సౌదీపై హౌతీల దాడులు.. మక్కాకు తొలిసారి వైమానిక ముప్పు హెచ్చరిక

క్షిపణులు, డ్రోన్లతో వరుస దాడులు.. 13 మందికి గాయాలు

మక్కా వైపు వచ్చిన మిసైల్‌ను కూల్చివేసిన సౌదీ రక్షణ దళాలు

రియాద్: సౌదీ అరేబియాపై హౌతీ తిరుగుబాటుదారుల దాడులు తీవ్రరూపం దాల్చాయి. దేశంలోని పలు ప్రాంతాలను లక్ష్యంగా చేసుకుని బాలిస్టిక్ క్షిపణులు, డ్రోన్లతో వరుస దాడులు జరిగాయి. ఈ దాడుల్లో 13 మంది గాయపడినట్లు సమాచారం.

ముస్లింల పవిత్ర నగరం మక్కా కూడా ఈ ఉద్రిక్తతల మధ్యకి వచ్చింది. మక్కాలో వైమానిక ముప్పు హెచ్చరికలు జారీ కావడానికి సరిగ్గా ఒక్క రోజు ముందు ఈ దాడులు జరిగాయి.

మక్కా వైపు దూసుకొచ్చిన మిసైల్

మక్కాకు దక్షిణం వైపు నుంచి ఒక మిసైల్ దూసుకొచ్చినట్లు సౌదీ అధికారులు తెలిపారు. అప్రమత్తమైన సౌదీ వైమానిక రక్షణ దళాలు దాన్ని అడ్డుకుని కూల్చివేశాయి.

అయితే, మక్కా నగరంలో ఎయిర్ రెయిడ్ అలర్ట్ జారీ కావడం మాత్రం చరిత్రలో ఇదే తొలిసారి. దీంతో ఈ ఘటనపై తీవ్ర ఆందోళన వ్యక్తమైంది.

2017లో కూడా హౌతీలు మక్కాను లక్ష్యంగా చేసుకునేందుకు ప్రయత్నించినట్లు సౌదీ ఆరోపించింది. ఇప్పుడు మళ్లీ ఇలాంటి ఘటన చోటుచేసుకుంది.

హౌతీలపై OIC తీవ్ర ఆగ్రహం

సౌదీ అరేబియాపై హౌతీలు డ్రోన్లు, బాలిస్టిక్ క్షిపణులతో దాడులు చేయడాన్ని ‘ఆర్గనైజేషన్ ఆఫ్ ఇస్లామిక్ కోఆపరేషన్’ (OIC) తీవ్రంగా తప్పుబట్టింది.

ముస్లింల పవిత్ర నగరమైన మక్కాను లక్ష్యంగా చేసుకోవడం అత్యంత హేయమైన చర్య అని OIC ఖండించింది. ఇలాంటి దాడులు ముస్లింల మనోభావాలను దెబ్బతీస్తాయని స్పష్టం చేసింది.

సౌదీ అరేబియా భద్రతకు, పౌరుల రక్షణకు తమ పూర్తి మద్దతు ఉంటుందని OIC పునరుద్ఘాటించింది.

హౌతీలతో సౌదీకి తీవ్ర పోరు

కొన్ని రోజులుగా సౌదీ అరేబియాకు, హౌతీ తిరుగుబాటుదారులకు మధ్య తీవ్ర పోరాటం జరుగుతోంది. ఈ పరిస్థితుల్లోనే మక్కా వైపు డ్రోన్ వచ్చినట్లు సౌదీ ఆరోపించింది.

ఈ దాడి వెనుక హౌతీల హస్తం ఉందని సౌదీ పేర్కొంది. అయితే ఈ ఆరోపణలను హౌతీ తిరుగుబాటుదారులు ఖండించారు.

