అమెరికా టెక్ దిగ్గజం మెటా మరోసారి భారీ ఉద్యోగాల కోతకు సిద్ధమైంది. బుధవారం దాదాపు 8 వేల మందిని తొలగించే అవకాశమున్నట్లు సమాచారం. అదే రోజు ఉత్తర అమెరికా ఉద్యోగులు ఇంటి నుంచే పని చేయాలని సంస్థ ఆదేశించింది. ఉద్యోగాల కోత ప్రక్రియ సాఫీగా సాగేందుకు ఈ నిర్ణయం తీసుకున్నట్లు తెలుస్తోంది.
రాయిటర్స్ వెల్లడించిన అంతర్గత మెమో ప్రకారం, హెచ్ఆర్ చీఫ్ జానెల్ గేల్ ఉద్యోగులకు కీలక సమాచారం పంపారు. స్థానిక కాలమానం ప్రకారం ఉదయం 4 గంటలకు ఉద్యోగులకు మెయిల్స్ పంపనున్నారు. ఈ ప్రక్రియను మూడు ప్రాంతీయ దశల్లో అమలు చేస్తారని పేర్కొన్నారు.
ఉద్యోగాలు కొనసాగించే సుమారు 7 వేల మందిని నాలుగు కొత్త ఏఐ కేంద్రిత విభాగాల్లోకి మార్చనున్నారు. కృత్రిమ మేధస్సు రంగంపై మెటా మరింత దృష్టి పెట్టిన నేపథ్యంలో ఈ పునర్వ్యవస్థీకరణ చేపట్టినట్లు సమాచారం.
సంస్థలో ఖర్చులు తగ్గించడం, ఏఐ అభివృద్ధిని వేగవంతం చేయడం లక్ష్యంగా ఈ మార్పులు చేస్తున్నారని టెక్ వర్గాలు చెబుతున్నాయి. గత రెండేళ్లుగా మెటా పలుమార్లు ఉద్యోగాల కోతలు చేపట్టింది.