తిరుమల: తిరుమలలో భక్తుల రద్దీ కొనసాగుతోంది. సోమవారం అయినప్పటికీ రద్దీ ఏమాత్రం తగ్గలేదు. వేసవి సెలవుల ప్రభావంతో గత కొన్ని రోజులుగా భక్తులు భారీ సంఖ్యలో తిరుమలకు వస్తున్నారు. ఈసారి వేసవి కాలంలో గతంలో ఎన్నడూ లేని స్థాయిలో భక్తుల రద్దీ నమోదవుతోందని తిరుమల తిరుపతి దేవస్థానం (టీటీడీ) అధికారులు తెలిపారు.
అయితే నిన్నటితో పోలిస్తే నేడు రద్దీ కొంత తగ్గింది. నిన్న వరకు క్యూ లైన్లు బయట ప్రాంతాల వరకూ విస్తరించగా, నేడు భక్తులు వైకుంఠం క్యూ కాంప్లెక్స్లోని కంపార్ట్మెంట్లలోనే వేచి ఉన్నారు.
గతంలో మాదిరిగా ఒకే సీజన్లో కాకుండా, ఇప్పుడు అవకాశం దొరికినప్పుడల్లా భక్తులు తిరుమలకు వస్తున్నారని అధికారులు చెబుతున్నారు. సెలవులు వచ్చిన ప్రతిసారి భక్తులు పెద్ద సంఖ్యలో చేరుతున్నారు. ముఖ్యంగా వారాంతాలు, వరుస సెలవుల సమయంలో తిరుమలకు భక్తులు పోటెత్తుతున్నారు. గతంలో వేసవి కాలంలోనే అధిక రద్దీ కనిపించేదని, ఇప్పుడు ఏడాది పొడవునా భక్తుల రాక కొనసాగుతోందని అధికారులు వివరించారు.
ప్రస్తుతం తిరుమలలోని వైకుంఠం క్యూ కాంప్లెక్స్లో 21 కంపార్ట్మెంట్లలో భక్తులు శ్రీవారి దర్శనం కోసం వేచి ఉన్నారు. సర్వదర్శనం కోసం టోకెన్లు లేకుండా ఉదయం క్యూ లైన్లో ప్రవేశించిన భక్తులకు దర్శనం పొందేందుకు సుమారు 12 గంటల సమయం పడుతుందని టీటీడీ అధికారులు తెలిపారు.
నిన్న శ్రీవారిని రికార్డు స్థాయిలో 90,826 మంది భక్తులు దర్శించుకున్నారు. వీరిలో 42,747 మంది తలనీలాలు సమర్పించారు. హుండీ ఆదాయం ₹3.85 కోట్లుగా నమోదైంది. అదే రోజు 3.99 లక్షల లడ్డూలు విక్రయించారు. అన్నప్రసాదాన్ని 2.73 లక్షల మంది భక్తులు స్వీకరించినట్లు అధికారులు తెలిపారు.