ప్రపంచంలో ఐదో అత్యంత విలువైన కంపెనీగా స్పేస్ఎక్స్
60 బిలియన్ డాలర్లతో కర్సర్ కొనుగోలు
ఎలాన్ మస్క్కు చెందిన స్పేస్ఎక్స్ మార్కెట్ విలువలో అమెజాన్ను దాటేసి ప్రపంచంలో ఐదో అత్యంత విలువైన కంపెనీగా నిలిచింది.
న్యూయార్క్లోని నాస్డాక్ స్టాక్ ఎక్స్ఛేంజ్లో చరిత్రలోనే అతిపెద్ద పబ్లిక్ లిస్టింగ్ అనంతరం కంపెనీ షేర్ ధర 50 శాతానికి పైగా పెరగడంతో ఈ ఘనత సాధించింది.
ప్రస్తుతం స్పేస్ఎక్స్ మార్కెట్ విలువ 2.78 ట్రిలియన్ డాలర్లకు చేరుకోగా, జెఫ్ బెజోస్కు చెందిన అమెజాన్ విలువ 2.66 ట్రిలియన్ డాలర్లుగా ఉంది.
స్పేస్ఎక్స్ విలువ పెరగడానికి మరో కారణం కూడా ఉంది. కృత్రిమ మేధ (ఏఐ) కోడింగ్ స్టార్టప్ ‘కర్సర్’ను 60 బిలియన్ డాలర్లకు కొనుగోలు చేస్తున్నట్లు సంస్థ ప్రకటించింది. కర్సర్ మాతృసంస్థ అనిస్ఫియర్ను స్పేస్ఎక్స్ తన ఆధీనంలోకి తీసుకోనుంది. ఈ సంస్థ ఏఐ ఆధారిత కోడింగ్ ఏజెంట్ను అభివృద్ధి చేస్తోంది.
మస్క్ దృష్టిపై పెట్టుబడిదారుల నమ్మకం
అంతరిక్షంలో ఏఐ డేటా సెంటర్ల ఏర్పాటు, మానవులను అంగారక గ్రహంపై స్థిరపరచాలన్న స్పేస్ఎక్స్ లక్ష్యాలు పెట్టుబడిదారులను ఆకర్షిస్తున్నాయి. కంపెనీ పబ్లిక్ లిస్టింగ్ ద్వారా 85.7 బిలియన్ డాలర్లు సమీకరించింది. దీంతో మస్క్ ప్రపంచంలో తొలి ట్రిలియనీర్గా నిలిచాడు.
శుక్రవారం ఒక్కో షేరును 135 డాలర్లకు విక్రయించిన స్పేస్ఎక్స్, ప్రస్తుతం 209 డాలర్ల స్థాయికి చేరింది. అయితే భవిష్యత్ ఆదాయాలపై ఇంకా అనిశ్చితి ఉన్నందున ఈ స్థాయి విలువ దీర్ఘకాలం కొనసాగుతుందా అనే సందేహాలు కొందరు విశ్లేషకులు వ్యక్తం చేస్తున్నారు.
ఆదాయాల్లో మాత్రం అమెజాన్ ఆధిక్యం
మార్కెట్ విలువలో స్పేస్ఎక్స్ ముందంజలో ఉన్నప్పటికీ ఆదాయం, లాభాల విషయంలో అమెజాన్ చాలా దూరంలో ఉంది.
2026 తొలి త్రైమాసికంలో అమెజాన్ 30.3 బిలియన్ డాలర్ల లాభాన్ని నమోదు చేసింది. అదే సమయంలో స్పేస్ఎక్స్ 4.3 బిలియన్ డాలర్ల నష్టాన్ని చవిచూసింది.
2025లో అమెజాన్ మొత్తం విక్రయాలు 716.9 బిలియన్ డాలర్లకు చేరగా, స్పేస్ఎక్స్ ఆదాయం 18.67 బిలియన్ డాలర్లుగా నమోదైంది.
అయినా భవిష్యత్లో స్పేస్ఎక్స్ సాధించగల అవకాశాలపై పెట్టుబడిదారులు భారీగా పందెం కాస్తున్నారు. పునర్వినియోగ రాకెట్ల తయారీ, ప్రయోగాలతో పాటు స్టార్లింక్ ఇంటర్నెట్ ఉపగ్రహాల సేవలను విస్తరిస్తున్న సంస్థ, ఏఐ రంగంలోనూ తన ఉనికిని పెంచుతోంది.
వెంచర్ క్యాపిటలిస్ట్ ఐలీన్ బర్బిడ్జ్ అభిప్రాయం ప్రకారం, కంపెనీ ఆర్థిక ఫలితాల కంటే మస్క్ దృష్టి, భవిష్యత్ ప్రణాళికలపైనే చాలా మంది పెట్టుబడిదారులు పెట్టుబడులు పెడుతున్నారు.
ఏఐ రేసులో స్పేస్ఎక్స్ అడుగు
ఓపెన్ఏఐ, ఆంత్రోపిక్ మాదిరిగానే కర్సర్ కూడా ఏఐ సాయంతో కోడ్ రాయడాన్ని ఆటోమేట్ చేసే సాంకేతికతను అందిస్తోంది. ప్రస్తుతం ఏఐలో వేగంగా పెరుగుతున్న విభాగాల్లో ఇది ఒకటి.
వివాదాస్పద గ్రోక్ చాట్బాట్ను అభివృద్ధి చేసిన xAI వ్యాపారాన్ని విస్తరించే ప్రయత్నాల్లో భాగంగానే స్పేస్ఎక్స్ ఈ కొనుగోలుకు ముందుకొచ్చినట్లు భావిస్తున్నారు.
ఏప్రిల్లో భాగస్వామ్యాన్ని ప్రకటించినప్పుడు స్పేస్ఎక్స్, “కర్సర్ ఉత్పత్తి సామర్థ్యం, సాఫ్ట్వేర్ ఇంజినీర్లలో ఉన్న విస్తృత వినియోగదారుల ఆధారం, మా కొలాసస్ సూపర్కంప్యూటర్తో కలిస్తే ప్రపంచంలో అత్యంత ఉపయోగకరమైన ఏఐ మోడళ్లను అభివృద్ధి చేయగలం” అని పేర్కొంది.
కర్సర్ సేవలను స్ట్రైప్, అడోబ్, ఎన్విడియా వంటి సంస్థలు వినియోగిస్తున్నాయి. ఎన్విడియా అధినేత జెన్సన్ హువాంగ్ దీనిని తనకు అత్యంత ఇష్టమైన ఎంటర్ప్రైజ్ ఏఐ సేవగా పేర్కొన్నారు.
స్పేస్ఎక్స్ తెలిపిన వివరాల ప్రకారం సెప్టెంబర్ చివరినాటికి ఈ ఒప్పందం పూర్తవుతుంది. కర్సర్ వాటాదారులకు 60 బిలియన్ డాలర్ల విలువైన స్పేస్ఎక్స్ షేర్లు అందజేయనున్నారు.