యుద్ధంలోకి మరో దేశం.. వరల్డ్ వార్‌కు దారితీస్తుందా?

హర్ముజ్ జలసంధిపై పెరుగుతున్న ఉద్రిక్తతలు.. చమురు మార్కెట్లపై ప్రభావం?

ఇరాన్‌తో యూఏఈ కీలక నిర్ణయం

పశ్చిమాసియా సంక్షోభం మరో మలుపు తిరిగేలా కనిపిస్తోంది.

ఇప్పటికే కొనసాగుతున్న ఉద్రిక్తతలు మరింత పెరుగుతున్న నేపథ్యంలో యునైటెడ్ అరబ్ ఎమిరేట్స్ (యూఏఈ) కీలక నిర్ణయం తీసుకుంది.

ఇరాన్‌తో అన్ని రకాల వాణిజ్య, వాణిజ్య మార్పిడి, ఆర్థిక లావాదేవీలను తదుపరి ఆదేశాలు వెలువడే వరకు నిలిపివేస్తున్నట్లు ప్రకటించింది.

రెండు బాలిస్టిక్ క్షిపణులపై ఆరోపణలు

యూఏఈ భూభాగాన్ని లక్ష్యంగా చేసుకుని ఇటీవల ఇరాన్ నుంచి రెండు బాలిస్టిక్ క్షిపణులు ప్రయోగించారని ఎమిరేట్స్ ఆరోపించింది.

వాటిలో ఒకటి యూఏఈ జలాల వెలుపల సముద్రంలో పడిందని, మరోటి దేశ జలాల్లో పడిందని యూఏఈ రక్షణ శాఖ తెలిపింది.

అయితే ఈ ఆరోపణలను ఇరాన్ తీవ్రంగా ఖండించింది. ఇవి పూర్తిగా నిరాధార ఆరోపణలని ఇరాన్ విదేశాంగశాఖ స్పష్టం చేసింది.

ఇలాంటి ప్రకటనలు ప్రాంతీయ శాంతి, భద్రతకు విఘాతం కలిగిస్తాయని పేర్కొంది.

తాజా పరిణామంతో ఇరాన్-యూఏఈ మధ్య ఇప్పటికే సున్నితంగా ఉన్న సంబంధాలు మరింత దెబ్బతిన్నాయి.

గతంలో ఇరు దేశాల మధ్య వాణిజ్య, దౌత్య సంబంధాలను కొనసాగించేందుకు ప్రయత్నాలు జరిగినప్పటికీ.. తాజా నిర్ణయంతో పరిస్థితి మళ్లీ ఉద్రిక్తంగా మారింది.

ప్రపంచ చమురు మార్కెట్లపై ప్రభావం?

యూఏఈ-ఇరాన్ వాణిజ్య సంబంధాల నిలిపివేతతో పాటు హర్ముజ్ జలసంధిలో కొనసాగుతున్న ఉద్రిక్తతలు అంతర్జాతీయ ఇంధన మార్కెట్లకు కీలకంగా మారాయి.

ఈ జలమార్గంలో రవాణాకు అంతరాయం కొనసాగితే చమురు సరఫరా, షిప్పింగ్, బీమా, రవాణా ఖర్చులపై ఒత్తిడి పెరిగే అవకాశం ఉంది.

ఇప్పటికే పశ్చిమాసియా ఉద్రిక్తతల నేపథ్యంలో గల్ఫ్ మార్కెట్లలో పెట్టుబడిదారులు అప్రమత్తంగా వ్యవహరిస్తున్నారు.

ఇరాన్‌తో వాణిజ్య, ఆర్థిక లావాదేవీలను నిలిపివేస్తూ యూఏఈ తీసుకున్న నిర్ణయం ఇరు దేశాల సంబంధాల్లో మరో కీలక మలుపుగా భావిస్తున్నారు.

హర్ముజ్ జలసంధి కేంద్రంగా వివాదం

హర్ముజ్ జలసంధి మూసివేత కొనసాగుతుందని ఇరాన్ ఇప్పటికే హెచ్చరించింది.

అమెరికాతో శాంతి ఒప్పందం కుదిరే వరకు జలసంధిని తెరిచే ప్రసక్తే లేదని ప్రకటించింది.

యూఏఈ నుంచి గల్ఫ్ వెలుపలికి వెళ్లే నౌకలకు హర్ముజ్ కీలక మార్గం.

దీంతో ఇరాన్ తాజా ప్రకటన యూఏఈ ఆర్థిక వ్యవస్థతో పాటు అంతర్జాతీయ చమురు రవాణాపైనా ప్రభావం చూపే అవకాశం ఉంది.

మొత్తంగా ఒకవైపు క్షిపణి ఆరోపణలు, మరోవైపు వాణిజ్య ఆంక్షలు, ఇంకోవైపు అమెరికా అధ్యక్షుడు ట్రంప్ హర్ముజ్‌పై ఆధిపత్యం తమదేనంటూ మ్యాప్ విడుదల చేసిన నేపథ్యంలో.. హర్ముజ్ జలసంధి చుట్టూ పరిణామాలు రానున్న రోజుల్లో మరింత కీలకంగా మారే అవకాశం కనిపిస్తోంది.