
ఆ తర్వాత అదే తుపాకీతో తనను తాను కాల్చుకున్నాడు. దీంతో కొద్దిసేపటి వ్యవధిలోనే ఒకే కుటుంబానికి చెందిన ముగ్గురు ప్రాణాలు కోల్పోయారు.
వాట్సాప్ స్టేటస్‌లో కీలక సందేశం
ఘటనకు ముందు మానస్ తన వాట్సాప్ స్టేటస్‌లో కీలక సందేశం పెట్టినట్లు పోలీసులు తెలిపారు.
“నాకు ద్రోహం చేసినందుకు ఈరోజు నా భార్యను చంపాను. ఇప్పుడు నేను ఆత్మహత్య చేసుకోవాలి.
ఆమె సోదరి ప్రజ్ఞ, భరత్‌లకు అంతా తెలుసు…” అని అందులో రాసినట్లు సమాచారం.
ఈ సందేశం ఆధారంగా మానస్ ముందుగానే దాడికి ప్రణాళిక వేసుకున్నాడా అనే కోణంలో పోలీసులు దర్యాప్తు చేస్తున్నారు.
విడాకుల వ్యవహారంపై పోలీసుల దర్యాప్తు
పోలీసుల ప్రాథమిక దర్యాప్తులో దివ్య, మానస్ మధ్య చాలాకాలంగా కుటుంబ వివాదాలు కొనసాగుతున్నట్లు వెల్లడైంది.
ఈ వివాదం కోర్టులో విడాకుల పిటిషన్ వరకు వెళ్లినట్లు సమాచారం.
ఈ నేపథ్యంలోనే మానస్ ఈ ఘాతుకానికి పాల్పడి ఉండొచ్చని పోలీసులు అనుమానిస్తున్నారు.
ఘటనపై సమాచారం అందుకున్న వెంటనే ఉన్నతాధికారులు భారీ పోలీసు బలగాలతో సంఘటనా స్థలానికి చేరుకున్నారు.
నేరస్థలాన్ని స్వాధీనం చేసుకున్న పోలీసులు సీసీటీవీ ఫుటేజ్, కాల్ డీటైల్ రికార్డులు, ఫోరెన్సిక్ ఆధారాలను పరిశీలిస్తున్నారు.
పోలీస్ స్టేషన్‌కు అతి సమీపంలోనే పట్టపగలు కాల్పులు జరగడంతో భద్రతా ఏర్పాట్లపైనా ప్రశ్నలు తలెత్తుతున్నాయి.
ఈ ఘటనకు సంబంధించి పూర్తి వివరాలు పోలీసుల దర్యాప్తులో వెల్లడికావాల్సి ఉంది.