అప్రెంటిస్‌ పోస్టుల భర్తీకి నోటిఫికేషన్‌
నేవల్ డాక్‌యార్డ్‌లో అప్రెంటిస్‌ శిక్షణ పొందాలనుకునే అభ్యర్థులకు ఇండియన్ నేవీ అవకాశం కల్పించింది. 2027-28/29 శిక్షణ సంవత్సరానికి సంబంధించి నోటిఫికేషన్‌ విడుదల చేసింది. అర్హులైన అభ్యర్థుల నుంచి దరఖాస్తులను ఆహ్వానిస్తోంది.
ఈ నోటిఫికేషన్‌ ద్వారా మొత్తం 210 అప్రెంటిస్‌ ఖాళీలను భర్తీ చేయనున్నారు. కర్ణాటకలోని కర్వార్‌ నేవల్ డాక్‌యార్డ్‌లో 180 పోస్టులు ఉన్నాయి. గోవాలోని డబోలిమ్‌ నేవల్ ఎయిర్‌క్రాఫ్ట్‌ యార్డ్‌లో మరో 30 పోస్టులను భర్తీ చేస్తారు.
మొత్తం 27 ట్రేడుల్లో ఈ ఖాళీలు ఉన్నాయి. సంబంధిత విద్యార్హతలు ఉన్న అభ్యర్థులు నవంబర్‌ 9లోగా దరఖాస్తు చేసుకోవాలి.
ఏయే ట్రేడుల్లో ఖాళీలు ఉన్నాయి?
ఈ నోటిఫికేషన్‌లో పలు సాంకేతిక ట్రేడులకు సంబంధించిన పోస్టులను ప్రకటించారు. కంప్యూటర్‌ ఆపరేటర్‌ అండ్‌ ప్రోగ్రామింగ్‌ అసిస్టెంట్‌ (COPA), ఎలక్ట్రీషియన్‌, ఎలక్ట్రానిక్స్‌ మెకానిక్‌, ఫిట్టర్‌, ఇన్ఫర్మేషన్‌ అండ్‌ కమ్యూనికేషన్‌ టెక్నాలజీ మెయింటెనెన్స్‌ (ICTM) ట్రేడుల్లో ఖాళీలు ఉన్నాయి.
అలాగే ఇన్‌స్ట్రుమెంట్‌ మెకానిక్‌, మెషినిస్ట్‌, మెరైన్‌ ఇంజినీర్‌, మెకానిక్‌ డీజిల్‌, మెకానిక్‌ (Embedded System & PLC), మెకానికల్‌ ఇండస్ట్రియల్‌ ఎలక్ట్రానిక్స్‌ ట్రేడుల్లో పోస్టులు ఉన్నాయి.
మెకానిక్‌ మెషిన్‌ టూల్‌ మెయింటెనెన్స్‌, మెకానిక్‌ మెకాట్రానిక్స్‌, మెకానిక్‌ మోటార్‌ వెహికల్స్‌, మెకానిక్‌ రిఫ్రిజిరేషన్‌ అండ్‌ ఏసీ ట్రేడులు కూడా ఈ జాబితాలో ఉన్నాయి.
ఇవే కాకుండా పెయింటర్‌, ప్లంబర్‌, షీట్‌ మెటల్‌ వర్కర్‌, వెల్డర్‌ (Gas & Electric), కార్పెంటర్‌, షిప్‌రైట్‌ ఉడ్‌, టైలర్‌ వంటి ట్రేడుల్లోనూ ఖాళీలు ఉన్నాయి.
నాన్‌ ఐటీఐ ట్రేడులు
నాన్‌ ఐటీఐ విభాగంలో క్రేన్‌ ఆపరేటర్‌ ఓవర్‌హెడ్‌ (Steel Industry), ఫోర్జర్‌ అండ్‌ హీట్‌ ట్రేడర్‌, రిగ్గర్‌ పోస్టులు ఉన్నాయి. అభ్యర్థులు దరఖాస్తు చేసే ముందు తమ ట్రేడ్‌కు సంబంధించిన అర్హతలను పరిశీలించాలి.
విద్యార్హతలు, వయోపరిమితి
ఈ పోస్టులకు దరఖాస్తు చేసుకునే అభ్యర్థులు పదో తరగతి లేదా ఎనిమిదో తరగతి ఉత్తీర్ణులై ఉండాలి. సంబంధిత ట్రేడ్‌లో NCVT/SCVT గుర్తింపు పొందిన ఐటీఐ సర్టిఫికెట్‌ కూడా అవసరం.
