టైమ్స్ స్క్వేర్లో కత్తులతో దాడి.. BofA వైస్ ప్రెసిడెంట్ మృతి
న్యూయార్క్లోని ప్రముఖ టైమ్స్ స్క్వేర్లో సోమవారం సాయంత్రం దారుణ ఘటన జరిగింది.
కత్తులతో జరిగిన దాడిలో బ్యాంక్ ఆఫ్ అమెరికా (BofA) వైస్ ప్రెసిడెంట్ ఎరిన్ పియాసెంటి ప్రాణాలు కోల్పోయారు.
ఆగస్టు 31, 2026న జరిగిన ఈ ఘటనలో మరో 68 ఏళ్ల వ్యక్తి తీవ్రంగా గాయపడ్డారు.
ప్రస్తుతం ఆయన ఆసుపత్రిలో చికిత్స పొందుతున్నారు.
ఇటీవలే ప్రసూతి సెలవు ముగించుకుని విధుల్లోకి..
ఎరిన్ పియాసెంటి ఇటీవలే ఓ బిడ్డకు జన్మనిచ్చారు. మెటర్నిటీ లీవ్ పూర్తయిన తర్వాత ఆమె తిరిగి ఉద్యోగంలో చేరారు.
అయితే విధుల్లోకి తిరిగి వచ్చిన కొద్దిరోజులకే ఈ దారుణ ఘటనలో ప్రాణాలు కోల్పోవడం కుటుంబ సభ్యులను తీవ్ర విషాదంలోకి నెట్టింది.
ఎరిన్ పియాసెంటి Ivy League గ్రాడ్యుయేట్. ఆమె ప్రఖ్యాత Fordham Law Schoolలో న్యాయ విద్యను పూర్తి చేశారు.
ఆమె మృతిపై Bank of America యాజమాన్యం, Fordham Law School తీవ్ర దిగ్భ్రాంతి వ్యక్తం చేస్తూ సంతాపం ప్రకటించాయి.
షాపింగ్ బ్యాగ్ నుంచి రెండు కత్తులు తీసి దాడి
New York Police Department సబ్స్టేషన్ సమీపంలో ఈ దాడి జరిగింది.
పోలీసులు తెలిపిన వివరాల ప్రకారం.. 49 ఏళ్ల మహిళ తన షాపింగ్ బ్యాగ్ నుంచి అకస్మాత్తుగా రెండు కత్తులు బయటకు తీసింది.
అక్కడ ఉన్న ఎరిన్ పియాసెంటితో పాటు 68 ఏళ్ల వ్యక్తిపై విచక్షణారహితంగా దాడి చేసింది.
దాడికి పాల్పడిన మహిళను Queensకు చెందిన పామెలా సిస్నెరోస్గా పోలీసులు గుర్తించారు.
ఆమె మానసిక సమస్యలతో బాధపడుతున్నట్లు పోలీసులు తెలిపారు.
పోలీసులపైకి దూసుకురావడంతో కాల్పులు
సమాచారం అందుకున్న పోలీసులు వెంటనే ఘటనా స్థలానికి చేరుకున్నారు.
నిందితురాలు పోలీసులపై కూడా కత్తులతో దాడి చేసేందుకు ప్రయత్నించింది.
కత్తులు పడేయాలని పోలీసులు హెచ్చరించినప్పటికీ ఆమె వినలేదు. పోలీసులపైకి దూసుకురావడంతో వారు కాల్పులు జరిపారు.
ఈ కాల్పుల్లో పామెలా సిస్నెరోస్ ప్రాణాలు కోల్పోయింది.
ఈ ఘటనకు సంబంధించిన వీడియోలు సోషల్ మీడియాలో వైరల్గా మారాయి.
మేయర్ జొహ్రాన్ మమ్దానీ విచారం
ఈ ఘటనపై న్యూయార్క్ మేయర్ జొహ్రాన్ మమ్దానీ విచారం వ్యక్తం చేశారు.
బాధిత కుటుంబాల వేదనను అర్థం చేసుకుంటున్నామని, వారికి అండగా నిలుస్తామని హామీ ఇచ్చారు.
పర్యాటకులు, స్థానికులతో ఎప్పుడూ రద్దీగా ఉండే టైమ్స్ స్క్వేర్ నడిబొడ్డునే హింసాత్మక ఘటన జరగడంతో స్థానికులు తీవ్ర భయాందోళనకు గురయ్యారు.