తమపై సౌదీ అరేబియా చేస్తున్న ఆరోపణలు అవాస్తవమని హౌతీ రాజకీయ నేత హాజెమ్ అల్-అసద్ స్పష్టం చేశారు.

కీలక ద్వీపాలపై హౌతీల పట్టు

ఎర్ర సముద్రానికి దక్షిణాన ఉన్న కొన్ని కీలక ద్వీపాలను హౌతీ తిరుగుబాటుదారులు తాజాగా తమ ఆధీనంలోకి తీసుకున్నట్లు సమాచారం.

బాబ్ ఎల్ మండెబ్ జలసంధిపై పట్టు సాధించేందుకు ప్రయత్నిస్తున్న హౌతీలకు ఇది పెద్ద విజయమని విశ్లేషకులు భావిస్తున్నారు.

ఈ జలసంధి అంతర్జాతీయ సముద్ర రవాణాకు వ్యూహాత్మకంగా ఎంతో కీలకమైన ప్రాంతంగా ఉంది. అక్కడ ఉద్రిక్తతలు పెరగడం వల్ల నౌకల రాకపోకలపై ప్రభావం పడే అవకాశం ఉందనే ఆందోళనలు వ్యక్తమవుతున్నాయి.

మదీనా విమానాశ్రయంలో రాకపోకలు నిలిపివేత

ప్రాంతంలో ఉద్రిక్తతలు పెరగడంతో మదీనా అంతర్జాతీయ విమానాశ్రయానికి విమానాల రాకపోకలను నిలిపివేశారు.

హౌతీల నుంచి ముప్పు పెరుగుతుండటంతో సౌదీ అరేబియా అప్రమత్తమైంది. ఈ నేపథ్యంలో ఈజిప్టు, గల్ఫ్ దేశాల సహాయాన్ని కోరినట్లు సమాచారం.

సౌదీ ప్రధాని మొహ్మద్ బిన్ సల్మాన్ అమెరికా సైన్యం సాయంతో ఇజ్రాయెల్‌తో పరోక్షంగా చర్చలు జరుపుతున్నట్లు తెలుస్తోంది.

సౌదీకి భారత్ మద్దతు

సౌదీ అరేబియాపై హౌతీ తిరుగుబాటుదారులు జరుపుతున్న దాడులను భారత్ తీవ్రంగా ఖండించింది.

ఈ ఘటనలపై విదేశీ వ్యవహారాల శాఖ అధికార ప్రతినిధి రణ్‌ధీర్ జైస్వాల్ స్పందించారు. పశ్చిమాసియాలో పెరుగుతున్న ఉద్రిక్తతలు తీవ్ర ఆందోళన కలిగిస్తున్నాయని తెలిపారు.

సౌదీ సార్వభౌమత్వాన్ని దెబ్బతీసేలా దాడులు జరగడం ఏమాత్రం ఆమోదయోగ్యం కాదని భారత్ స్పష్టం చేసింది.

పౌరులపై, మౌలిక వసతులపై, ఆర్థిక కేంద్రాలపై దాడులు చేయడాన్ని భారత్ వ్యతిరేకించింది.

బాబ్ ఎల్-మండెబ్‌పై భారత్ ఆందోళన

ఈ దాడుల ప్రభావం ప్రాంతీయ స్థిరత్వంపైనా పడే అవకాశం ఉందని భారత్ పేర్కొంది.

వ్యూహాత్మక ప్రాధాన్యత ఉన్న ‘బాబ్ ఎల్-మండెబ్’ (Bab-el-Mandeb) జలసంధి వద్ద అంతర్జాతీయ నౌకాదళానికి, స్వేచ్ఛా సంచారానికి తీవ్ర ముప్పు ఏర్పడే అవకాశం ఉందని భారత్ హెచ్చరించింది.

ఈ ప్రాంతంలో త్వరలోనే శాంతిభద్రతలు పునరుద్ధరించబడాలని భారత్ ఆశాభావం వ్యక్తం చేసింది.