రెండు నెలల తర్వాత వెలుగులోకి వచ్చిన భయానక ఘటన.. భార్య, టీనేజ్ కుమారుడు అదృశ్యం
పాస్‌పోర్ట్ పరిశీలనతో బయటపడిన నిజం.. హత్యకు కారణాలపై కొనసాగుతున్న దర్యాప్తు
షార్జాలో ఉడుపి వ్యక్తి దారుణ హత్య
షార్జా : కర్ణాటకలోని ఉడుపి జిల్లాకు చెందిన అల్విన్ ప్రకాశ్ కుందర్ యూఏఈలోని షార్జాలో దారుణ హత్యకు గురయ్యారు. జులైలో జరిగిన ఈ ఘటన ఆలస్యంగా వెలుగులోకి వచ్చింది. ప్రకాశ్ మృతదేహాన్ని తొమ్మిది ముక్కలుగా నరికి రెండు సంచుల్లో ఉంచి ఓ కారులో పడేశారు.
ప్రకాశ్ అదృశ్యంపై కుటుంబ సభ్యులు ఆరా తీయడంతో సుమారు రెండు నెలల తర్వాత ఈ భయానక విషయం బయటపడింది. ఈ కేసులో ప్రకాశ్ భార్య టీనా కుందర్, వారి టీనేజ్ కుమారుడు కూడా కనిపించకపోవడం మిస్టరీగా మారింది.
14 ఏళ్లుగా షార్జా ఎయిర్‌పోర్టులో ఉద్యోగం
ప్రకాశ్ సుమారు 14 సంవత్సరాలుగా షార్జా ఎయిర్‌పోర్టులో ఉద్యోగం చేస్తున్నారు. భార్య టీనా కుందర్, పదో తరగతి చదువుతున్న కుమారుడితో కలిసి యూఏఈలోనే నివసిస్తున్నారు.
ఉడుపికి చెందిన టీనా అక్కడ స్కూల్ టీచర్‌గా పనిచేస్తున్నారు.
జులై 20న ప్రకాశ్ సోదరుడు అనిల్ ప్రశాంత్ కుందర్ ఆయనను సంప్రదించేందుకు ప్రయత్నించారు. ఫోన్ చేసినా ప్రకాశ్ స్పందించలేదు. కొద్దిసేపటి తర్వాత తాను బాగున్నానంటూ ఓ టెక్స్ట్ మెసేజ్ వచ్చింది.
అయితే ప్రకాశ్ సాధారణంగా వాయిస్ మెసేజ్‌ల ద్వారానే మాట్లాడేవారని కుటుంబ సభ్యులు తెలిపారు. ఈసారి టెక్స్ట్ మెసేజ్ రావడంతో వారికి అనుమానం వచ్చింది.
పాస్‌పోర్ట్ పరిశీలనతో బయటపడిన నిజం
సుమారు వారం తర్వాత అనిల్ మరోసారి ప్రకాశ్‌కు ఫోన్ చేశారు. అయినా స్పందన రాలేదు. దీంతో ఆందోళన చెందిన అనిల్.. షార్జాలో ప్రకాశ్ సహచరుడు మనోహర్ను సంప్రదించారు.
ప్రకాశ్ అపార్ట్‌మెంట్‌కు వెళ్లిన మనోహర్‌కు.. ఆయన భారత్‌కు వెళ్లినట్లు వాచ్‌మన్ చెప్పారు. కంపెనీ హెచ్‌ఆర్ విభాగం కూడా ఇదే విషయాన్ని తెలిపింది.
అయితే ప్రకాశ్ భారత్‌కు రాలేదని కుటుంబ సభ్యులు ధ్రువీకరించారు. దీంతో ఆయన పాస్‌పోర్ట్‌ను పరిశీలించగా.. ప్రకాశ్ ఇంకా షార్జాలోనే ఉన్నట్లు తేలింది.
దీంతో కుటుంబ సభ్యులు వెంటనే పోలీసులకు మిస్సింగ్ ఫిర్యాదు చేశారు.
కారులో తొమ్మిది ముక్కలుగా మృతదేహం
ప్రకాశ్ కోసం పోలీసులు గాలింపు చేపట్టారు. ఈ క్రమంలో ఒమన్ వెళ్లే మార్గంలో పార్క్ చేసి ఉన్న ఓ కారులో ఆయన మృతదేహాన్ని గుర్తించారు.
అనిల్ తెలిపిన వివరాల ప్రకారం.. ప్రకాశ్ మృతదేహాన్ని తొమ్మిది భాగాలుగా నరికి రెండు సంచుల్లో కుక్కారు. డీఎన్‌ఏతో పాటు ఇతర ఆధారాల ఆధారంగా మృతుడు ప్రకాశ్ అని నిర్ధారించారు.
అయితే ఈ హత్యకు అసలు కారణం ఏమిటనే విషయంపై షార్జా పోలీసులు ఇప్పటివరకు అధికారికంగా ఎలాంటి ప్రకటన చేయలేదు.
ఇది కూడా చదవండి
సాయి పల్లవి చీరకట్టుకు ఫిదా అవుతున్న ఫ్యాన్స్.. దీపావళికి పర్ఫెక్ట్ ట్రెడిషనల్ లుక్!
భార్య, కుమారుడు ఎక్కడ?
ప్రకాశ్ భార్య టీనా, కుమారుడు షార్జా నుంచి భారత్‌కు వెళ్లి ఉండవచ్చని భావిస్తున్నారు. అయితే వారి ఆచూకీ ఇప్పటివరకు లభించలేదు.
హత్యలో టీనా పాత్ర ఉండొచ్చనే అనుమానాలు వ్యక్తమవుతున్నప్పటికీ.. దీనిపై ఇప్పటివరకు ఎలాంటి స్పష్టత లేదు. ప్రకాశ్ కుటుంబ సభ్యులకు ఎవరితోనూ గొడవలు లేవని అనిల్ తెలిపారు.
ప్రకాశ్ మృతదేహాన్ని భారత్‌కు తీసుకురావడానికి యూఏఈలో అవసరమైన చట్టపరమైన ప్రక్రియలు పూర్తి చేయడానికి ప్రయత్నిస్తున్నామని అనిల్ చెప్పారు.
అలాగే టీనా, కుమారుడి ఆచూకీపై షార్జా అధికారులను సమాచారం కోరినట్లు తెలిపారు.
ఉడుపి పోలీసులు కూడా షార్జా అధికారుల నుంచి అధికారిక సమాచారం కోసం ఎదురుచూస్తున్నారు.