ప్రధాని నరేంద్ర మోదీ మంగళవారం ఇటలీ రాజధాని రోమ్కు చేరుకున్నారు. ఇటలీ ప్రధాని జార్జియా మెలోనీ ఆయనకు ఆత్మీయ స్వాగతం పలికారు. ఇద్దరు నేతలు ముందుగా విందులో పాల్గొన్నారు. ఆ తర్వాత చారిత్రక కొలస్సియాన్ని సందర్శించి పలు అంశాలపై అభిప్రాయాలు పంచుకున్నారు.
మెలోనీ తన సోషల్ మీడియా ఖాతా ఎక్స్లో మోదీతో కలిసి దిగిన ఫొటోను పంచుకున్నారు. “రోమ్కు స్వాగతం మై ఫ్రెండ్” అంటూ ఇటలీ, భారత్ జాతీయ జెండాల ఎమోజీలు జత చేశారు. ఈ ఫొటోలో వెలుగులతో మెరిసిపోతున్న కొలస్సియం నేపథ్యంగా కనిపించింది. ఫ్లేవియన్ అంఫిథియేటర్గా గుర్తింపు పొందిన ఈ చారిత్రక కట్టడం రోమ్ మధ్యలో ఉంది.
ఈ ఫొటో సోషల్ మీడియాలో వైరల్గా మారింది. ఎక్స్లో దీనికి 10 లక్షలకు పైగా వ్యూస్ వచ్చాయి. దాదాపు 60 వేల లైకులు, 2 వేలకుపైగా కామెంట్లు నమోదయ్యాయి. ఇద్దరు దేశాధినేతల స్నేహాన్ని నెటిజన్లు ప్రశంసిస్తున్నారు.
మోదీ కూడా మెలోనీతో జరిగిన భేటీకి సంబంధించిన నాలుగు ఫొటోలను పంచుకున్నారు. “రోమ్కు చేరుకున్న తర్వాత ప్రధాని మెలోనీతో విందులో పాల్గొన్నాను. అనంతరం కొలస్సియాన్ని సందర్శించాం” అని తెలిపారు.
“పలు అంశాలపై అభిప్రాయాలు పంచుకున్నాం. భారత్-ఇటలీ స్నేహాన్ని మరింత బలోపేతం చేసే అంశాలపై ఇవాళ జరిగే చర్చల కోసం ఎదురుచూస్తున్నాను” అని మోదీ పేర్కొన్నారు.
మోదీ ప్రస్తుతం ఐదు దేశాల పర్యటన చివరి దశలో ఉన్నారు. ఇటలీకి ముందు ఆయన నార్వే, యూఏఈ, నెదర్లాండ్స్, స్వీడన్లలో పర్యటించారు.
ఇటలీ పర్యటనలో భాగంగా అధ్యక్షుడు సెర్జియో మాటరెల్లాతో మోదీ భేటీ కానున్నారు. మెలోనీతో ద్వైపాక్షిక చర్చలు నిర్వహించనున్నారు. ఇతర దౌత్య కార్యక్రమాల్లో కూడా పాల్గొననున్నారు. బుధవారం భారత్కు తిరుగు ప్రయాణం కానున్నారు.
మోదీ గతంలో 2024 జూన్లో జరిగిన జీ7 సదస్సు కోసం ఇటలీ వెళ్లారు. ఆ సమయంలో మెలోనీ మోదీతో కలిసి సెల్ఫీ, వీడియోను సోషల్ మీడియాలో పంచుకున్నారు. వీడియోలో ఇద్దరూ కెమెరాకు చేతులు ఊపుతూ కనిపించారు. “హలో ఫ్రం ది మెలోడీ టీమ్” అంటూ మెలోనీ చెప్పిన వీడియో అప్పట్లో వైరల్గా మారింది.
మోదీ-మెలోనీ భేటీ తర్వాత సోషల్ మీడియాలో ‘మెలోడీ’ అనే పదం విస్తృతంగా ట్రెండ్ అయింది. “హాయ్ ఫ్రెండ్స్, ఫ్రం #Melodi” అంటూ మెలోనీ పోస్టు చేయగా, “భారత్-ఇటలీ స్నేహం చిరకాలం కొనసాగాలి” అంటూ మోదీ స్పందించారు.
అంతకుముందు 2023లో దుబాయ్లో జరిగిన కాప్-28 సదస్సు సందర్భంగా ఇద్దరు నేతలు దిగిన సెల్ఫీ కూడా విస్తృతంగా వైరల్ అయింది.