వయోపరిమితి విషయానికి వస్తే, నాన్‌ హజార్డస్‌ ట్రేడులకు కనీస వయసు 14 ఏళ్లు ఉండాలి. హజార్డస్‌ ట్రేడులకు కనీస వయసు 18 ఏళ్లు ఉండాలి. ఈ నోటిఫికేషన్‌లో గరిష్ఠ వయోపరిమితి లేదని పేర్కొన్నారు.
అభ్యర్థులు తమ విద్యార్హతలు, వయసు సంబంధిత ట్రేడు నిబంధనలకు సరిపోతున్నాయో లేదో దరఖాస్తు చేయడానికి ముందే నిర్ధారించుకోవాలి.
ఎంపిక ప్రక్రియ ఎలా ఉంటుంది?
అభ్యర్థుల విద్యార్హతల్లో సాధించిన మార్కుల ఆధారంగా ప్రాథమిక మెరిట్‌ జాబితాను రూపొందిస్తారు. ఐటీఐ అభ్యర్థులకు పదో తరగతి, ఐటీఐ మార్కులను పరిగణనలోకి తీసుకుంటారు.
నాన్‌ ఐటీఐ ట్రేడులకు దరఖాస్తు చేసిన అభ్యర్థుల విషయంలో పదో తరగతి, ఎనిమిదో తరగతి మార్కుల ఆధారంగా మెరిట్‌ జాబితాను తయారు చేస్తారు.
ప్రతి ట్రేడు, కేటగిరీలో ఉన్న ఒక్కో ఖాళీకి 1:20 నిష్పత్తిలో అభ్యర్థులను రాత పరీక్షకు ఎంపిక చేస్తారు. ఈ పరీక్ష కర్వార్‌లో 2027 జనవరిలో నిర్వహించనున్నారు.
రాత పరీక్షలో ఏ అంశాలుంటాయి?
రాత పరీక్షలో మొత్తం మూడు అంశాల నుంచి ప్రశ్నలు ఇస్తారు.
- మ్యాథమెటిక్స్‌: 35 ప్రశ్నలు
- జనరల్‌ సైన్స్‌: 35 ప్రశ్నలు
- జనరల్‌ నాలెడ్జ్‌: 30 ప్రశ్నలు
విద్యార్హతల మార్కులు, రాత పరీక్షతో పాటు మెడికల్‌ ఫిట్‌నెస్‌, సర్టిఫికెట్ల పరిశీలన ఆధారంగా తుది ఎంపిక చేస్తారు.
నెలకు రూ.9,600 స్టైపెండ్‌
ఈ అప్రెంటిస్‌ శిక్షణకు ఎంపికైన అభ్యర్థులకు నెలకు రూ.9,600 స్టైపెండ్‌ అందిస్తారు. సాంకేతిక ట్రేడుల్లో శిక్షణ పొందాలనుకునే అర్హులైన అభ్యర్థులకు ఇది మంచి అవకాశం.
అయితే, దరఖాస్తు చేసుకునే ముందు అధికారిక నోటిఫికేషన్‌లో ట్రేడు వారీగా ఉన్న అర్హతలు, ఇతర నిబంధనలను పరిశీలించడం మంచిది.
దరఖాస్తు ఎలా చేయాలి?
అభ్యర్థులు ముందుగా సంబంధిత వెబ్‌సైట్‌లో రిజిస్ట్రేషన్‌ చేసుకోవాలి. అనంతరం దరఖాస్తు ప్రక్రియను పూర్తి చేసి, అప్లికేషన్‌ ప్రింట్‌ అవుట్‌ తీసుకోవాలి.
దరఖాస్తుతో పాటు అవసరమైన సర్టిఫికెట్లను జతచేసి పోస్టు ద్వారా పంపాలి. పంపాల్సిన చిరునామా వివరాలు ఇలా ఉన్నాయి.
ది ఆఫీసర్‌ ఇన్‌చార్జ్‌
డాక్‌యార్డ్‌ అప్రెంటిస్‌ స్కూల్‌,
నేవల్ డాక్‌యార్డ్‌,
నేవల్ బేస్‌,
కర్వార్‌, కర్ణాటక.
దరఖాస్తును స్పీడ్‌ పోస్ట్‌ లేదా రిజిస్టర్డ్‌ పోస్ట్‌ ద్వారా పంపాలని నోటిఫికేషన్‌లో పేర్కొన్నారు.