ఇండస్ట్రీలో విషాదం.. సీనియర్ నటి షావుకారు జానకి కన్నుమూత

ఏడు దశాబ్దాల సినీ ప్రయాణం.. 450కి పైగా సినిమాల్లో నటన

94 ఏళ్ల వయసులో తుదిశ్వాస.. 2022లో పద్మశ్రీతో సత్కరించిన కేంద్రం

ఆసుపత్రిలో చికిత్స పొందుతూ మృతి

ఇండస్ట్రీలో తీవ్ర విషాదం చోటు చేసుకుంది. సీనియర్ నటి షావుకారు జానకి కన్నుమూశారు.

కొన్ని రోజులుగా వృద్ధాప్య సమస్యలతో బాధపడుతున్న ఆమె గురువారం తీవ్ర అస్వస్థతకు గురయ్యారు.

దీంతో కుటుంబసభ్యులు ఆమెను చెన్నైలోని కావేరి ఆసుపత్రికి తరలించారు.

అక్కడ చికిత్స పొందుతూ శుక్రవారం తుదిశ్వాస విడిచారు. షావుకారు జానకి వయసు 94 సంవత్సరాలు.

నాలుగు భాషల్లో 450కి పైగా సినిమాలు

షావుకారు జానకి ఏడు దశాబ్దాల సుదీర్ఘ సినీ ప్రయాణంలో దాదాపు నాలుగు భాషల్లో 450కి పైగా సినిమాల్లో నటించారు.

నాలుగు తరాల నటీనటులతో కలిసి నటించిన ఘనత ఆమె సొంతం.

తెలుగు, తమిళ, కన్నడ, మలయాళ భాషల్లో ఎన్టీఆర్, ఏఎన్నార్, ఎంజీఆర్, శివాజీ గణేశన్, రాజ్ కుమార్, ప్రేమ్ నజీర్ వంటి దిగ్గజ హీరోల సరసన నటించి మెప్పించారు.

ఎన్టీఆర్, ఎంజీఆర్, కరుణానిధి, జయలలిత వంటి నలుగురు ముఖ్యమంత్రులతో కలిసి స్క్రీన్ షేర్ చేసుకున్న ఏకైక సీనియర్ నటిగా ఆమె అరుదైన రికార్డు సొంతం చేసుకున్నారు.

14 ఏళ్లకే కళారంగంలోకి..

1931 డిసెంబర్ 12న రాజమండ్రిలోని ఒక సాంప్రదాయ కుటుంబంలో షావుకారు జానకి జన్మించారు.

ఆమె అసలు పేరు శంకరమంచి జానకి. చిన్నప్పటి నుంచే కళలపై ఆసక్తి ఉండటంతో 14 ఏళ్ల వయసులోనే మద్రాసు వెళ్లారు.

అక్కడ ఆకాశవాణిలో రేడియో ఆర్టిస్ట్‌గా కెరీర్ ప్రారంభించారు.

చిన్న వయసులోనే ఆమెకు వివాహం జరిగింది. ఆ తర్వాత కుటుంబంలో తీవ్రమైన ఆర్థిక ఇబ్బందులు ఎదురయ్యాయి.

కనీసం మూడు పూటలా తినడానికి కూడా లేని పరిస్థితుల్లో కుటుంబ భారాన్ని మోయడానికి, పిల్లల ఆకలి తీర్చడానికి భర్త అనుమతితో సినిమా రంగంలోకి అడుగుపెట్టారు.

‘షావుకారు’తో హీరోయిన్‌గా ఎంట్రీ

ఎల్వీ ప్రసాద్ దర్శకత్వంలో 1950లో ఎన్టీఆర్ సరసన ‘షావుకారు’ సినిమాలో హీరోయిన్‌గా నటించి సినీ రంగ ప్రవేశం చేశారు.

తొలి సినిమా బ్లాక్‌బస్టర్ కావడంతో ఆ సినిమా పేరే ఆమె ఇంటి పేరుగా మారింది.

అప్పటి నుంచి ఆమె ‘షావుకారు’ జానకిగా చరిత్రలో నిలిచిపోయారు.

హీరోయిన్‌గా మాత్రమే కాకుండా క్యారెక్టర్ ఆర్టిస్ట్‌గా కూడా దశాబ్దాల పాటు ప్రేక్షకులను అలరించారు.

90 ఏళ్ల వయసులోనూ సినిమాల్లో నటించి వృత్తి పట్ల తనకున్న అంకితభావాన్ని చాటుకున్నారు.

స్వశక్తితో ఇల్లు నిర్మించుకున్న జానకి

ఆ రోజుల్లోనే స్వశక్తితో మద్రాసులో సొంత ఇల్లు నిర్మించుకుని షావుకారు జానకి మహిళలకు ఆదర్శంగా నిలిచారు.

ఆమె ఇల్లు ఎన్నో సూపర్ హిట్ సినిమాలకు వేదికగా నిలిచింది.

ఏడున్నర దశాబ్దాల పాటు కళారంగానికి చేసిన విశేష సేవలకు గుర్తింపుగా కేంద్ర ప్రభుత్వం 2022లో ప్రతిష్టాత్మక పద్మశ్రీ పురస్కారంతో ఆమెను సత్కరించింది.