ఛత్తీస్గఢ్లో ఒకప్పుడు నక్సల్స్ ప్రభావిత ప్రాంతంగా ఉన్న నంబి.. ఇప్పుడు పర్యాటక కేంద్రంగా మారింది. జలపాతం వద్ద పెరుగుతున్న సందర్శకులతో స్థానిక యువతకు ఉపాధి, ఆదాయం లభిస్తోంది.
భయానికి బదులు పర్యాటక సందడి
ఛత్తీస్గఢ్లోని బస్తర్ డివిజన్ ఒకప్పుడు నక్సల్స్ ప్రాబల్యంతో భయానక వాతావరణానికి నిలయంగా ఉండేది.
అయితే ఇప్పుడు అక్కడ పరిస్థితులు పూర్తిగా మారుతున్నాయి. బీజాపూర్ జిల్లాలోని నంబి జలపాతం ఇందుకు నిదర్శనంగా నిలుస్తోంది.
గతంలో ఈ ప్రాంతానికి వెళ్లేందుకు ప్రజలు భయపడేవారు.
ఇప్పుడు మాత్రం పర్యాటకులతో నంబి ప్రాంతం సందడిగా మారింది.
రాష్ట్రంలోనే ఎత్తైన జలపాతాల్లో ఒకటిగా గుర్తింపు పొందిన నంబికి సందర్శకుల సంఖ్య రోజురోజుకూ పెరుగుతోంది.
దీంతో స్థానిక యువతకు కొత్త ఉపాధి అవకాశాలు లభిస్తున్నాయి.
యువతకు గైడ్లుగా ఉపాధి
గ్రామానికి చెందిన 27 మంది యువకులు ఒక కమిటీగా ఏర్పడ్డారు. పర్యాటకులకు గైడ్లుగా సేవలు అందిస్తున్నారు.
గైడ్ సేవలు, ఇతర కార్యకలాపాల ద్వారా కేవలం రెండు నెలల్లోనే రూ.2 లక్షలకు పైగా ఆదాయం ఆర్జించారు.
పర్యాటకుల సౌకర్యం కోసం ప్రత్యేక వంటశాలను కూడా ఏర్పాటు చేశారు.
ప్లేటుకు రూ.120 చొప్పున భోజనం అందిస్తున్నారు. జూలై నెల నుంచి ఇప్పటివరకు 2,000 మందికి పైగా పర్యాటకులు నంబి జలపాతాన్ని సందర్శించారు.
రహదారి నిర్మాణంతో పెరిగిన సందర్శకులు
ప్రభుత్వం కొత్తగా రహదారిని నిర్మించడంతో నంబి జలపాతానికి ప్రయాణం మరింత సులభమైంది.
దీంతో ఇతర ప్రాంతాల నుంచి కూడా సందర్శకులు పెద్ద సంఖ్యలో వస్తున్నారు.
స్థానిక గైడ్ గజేంద్ర మాట్లాడుతూ, గత రెండేళ్లలో జరిగిన అభివృద్ధి పనులతో ప్రాంత పరిస్థితుల్లో స్పష్టమైన మార్పు వచ్చిందని చెప్పారు.
ఒకప్పుడు ఈ ప్రాంతానికి రావడానికే ప్రజలు భయపడేవారని, ఇప్పుడు ఇతర ప్రాంతాల నుంచి కూడా పెద్ద సంఖ్యలో సందర్శకులు వస్తున్నారని తెలిపారు.
పర్యాటక రంగానికి మరింత అవకాశం
నాలుగేళ్ల క్రితం వరకు అత్యంత సమస్యాత్మక ప్రాంతంగా ఉన్న నంబి.. ఇప్పుడు ప్రకృతి సౌందర్యంతో సందర్శకులను ఆకట్టుకుంటోందని దంతెవాడ తహసీల్దార్ గోవర్ధన్ సాహు తెలిపారు.
ఇక్కడ చిన్న క్యాంటీన్, హోమ్స్టే సదుపాయాలు ఏర్పాటు చేయడంతో పాటు 24 గంటల భద్రత కల్పిస్తే పర్యాటక రంగం మరింత అభివృద్ధి చెందుతుందని ఆయన సూచించారు.
నక్సల్స్ ప్రభావం తగ్గడం, మెరుగైన రవాణా సౌకర్యాలు, సోషల్ మీడియా ప్రచారం కలిసి నంబి జలపాతాన్ని బస్తర్ ప్రాంతంలో వస్తున్న సానుకూల మార్పులకు ప్రతీకగా నిలిపాయి.