బంగారంలో అనిశ్చితి.. కొనుగోలుదారుల్లో అయోమయం

హైదరాబాద్:బంగారం ధరలు ఇటీవలి రోజుల్లో తీవ్ర ఒడిదుడుకులకు లోనవుతున్నాయి. అంతర్జాతీయ పరిణామాల ప్రభావంతో బంగారం, వెండి ధరలు ఒకరోజు పెరిగి మరోరోజు తగ్గుతున్నాయి. దీంతో కొనుగోలుదారులు, మదుపుదారులు అయోమయంలో పడుతున్నారు. ప్రస్తుతం ధరలు ఏ దిశగా వెళ్తాయో చెప్పలేని పరిస్థితి నెలకొంది.

బంగారం, వెండి ధరల్లో కొనసాగుతున్న అనిశ్చితి వల్ల కొనుగోళ్లు కూడా మందగించాయి. ధరలు మరింత తగ్గుతాయా? లేక మళ్లీ పెరుగుతాయా? అన్న సందిగ్ధతతో చాలామంది కొనుగోళ్లను వాయిదా వేస్తున్నారు. ఇదే సమయంలో అమ్మకాలు తగ్గిపోతాయన్న ఆందోళన వ్యాపారుల్లో కనిపిస్తోంది.

బంగారం, వెండి అంటే అన్ని వర్గాల ప్రజలకు ప్రత్యేక ఆసక్తి ఉంటుంది. పేదల నుంచి ధనికుల వరకూ తమ సొంతంగా బంగారం, వెండి ఉండాలని కోరుకుంటారు. అందుకే ప్రపంచంలోని అనేక దేశాలతో పోలిస్తే భారత్‌లో వీటికి అధిక డిమాండ్ ఉంటుందని వ్యాపార వర్గాలు చెబుతున్నాయి. ముఖ్యంగా దక్షిణ భారత రాష్ట్రాల్లో బంగారం, వెండి కొనుగోళ్లు ఎక్కువగా జరుగుతుంటాయి. సంప్రదాయాలు, శుభకార్యాల్లో వీటి వినియోగం అధికంగా ఉండటంతో ప్రజలు ఆసక్తి చూపుతుంటారు.

అయితే ప్రస్తుతం శుభకార్యాలకు కొంత విరామం రావడం కొనుగోళ్లపై ప్రభావం చూపుతోంది. మరోవైపు మదుపుదారులు కూడా బంగారం, వెండిలో పెట్టుబడులు పెట్టేందుకు ముందుకు రావడం లేదు. ధరల దిశపై స్పష్టత లేకపోవడంతో జాగ్రత్తగా వ్యవహరిస్తున్నారు.

ఈ నేపథ్యంలో దేశీయ మార్కెట్‌లో బంగారం, వెండి ధరలు స్వల్పంగా తగ్గాయి. ఉదయం 6 గంటల సమయానికి హైదరాబాద్ బులియన్ మార్కెట్‌లో నమోదైన ధరల ప్రకారం 22 క్యారెట్ల 10 గ్రాముల బంగారం ధర రూ.1,43,190గా ఉంది. 24 క్యారెట్ల 10 గ్రాముల బంగారం ధర రూ.1,56,210 వద్ద కొనసాగుతోంది. కిలో వెండి ధర రూ.2,89,900గా నమోదైంది.

అయితే అంతర్జాతీయ మార్కెట్లలో పరిస్థితులను బట్టి రోజంతా ధరల్లో మార్పులు చోటుచేసుకునే అవకాశం ఉంది.