రసువా జిల్లాలో తీవ్ర నష్టం
టిబెట్ సరిహద్దుకు సమీపంలోని నేపాల్ రసువా జిల్లాలో బుధవారం ఉదయం ఆకస్మిక వరదలు బీభత్సం సృష్టించాయి.
స్థానిక కాలమానం ప్రకారం ఉదయం సుమారు 9 గంటల సమయంలో ఒక్కసారిగా వరద నీరు ఉధృతంగా ప్రవహించింది.
దీంతో నదీ తీర ప్రాంతాల్లో ఉన్న ప్రజలను అధికారులు సురక్షిత ప్రాంతాలకు, ఎత్తైన ప్రదేశాలకు తరలివెళ్లాలని హెచ్చరించారు.
రసువా జిల్లాలోని పర్వత ప్రాంతాలైన స్యాప్రుబేసి, టిమురే ప్రాంతాలు వరదలతో తీవ్రంగా దెబ్బతిన్నట్లు ప్రభుత్వ వర్గాలు తెలిపాయి.
టిబెట్ సరిహద్దుకు ఆనుకుని ఉన్న ఈ ప్రాంతాల్లో వరద ప్రవాహం భారీగా ఉండటంతో పలు గ్రామాలు, నిర్మాణ ప్రాజెక్టు ప్రాంతాలు కొట్టుకుపోయినట్లు ప్రాథమిక సమాచారం అందుతోంది.
వెయ్యి మంది గల్లంతయ్యారా?
ఈ విపత్తులో సుమారు వెయ్యి మంది గల్లంతయ్యారనే సమాచారం వెలువడింది.
అయితే ఈ సంఖ్యపై నేపాల్ అధికారులు ఇప్పటివరకు అధికారిక ధ్రువీకరణ ఇవ్వలేదు. కొంతమంది వరదల్లో చిక్కుకున్నట్లు, మరికొందరు కొట్టుకుపోయినట్లు సమాచారం వస్తోంది.
సహాయక, గాలింపు చర్యలు కొనసాగుతున్న నేపథ్యంలో మృతులు, గల్లంతైన వారి సంఖ్యపై ఇంకా స్పష్టత రావాల్సి ఉంది.
భోటే కోషి నదిలో ఒక్కసారిగా పెరిగిన నీటిమట్టం
నేపాల్ పోలీసుల ప్రాథమిక సమాచారం ప్రకారం టిబెట్ వైపు నుంచి ఉద్భవించే భోటే కోషి నదిలో నీటిమట్టం ఒక్కసారిగా భారీగా పెరిగింది.
దీంతో నది ఉప్పొంగి ప్రవహించి దిగువ ప్రాంతాల్లో ఆకస్మిక వరదలు సంభవించినట్లు అధికారులు భావిస్తున్నారు.
త్రిశూలి నదీ పరివాహక ప్రాంతంలోని నువాకోట్, ధాదింగ్, చిత్వాన్, గోర్ఖా జిల్లాలతో పాటు పరిసర ప్రాంతాల ప్రజలు అప్రమత్తంగా ఉండాలని అధికారులు హెచ్చరించారు.
తదుపరి ఆదేశాలు వచ్చే వరకు సురక్షిత ప్రాంతాల్లోనే ఉండాలని సూచించారు.
కొనసాగుతున్న సహాయక చర్యలు
వరద ప్రభావిత ప్రాంతాల్లో సహాయక, రక్షణ చర్యలు ముమ్మరంగా కొనసాగుతున్నాయి.
అత్యవసర బృందాలు దెబ్బతిన్న ప్రాంతాలకు చేరుకుని నష్టాన్ని అంచనా వేస్తున్నాయి.
వరద ప్రవాహంలో చిక్కుకున్న లేదా కొట్టుకుపోయిన వారి కోసం గాలింపు చేపడుతున్నారు.
అయితే పర్వత ప్రాంతం కావడంతో పాటు రహదారులు, ఇతర మౌలిక సదుపాయాలు దెబ్బతినడం సహాయక చర్యలకు సవాలుగా మారింది.
వరద పరిస్థితిని అధికారులు నిశితంగా పరిశీలిస్తున్నారు.
అత్యవసర సమావేశం నిర్వహించిన ప్రధాని బలెన్ షా
వరదలతో భారీ విధ్వంసం చోటుచేసుకున్న నేపథ్యంలో నేపాల్ ప్రధాని బలెన్ షా అత్యవసర సమావేశం నిర్వహించారు.
జాతీయ విపత్తు నిర్వహణ మండలి సమావేశాన్ని ఏర్పాటు చేసి పరిస్థితిని సమీక్షించారు.
సహాయక చర్యలను వేగవంతం చేయడం, బాధిత ప్రాంతాలకు అవసరమైన సహాయం అందించడం వంటి అంశాలపై సమావేశంలో చర్చించారు.
ప్రధాని సలహాదారు ఆసిమ్ షా తెలిపిన వివరాల ప్రకారం.. ప్రభావిత జిల్లాల చీఫ్ డిస్ట్రిక్ట్ అధికారులతో ప్రధాని నేరుగా సంప్రదింపులు జరుపుతున్నారు.
సహాయక చర్యలను ఆయన స్వయంగా పర్యవేక్షిస్తున్నట్లు తెలిపారు.
అయితే గల్లంతైన వారి సంఖ్య, ప్రాణనష్టం, ఆస్తినష్టంపై పూర్తి వివరాలు ఇంకా అందాల్సి ఉంది.
సహాయక బృందాలు ప్రభావిత ప్రాంతాలకు పూర్తిస్థాయిలో చేరిన తర్వాతే విపత్తు తీవ్రతపై స్పష్టత వచ్చే అవకాశం ఉంది.